បណ្ដាសាខារបស់សហព័ន្ធខ្មែរកម្ពុជាក្រោម រួមគ្នាជា មួយប្រជាពលរដ្ឋខ្មែរនៅក្រៅប្រទេស បានរៀបចំពិធី រំលឹកខួប ៦២ឆ្នាំ ដែលប្រជាជាតិខ្មែរបាត់បង់ដែនដី កម្ពុជាក្រោម។ សាខាសហព័ន្ធខ្មែរកម្ពុជាក្រោម ប្រចាំ រដ្ឋ New Jersey និងរដ្ឋ Pennsylvania នៅសហ រដ្ឋអាមេរិក កាលពីថ្ងៃអាទិត្យម្សិលមិញ បានរួមគ្នា រៀបចំពិធីរំលឹកខួប ៦២ឆ្នាំដែរ នៃការបាត់បង់ដែនដី កម្ពុជាក្រោម គឺធ្វើនៅរដ្ឋ Pennsylvania ជួបជុំគ្នា នៅឯវត្តសាមគ្គីធារារាម នៅទីក្រុងខែនឌិន (Kenden)។ លោក លី រិទ្ធ ប្រធានសាខាសហព័ន្ធខ្មែរកម្ពុជាក្រោម ប្រចាំរដ្ឋ New Jersey បានថ្លែងសន្ទរកថា នៅក្នុងពិធីរំលឹកដល់ប្រជាពលរដ្ឋខ្មែរ និងខ្មែរក្រោមជាទូទៅ អំពីខ្មែរជាម្ចាស់ដែនដីកម្ពុជាក្រោម៖ «ខ្មែរជាម្ចាស់ដែនដីដែលយួនហៅថា ណាមបូ នៅឡើយ ហើយសភារបស់យើងកាលណោះ ក៏ត្រូវបានអង្គការសហប្រជាជាតិទទួលស្គាល់ដែរ»។
លោកស្រី សឺង ធីនិត ប្រធានផ្នែកទទួលបន្ទុកកិច្ចការស្ត្រីនៃសាខាសហព័ន្ធខ្មែរកម្ពុជា ក្រោម ប្រចាំទីក្រុងហ្វីឡាដែលហ្វ្យា រដ្ឋ Pennsylvania សហរដ្ឋអាមេរិក មានប្រសាសន៍ថា ភ្ញៀវកិត្តិយសដែលចូលរួមស្ដាប់សន្ទរកថានេះ មានទាំងអស់ជាង ៧០នាក់ រួមទាំងព្រះសង្ឃ ៨អង្គផង។ ក្នុងនោះ ២អង្គមកពីប្រទេសកម្ពុជា ១ អង្គមកពីប្រទេសឥណ្ឌា និង២អង្គទៀតមកពីប្រទេសស៊ុយអែត ដែលបានចូលរួមក្នុងពិធីបុណ្យរំលឹកខួបនៃ ការបាត់បង់ដែនដីកម្ពុជាក្រោម ៖ «ថ្ងៃនេះមិនមែនជាថ្ងៃធម្មតា ទេ គឺជាថ្ងៃដែលខ្មែរកាន់ទុក្ខ និងប្រាប់ដល់កូនខ្មែរជំនាន់ក្រោយថា កម្ពុជាក្រោមជាដែនដីរបស់ខ្មែរ»។
លោក ត្រឹង យ៉ាប់ ប្រធានផ្នែករដ្ឋបាលនៃសហព័ន្ធខ្មែរកម្ពុជាក្រោម មានប្រសាសន៍ថា ពិធីបុណ្យនៅរដ្ឋ Pennsylvania កាលពីថ្ងៃអាទិត្យនោះ រៀបចំឡើងពីម៉ោង ១០ព្រឹក ដល់ម៉ោង ១រសៀល តាមរបៀបព្រះពុទ្ធសាសនា និងមានការថ្លែងសន្ទរកថាពីចាស់ព្រឹទ្ធាចារ្យ និងពីតំណាងសហព័ន្ធរំលឹកអំពី ប្រវត្តិនៃការបាត់បង់ទឹកដីកម្ពុជាក្រោម។ កាលពីថ្ងៃអាទិត្យនោះដែរ សាខានៃសហព័ន្ធខ្មែរកម្ពុជាក្រោមនៅទីក្រុង Long Beach នៃរដ្ឋ California នៅទីក្រុង Tacoma នៃរដ្ឋ Washington សហរដ្ឋអាមេរិក ក៏បានរៀបចំរំលឹកថ្ងៃខួបប្រវត្តិសាស្ត្រនេះដែរ។
ចំណែកសាខានៃសហព័ន្ធខ្មែរកម្ពុជាក្រោម នៅទីក្រុង Victoria នៃប្រទេស Canada ក៏គ្រោងនឹងរៀបចំរំលឹកថ្ងៃខួបនេះ នៅថ្ងៃសៅរ៍។ រីឯសាខានៃសហព័ន្ធខ្មែរកម្ពុជាក្រោមនៅរដ្ឋ Georgia សហរដ្ឋអាមេរិក ក៏គ្រោងនឹងប្រារព្ធរំលឹកខួបនេះនៅថ្ងៃអាទិត្យ ទី១២ ខែមិថុនាខាងមុខនេះ៕ ប្រភពព័ត៌មានៈ វិទ្យុអាស៊ីសេរី.
