ស្រី្តខែ្មរក្រោមម្នាក់បានរត់ភៀសខ្លួនពីការគាបសង្កត់និងការ តាមចាប់ខ្លួនរបស់អាជ្ញាធរវៀតណាម មកកាន់ប្រទេសកម្ពុជាដើម្បីលាក់ខ្លួន។
ស្រ្តីខែ្មរកម្ពុជាក្រោមម្នាក់បានរត់ភៀសខ្លួនពីស្រុកបាយឆៅ ខេត្តឃ្លាំង អតីតទឹកដីខែ្មរកម្ពុជាក្រោមដែលកំពុងកាន់កាប់ដោយវៀតណាមនោះ បានមកដល់ប្រទេសកម្ពុជាកាលពីពេលថ្មីៗនេះ ដើម្បីលាក់ខ្លួនក្រោយពីការតាមចាប់ដោយនគរបាលវៀតណាម ដោយសារអ្នកស្រីនិងគ្រួសារខែ្មរកម្ពុជាក្រោមដទៃទៀតបានងើបតវ៉ា ទាមទារដីធ្លីកន្លងមក។
ស្រ្តីខែ្មរកម្ពុជាក្រោមឈ្មោះ ថាច់ ភីបើ អាយុ៦៧ឆ្នាំ មកពីភូមិខ្នងកញ្ជើ ឃុំថាមដូង ស្រុកឆាយឆៅ ខេត្តឃ្លាំង ដែលបានភៀសខ្លួនមកដល់ប្រទេសកម្ពុជាកាលពីពេលថ្មីៗនេះ បានថែ្លងប្រាប់វិទ្យុអាស៊ីសេរីតាមទូរស័ព្ទថា មានក្រុមនគរបាលវៀតណាមចំនួនប្រមាណ១០នាក់តែងតែតាមឃ្លាំមើល សកម្មភាពរបស់អ្នកស្រីនិងគ្រួសារខែ្មរកម្ពុជាក្រោមដទៃទៀតជា រៀងរាល់ថៃ្ងចាប់តាំងពីខែតុលាមក។
អ្នកស្រី ថាច់ ភីបើ បានឲ្យដឹងថា ៖ «ដើម្បីគេចខ្លួន ខ្ញុំខ្លាចវាពេក វាបង្កប់ខ្លួនជុំវិញផ្ទះខ្ញុំរាល់ថ្ងៃ ខ្ញុំអត់ដឹង ទាល់តែគេប្រាប់បានខ្ញុំដឹង»។
សុខ សេរី ៖ គេតាមចាប់? ថាច់ ភីបើ ៖ ចាស។ បើឲ្យខ្ញុំទៅផ្ទះ… គេតាម ឲ្យខ្ញុំចេះតែទៅរាល់តែថ្ងៃហ្នឹង គ្រប់បួនថ្ងៃឲ្យដំណឹងគេដឹង គេឲ្យលេខទូរស័ព្ទ។ គេបង្កប់ខ្លួនជុំវិញផ្ទះ ខ្ញុំអត់ដឹង ទាល់តែឮសូរគេប្រាប់។
សុខ សេរី ៖ បង្កប់ប៉ុន្មានថ្ងៃហើយ? ថាច់ ភីបើ ៖ ២ខែហើយ ពីខែ១០មក។ សុខ សេរី ៖ កន្លងមកលោកយាយធ្វើអីបានជាគេតាមចាប់ខ្លួនលោកយាយ? ថាច់ ភីបើ ៖ ខ្ញុំឡើងទៅទាមទារទឹកដីនៅព្រែកឫស្សី។
ព្រះភិក្ខុសង្ឃ ថាច់ សូភី ជាអ្នកនាំពាក្យនៃសហព័ន្ធខែ្មរកម្ពុជាក្រោមពិភពលោកប្រចាំក្នុង ប្រទេសកម្ពុជា ដែលបានដឹងរឿងនេះ បានមានដីកាថា ៖ «គាត់គ្មាន បំណងទៅប្រទេសទី៣ទេ គ្រាន់តែគេចឲ្យផុតពីកណ្ដាប់ដៃដែករបស់យួនក្នុងការគាបសង្កត់ ចំពោះគ្រួសារគាត់ និងគ្រួសារលោក ប៊ុនបា ហើយជាពិសេសមានគ្រួសារបងងៀ បងហៀង និងបងប្អូនជាច្រើន…»។
ការរត់ភៀសខ្លួនរបស់ស្រ្តីចំណាស់ខែ្មរកម្ពុជាក្រោមខាងលើនេះ ដោយសារតែលោកស្រីនិងគ្រួសារខែ្មរកម្ពុជាក្រោមដទៃទៀតសរុប៧០ គ្រួសារ បានងើបតវ៉ានៅក្នុងក្រុងព្រែកឫស្សីទាមទារដីធ្លីកសិកម្មចំនួន ប្រមាណជាង៤០០ហិកតារមកឲ្យពួកគាត់វិញ កាលពីឆ្នាំ២០០៥កន្លងទៅ ក្រោយពីដីធ្លីនោះរងការរឹបយកដោយអាជ្ញាធរមូលដ្ឋានវៀតណាមនៅទី នោះចាប់តាំងពីឆ្នាំ១៩៨១មក។
នៅមិនទាន់មានការបញ្ជាក់ណាមួយនៅទ្បើយទេពីមន្រ្តីនៃស្ថានទូត វៀតណាមនៅក្នុងប្រទេសកម្ពុជា ឬអាជ្ញាធរមូលដ្ឋានវៀតណាម ជុំវិញស្ថានការណ៍រស់នៅរបស់គ្រួសារខែ្មរកម្ពុជាក្រោមទាំងនោះ។
លិខិតចំហមួយចុះថៃ្ងទី២៤ ខែវិច្ឆិកាថ្មីៗនេះ ដោយលោក ថាច់ ចាន់សុវៃ ដែលវិទ្យុអាស៊ីសេរីទទួលបាន លិខិតនោះបាននិយាយថា លោក ហ្វិន បា ខ្មែរកម្ពុជាក្រោមដែលរដ្ឋាភិបាលវៀតណាមបានចាប់ខ្លួនដាក់គុកកាលពី ពេលកន្លងទៅដោយសារតែការទាមទារដីធ្លីនោះ កំពុងតែរងការបង្អត់បាយ រាងកាយស្គមស្គាំងនិងស្លេកស្លាំង៕
ប្រភពពីវិទ្យុអាស៊ីសេរី.
