អតីតសង្ឃខ្មែរក្រោម៥អង្គ បន្តសុំសិទ្ធិជ្រកកោនពីអង្គការសហប្រជាជាតិ

ដោយៈ ចៅ មុនីខេមរា
បន្ទាប់ពីអតីតព្រះចៅអធិការវត្តភ្នំដិនជើង ទឹម សាខន កំពុងរង់ចំាការពិចារណា ពីឧត្តមស្នងការអង្គការសហប្រជាជាតិទទួលបន្ទុកជនភៀសខ្លួននៅទីក្រុងបាងកក់ មានដំណឹងថាអតីតសង្ឃខ្មែរក្រោមចំនួន ៥ អង្គផ្សេងទៀត ដែលត្រូវអាជ្ញាធរយួនខេត្តឃ្លាំង កាត់ទោសឲ្យជាប់ពន្ធនាគារកន្លងមក បានរត់ភៀសខ្លួនទៅដល់ប្រទេសថៃ ហើយដើម្បីសុំសិទ្ធិជ្រកកោន ។
អតីតសង្ឃជនជាតិដើមខ្មែរក្រោមទាំង ៥ អង្គ ដែលត្រូវរដ្ឋាភិបាលក្រុងហាណូយ បញ្ជាឲ្យតុលាការយួនខេត្តឃ្លាំង កាត់ទោសទាំងទទឹងទិសឲ្យជាប់ពន្ធនាគារពី ២ ទៅ ៤ ឆ្នាំ មាន៖ ទី១-ព្រះតេជគុណ លី ហ្វាង ព្រះជន្ម ២១ វស្សា គង់នៅវត្តសំរោង, ទី២-ព្រះតេជគុណ គឹម មឿន ព្រះជន្ម ២២ វស្សា គង់នៅវត្តតាសេក, ទី៣-ព្រះតេជគុណ ថាច់ ធឿង ព្រះជន្ម ២៥ វស្សា, ទី៤-ព្រះតេជគុណ លី សឿង ព្រះជន្ម ៣២ វស្សា គង់នៅវត្តទឹកប្រៃ និងទី៥-ព្រះតេជគុណ យ៉ាន់ តូន ព្រះជន្ម ២៦ វស្សា គង់នៅវត្តការន្ត ខេត្តព្រែកឫស្សី ។
អតីតសង្ឃខ្មែរក្រោមទាំង ៥ អង្គនេះត្រូវបានក្រុមអាជ្ញាធរយួនចាប់ផ្សឹកកាលពីថ្ងៃទី ២៣ ខែកុម្ភៈ ឆ្នាំ ២០០៧ និងបានដាក់គុកអស់រយៈកាលជាងមួយឆ្នាំ បានរត់ភៀសខ្លួនទៅដល់ប្រទេសថៃកាលពីថ្ងៃទី ២០ មេសា ក្រោយពីបានដាក់ជើងជាន់ទឹកដីកម្ពុជាមុននោះប្រមាណ ៣ ថ្ងៃ ។
អតីតសង្ឃមួយអង្គ បានឲ្យដឹងថាបន្ទាប់ពីបានទៅប្រទេសកម្ពុជា ពួកគេបានលាក់ខ្លួននៅកន្លែងមួយ ប៉ុន្តែក្រោយពីទទួលដំណឹងថា មាននគរបាលខ្មែរ និងយួនតាមរុករកចាប់ខ្លួនបញ្ជូនពួកគេត្រឡប់ទៅកម្ពុជាក្រោមវិញ ពួកគេបាននាំគ្នាទៅជួបក្រុមមន្ត្រីសិទ្ធិមនុស្ស នៃអង្គការក្រៅរដ្ឋាភិបាលដើម្បីឲ្យជួយធ្វើអន្តរាគមន៍ ។ ហើយក្រុមសិទ្ធិមនុស្សទាំងនោះក៏បាននាំពួកគេទៅប្រទេសថៃ ។
លោក គឹម មឿន បានប្រាប់ឲ្យដឹងពីប្រទេសថៃថា ពួកគេទាំង ៥ នាក់កំពុងតែសុំសិទ្ធិជ្រកកោនពីឧត្តមស្នងការ អង្គការសហប្រជាជាតិទទួលបន្ទុកជនភៀសខ្លួន ឬកាត់ថា UNHCR នៅប្រទេសថៃ ។ ហើយមកដល់ពេលនេះ ពួកគេទើបនឹងទទួលបានលិខិតបញ្ជាក់បណ្តោះអាសន្ន ដើម្បីរង់ចាំពេលសម្ភាសន៍ និងផ្តល់ឋានៈជាជនភៀសខ្លួនស្របច្បាប់ ។
គួររំលឹកជូនថា អតីតសង្ឃទាំង ៥ អង្គនេះ ត្រូវបានអាជ្ញាធរយួនចាប់ផ្សឹក បន្ទាប់ពីបានដឹកនាំព្រះសង្ឃប្រមាណជាង ២០០ អង្គ ធ្វើបាតុកម្មនៅមុខសាលាបាលីខេត្តឃ្លាំង នាថ្ងៃទី ០៨ កុម្ភៈ ឆ្នាំ ២០០៧ ។ ដោយក្រុមព្រះសង្ឃជនជាតិដើមខ្មែរកម្ពុជាក្រោមទាំងនេះអះអាង បាតុកម្មដោយសន្តិវិធីនេះគឺដើម្បីទាមទារសិទ្ធិសេរីជំនឿ ៕.