ខែ្មរកម្ពុជាក្រោមនៅក្នុងស្រុកទិនបៀង ខេត្តអានយ៉ាង ឬខេត្តមាត់ជ្រូក ទឹកដីខែ្មរកម្ពុជាក្រោមបានឲ្យដឹងថា ពួកគាត់ពុំមានដីស្រែធ្វើកសិកម្មទៀតទេនៅឆ្នាំនេះ ដោយសារតែអាជ្ញាធរវៀតណាមបានរឹបអូសយកដើម្បីជីកប្រទ្បាយទឹកកាត់លើ ដីស្រែរបស់គាត់ ហើយគេកំពុងតែហាមឃាត់មិនឲ្យប៉ះពាល់ដីស្រែកសិកម្មនោះ។
គ្រួសារខែ្មរកម្ពុជាក្រោមនានានៅទីនោះ បានបញ្ជូនកូនៗឲ្យស៊ីឈ្មួលបម្រើគេនៅក្នុងទីក្រុងព្រៃនគរ ឬទីក្រុងហូជីមិញនិងទីកន្លែងដទៃទៀត ដើម្បីស្វែងរកប្រាក់កម្រៃចិញ្ចឹមគ្រួសារ នៅគ្រាដែលពួកគាត់បាត់បង់ដីធ្លីកសិកម្មនោះ។
គ្រួសារខែ្មរកម្ពុជាក្រោមនៅក្នុងឃុំអាងគឺ ស្រុកទិនបៀង ខេត្តអានយ៉ាង ប្រទេសវៀតណាម ទឹកដីខែ្មរកម្ពុជាក្រោម បានថ្លែងប្រាប់វិទ្យុអាស៊ីសេរីតាមទូរស័ព្ទឲ្យដឹងថា ស្ថានការណ៍រស់នៅក្រោមការតាមដាននិងគាបសង្កត់យ៉ាងខ្លាំងនាពេល នេះដោយអាជ្ញាធរវៀតណាម ៖ «បើយើងចុះទៅវាចាប់យើង វាធ្វើបាបយើង វានៅចាំហ្នុង ចាំចាប់ធ្វើបាបយើង។ នគរបាលខាងវៀតណាមហ្នឹងគេយាមរាល់ថ្ងៃ។ មួយថ្ងៃ១០-២០នាក់អី យាមរាល់ថ្ងៃ។ វារារាំងមិនឲ្យយើងចូលទៅដីយើង។ មួយៗកូនទៅស៊ីឈ្នួលគេនៅព្រៃនគរឯណោះឥឡូវហ្នឹង»។
គ្រួសារខែ្មរកម្ពុជាក្រោមម្នាក់ទៀតបានថែ្លងដែរថា ៖ «គេគាបសង្កត់មាំណាស់ឥឡូវហ្នឹង ដូចដីទួលអីគេមកគំរាមយកអស់ហើយ។ ស្រែខ្ញុំហ្នឹងមិនអាចធ្វើកសិកម្មបានទេ»។
ស្ថានការណ៍តានតឹងនោះ គឺក្រោយពីពួកគាត់ចំនួនជាង១០គ្រួសារនៅក្នុងចំណោមជាង៣០០គ្រួសារ បានងើបតវ៉ាជំទាស់ទៅនឹងផែនការជីកប្រទ្បាយទឹកកាលពីចុងឆ្នាំ២០០៩ កន្លងទៅនេះ។
កាលពីបីឬបួនខែកន្លងទៅនេះ ក្រុមអាជ្ញាធរនគរបាលវៀតណាម ត្រូវបានគេដាក់ពង្រាយរាប់សិបនាក់ដើម្បីយាមការពារគ្រឿងចក្រជា ច្រើនគ្រឿងក្នុងការជីកប្រទ្បាយទឹកប្រវែង១០គីឡូម៉ែត្រ កាត់តាមដីធ្លីកសិកម្មចំនួនជាង៤០០ហិកតា ដើម្បីធ្វើប្រព័ន្ធធារាសាស្ត្រនិងផ្លូវថ្នល់។
គម្រោងការនេះកំពុងតែបន្តនៅទ្បើយ នៅគ្រាដែលគ្រួសារខែ្មរកម្ពុជាក្រោមជាង៣០០គ្រួសារកំពុងតែបាត់បង់ ដីធ្លីកសិកម្មនោះដោយគ្មានសំណងអ្វីទ្បើយ។
ប្រធានសហគមន៍ខែ្មរកម្ពុជាក្រោមនៅក្នុងប្រទេសកម្ពុជា លោក ថាច់ សេដ្ឋា បានមានប្រសាសន៍អត្ថាធិប្បាយថា ៖ «យើងបានប្រើប្រាស់គ្រប់មធ្យោបាយក្នុងការជួយអន្តរាគមន៍ ប៉ុន្តែរដ្ឋាភិបាលវៀតណាមនៅធ្វើព្រងើយកន្តើយ»។
មន្រ្តីនៃស្ថានទូតវៀតណាមនៅកម្ពុជា ធ្លាប់បានបដិសេធការចោទប្រកាន់នេះថា ជារឿងមិនពិត។
ជាមួយគ្នានេះ ព្រះភិក្ខុសង្ឃព្រះនាម ថាច់ សុវណ្ណារ៉ា ជាអ្នកនាំពាក្យរបស់សហព័ន្ធខែ្មរកម្ពុជាក្រោមពិភពលោកនៅក្នុង ប្រទេសកម្ពុជា បានមានព្រះថេរដីកាថា ៖ «អាត្មាសូមបញ្ជាក់ថា ហ្នឹងហើយជាទង្វើមួយដ៏អាក្រក់បំផុត ជាពិសេសអំពើគាបសង្កត់ គឺមិនគោរពសិទ្ធិជនជាតិដើមទាល់តែសោះ»។
គ្រួសារខែ្មរកម្ពុជាក្រោមចំនួនជាង៣០០គ្រួសារនោះ បានបាត់បង់ដីធ្លីកសិកម្មតាំងពីឆ្នាំ១៩៧៩មក ដោយសារតែពួកគាត់បានរត់គេចខ្លួនពីដីធ្លី នៅគ្រាដែលមានការវាយប្រយុទ្ធគ្នារវាងកងទ័ពខែ្មរក្រហមជាមួយនឹង កងទ័ពវៀតណាម។ ពួកគាត់បានងើបតវ៉ាទាមទារដីធ្លីនោះមកវិញកាលពីឆ្នាំ២០០៧ និងឆ្នាំ២០០៨កន្លងទៅ ប៉ុន្តែមិនបានសម្រេច ហើយគ្រួសារមួយចំនួនកំពុងតែរងការតាមចាប់ខ្លួន។ គ្រួសារមួយចំនួននោះត្រូវបានអាជ្ញាធរថៃ បានចាប់បញ្ជូនមកប្រទេសកម្ពុជាវិញ កាលពីថៃ្ងទី៥ ខែធ្នូ ឆ្នាំ២០០៩កន្លងទៅនេះ៕
ប្រភពពីវិទ្យុអាស៊ីសេរី.
