បទភ្លេងប្រពៃណី
ទំនុកច្រៀង សឺង សម្រេច
ច្រៀងដោយ កៀង ចំរើន
១ សំពៅថយហើយ ថយក្រោយចោលកេរដូនតា (ៗ)
ចោលដី ចោលជាតិខេមរា ឲ្យរស់ក្នុងដៃសត្រូវ
ចោលឲ្យខ្មែរក្រោមរស់នៅ ក្នុងក្តីកំសត់វេទនា។
២ ខ្មែរថយចោលកម្ពុជាក្រោម អោយខ្ញុំរស់នៅខ្លោចផ្សា (ៗ)
ក្រោមនឹម បរទេសត្រួតត្រា ផ្តន្ទា រងទុក្ខកន្លង
គេចោទ គេចាប់ គេចង បាត់បង់ អស់សិទ្ធិសេរី។
៣ សំពៅថយហើយ ថយចោលប្អូនបងប្រុសស្រី(ៗ)
ឲ្យគេ រំលោភជាន់ឈ្លី ញាំញីរាប់រយខែឆ្នាំ
ទួញសោក យំយែកផ្តែផ្តាំ រង់ចាំតែក្តីមេត្តា ។
៤ សំពៅថយហើយ ថយចោលទឹកដីកម្ពុជា (ៗ)
ខ្មែរក្រោម កំព្រារងារ វប្បធម៌ ត្រូវគេក្រឡៃ
ខ្មែរអឺយ ត្រូវខំកែឆ្នៃ ថែជាតិឲ្យបានគង់វង្ស។
៥ សំពៅថយហើយ ថយចោលសាច់ឈាមប្អូនបង (ៗ)
ថយចោល ទ្រនំបង្គង ថយឆ្លង ប្រវត្តិសាវតា
ងាកផង ងាកមើលគ្នីគ្នា មើលក្រោយ អាសូរឈាមខ្មែរ៕
អត្ថាធិប្បាយ បទសំពៅថយ
សំពៅខ្មែរថយហើយ! ថយគ្មានវិលងាកមើលក្រោយវិញទេ!
ថយចោលដីកេរមត៌កដែលបុព្វការីជនបានខំរក្សាទុកមកយូរអង្វែងឆ្នាំ។
សំពៅខ្មែរថយហើយ! ថយចោលពួកខ្ញុំជាខ្មែរក្រោម ទុកឲ្យរស់នៅតាមយថាកម្ម ក្រោម កណ្តាប់ដៃដែក នៃការត្រួតត្រារបស់បរទេសយួន ឲ្យគេធ្វើបាបចាប់ចង កាប់សម្លាប់តាមទំនើងចិត្ត!
ពិតមែនហើយ ថាព្រំដែនមួយបានត្រូវពុះកាត់ទឹកដីខ្មែរ និងសាច់ឈាមខ្មែរ ឲ្យទៅបរទេស កាន់កាប់ ប៉ុន្តែតើក្តីឈឺចាប់អាចកើតមានចំពោះខ្មែរក្នុងប្រទេសឯករាជដែរឬទេ ? នៅពេលដែល សាច់ឈាមខ្លួនខាងម្ខាងព្រំដែនទៀត ត្រូវគេធ្វើបាបចាប់ចងយ៉ាងរំលោភបំពាននោះ?
ឳ ! សំពៅខ្មែរ មិនគួរថយចោលគ្នា ដោយគ្មានងាកមើលក្រោយយ៉ាងនេះសោះ !
ពាក្យសុភាសិតបូរាណខ្មែរបានពោលថា ក្តិចត្រចៀករលង់ទឹកភ្នែក។ ចុះហេតុអ្វី ត្រចៀកខ្មែរ ត្រូវគេក្តិចរហូតហូរឈាមរហាមទៅហើយ ទឹកភ្នែកខ្មែរមិនឃើញស្រក់សោះ ?
អនិច្ចាខ្មែរក្រោម! គ្មានអ្វីក្រៅពីខ្លួនទីពឹងខ្លួនឡើយ គឺត្រូវតែរួមគ្នាតស៊ូមតិ ដើម្បីទាមទារសិទ្ធិ សេរីភាព ជាជនជាតិដើមនៅលើទឹកដីកម្ពុជាក្រោមរបស់យើង !
តស៊ូឡើងបងប្អូនអឺយ ! យើងមិនត្រូវស្លាប់ទេ !
