មន្ត្រីឃ្លាំមើលសិទ្ធិមនុស្សមានមូលដ្ឋាននៅខេត្តរតនគិរីឲ្យដឹង ថា ស្ត្រីជនជាតិខ្មែរកម្ពុជាក្រោមម្នាក់បានភៀសខ្លួនចេញពីប្រទេស វៀតណាមចូលមកខេត្តរតនគិរីដើម្បីស្វែងរកសិទ្ធិជ្រកកោនផ្នែកនយោបាយ។
ស្រ្តីខ្មែរក្រោមនោះមានឈ្មោះ ថាច់ ធីផៃ អាយុ៥៨ឆ្នាំ រស់នៅភូមិថាឡា ឃុំង៉ុកបៀង ស្រុកត្រាគូ ខេត្តត្រាវិញ។
មន្ត្រីស៊ើបអង្កេតសមាគមអាដហុកខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ថា ស្រ្តីខ្មែរក្រោមបានមកដល់ការិយាល័យសមាគមអាដហុកខេត្តរតនគិរីកាលពី ថ្ងៃអាទិត្យសប្តាហ៍មុនបន្ទាប់ពីបានគេនាំឆ្លងដែនចូលមកដល់ ក្រុងបានលុងដើម្បីសុំឲ្យអង្គការសិទ្ធិមនុស្សរបស់លោកជួយស្វែងរក កិច្ចគាំពារសុវត្ថិភាព។
លោក ប៉ែន ប៊ុណ្ណា បានបញ្ជាក់ថា ៖ «ឥឡូវប្រហែលជាគាត់ធ្វើដំណើរទៅភ្នំពេញ ប៉ុន្តែស្ថិតក្នុងការតាមដានពីអង្គការសិទ្ធិមនុស្សយើង»។
ក្នុងបទសម្ភាសន៍ជាមួយវិទ្យុអាស៊ីសេរីកាលពីថ្ងៃអង្គារ ទី៩ មិថុនានេះ ស្រ្តីឈ្មោះ ថាច់ ធីផៃ មានប្រសាសន៍បញ្ជាក់ពីមូលហេតុនៃការរត់ភៀសខ្លួន។
ស្ត្រីឈ្មោះ ថាច់ ធីផៃ បានឲ្យដឹងថា ៖ «គេវ៉ៃកូនខ្មែរងាប់ ខ្ញុំថតរូបបានខ្ញុំផ្ញើទៅគ្រូបង្រៀននៅអាមេរិកឲ្យគាត់ជួយ អធិដ្ឋានឲ្យកូនខ្មែរក្រោមឲ្យមានសេរីភាព ឲ្យមានសិទ្ធិ។ ដល់ឥឡូវគេថា ខ្ញុំហ៊ានប្ដឹងដល់សហរដ្ឋ រំលងច្បាប់គេ ខ្ញុំត្រូវបង្ហាញមុខចូលគុក ហើយគេរកចាប់ ខ្ញុំរត់ទៅមនុស្សច្រើនកន្លែងណាស់»។
មន្ត្រីការងារមូលដ្ឋានការិយាល័យឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន (UNHCR) មានមូលដ្ឋាននៅប្រទេសកម្ពុជា លោក ជុង រ៉ាវុឌ្ឍ មានប្រសាសន៍ថា ជនជាតិខ្មែរក្រោមត្រូវបានច្បាប់នៃប្រទេសកម្ពុជាទទួលស្គាល់ថាជា ពលរដ្ឋខ្មែរដូច្នេះ UNHCR មិនអាចទទួលពួកគេជាជនភៀសខ្លួននៅលើទឹកដីកម្ពុជាបានឡើយ។
លោក ជុង រ៉ាវុឌ្ឍ បានមានប្រសាសន៍ថា ៖ «ដែលហៅថាជនភៀសខ្លួនទាល់តែគាត់ឆ្លងទៅប្រទេសផ្សេង ហ្នឹងបានយើងអាចចាប់ផ្ដើមធ្វើការបាន»។
នាយកប្រតិបត្តិសមាគមសិទ្ធិមនុស្សដើម្បីខ្មែរកម្ពុជាក្រោម លោក អាង ចាន់រិទ្ធ មានប្រសាសន៍ថា ស្រ្តីខ្មែរក្រោមនោះបានទាក់ទងមកអង្គការលោកដើម្បីអន្តរាគមន៍ ស្វែងរកកិច្ចការពារសុវត្ថិភាពគាត់ជាចម្បង។
លោក អាង ចាន់រិទ្ធ បានឲ្យដឹងថា ៖ «យើងនឹងទាក់ទងជាមួយខាង រដ្ឋាភិបាលយើងដែរ ខាងអាជ្ញាធរដែលពាក់ព័ន្ធដើម្បីអាចជួយការពារសុវត្ថិភាពគាត់ជាមុន សិន ហើយនិងធ្វើការស៊ើបអង្កេតឲ្យបានច្បាស់លាស់ថាតើគាត់ភៀសខ្លួនឬក៏ គាត់រត់មកពីក្រោមហ្នឹងដោយសាររឿងស្អី?»។
វិទ្យុអាស៊ីសេរីមិនអាចទាក់ទងមន្ត្រីអាជ្ញាធរវៀតណាមដើម្បី អធិប្បាយបញ្ហានេះបានទេ ប៉ុន្តែមន្ត្រីក្រសួងមហាផ្ទៃនៃប្រទេសកម្ពុជាធ្លាប់បានផ្តល់កិច្ច សម្ភាសន៍ជាមួយវិទ្យុអាស៊ីសេរីកន្លងទៅដោយចាត់ទុកករណីភៀសខ្លួនរបស់ ខ្មែរក្រោមថាជាចលនាធ្វើឲ្យបែកបាក់ដល់ចំណងមិត្តភាពកម្ពុជានិង វៀតណាម។
របាយការណ៍របស់សមាគមសិទ្ធិមនុស្សដើម្បីខ្មែរកម្ពុជាក្រោមឲ្យដឹង ថា រហូតមកដល់បច្ចុប្បន្នការរត់ភៀសខ្លួនរបស់ខ្មែរក្រោមនៅតែមាន ហើយសមាគមកំពុងជំរុញឲ្យមានការយកចិត្តទុកដាក់ពីរាជរដ្ឋាភិបាល កម្ពុជាដើម្បីជួយដល់បញ្ហាខ្មែរក្រោមទាំងនោះ៕
អត្ថបទវិទ្យុអាស៊ីសេរី.
