សហព័ន្ធខ្មែរកម្ពុជាក្រោមបានប្រកាសថា គេនឹងបើកយុទ្ធនាការអហិង្សាជាបន្តបន្ទាប់ប្រឆាំងនឹងការរំលោភសិទ្ធិមនុស្សនៅឯដែនដីកម្ពុជាក្រោម។
លោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោម មានប្រសាសន៍ឲ្យវិទ្យុអាស៊ីសេរីដឹងថា ចាប់ពីខែមីនាខែនេះរហូតដល់ខែមិថុនា ឆ្នាំ២០០៩ សហព័ន្ធខ្មែរកម្ពុជាក្រោមនឹងរៀបចំធ្វើយុទ្ធនាការសំខាន់ៗដែលរួមមាននៅថ្ងៃសៅរ៍ ទី២១ ខែមីនានេះ ចាប់ពីម៉ោង៩ព្រឹកដល់ម៉ោង៤ល្ងាច សហព័ន្ធខ្មែរកម្ពុជាក្រោមនឹងរៀបចំធ្វើពិធីបុណ្យរំឭកព្រះវិញ្ញាណក្ខន្ធ ព្រះវិរសមណ្ណៈ និងវិរបុរសជាតិ រៀបចំធ្វើនៅវត្តរតនមណ្ឌលនៅទីក្រុង Fresno នៃរដ្ឋកាលីហ្វ័រញ៉ា សហរដ្ឋអាមេរិក។
ព្រះតេជគុណ សឺង យ៉ឹងរតនា ជានាយកវិទ្យុសំឡេងកម្ពុជាក្រោមនិងជាចាងហ្វាយកាសែតព្រៃនគររបស់សហព័ន្ធខ្មែរកម្ពុជាក្រោមមានដីកាឲ្យវិទ្យុអាស៊ីសេរីដឹងបន្ថែមអំពីយុទ្ធនាការអហិង្សានាថ្ងៃសៅរ៍នេះដែលរំពឹងថានឹងមានអ្នកចូលរួមជិត២០០នាក់។
ព្រះតេជគុណ សឺង យ៉ឹងរតនា បានមានដីកាថា ៖ «កម្មវិធីធ្វើនៅថ្ងៃសៅរ៍ ទី២១ ធ្វើនៅទីក្រុង Fresno គឺខាងបងប្អូនខ្មែរក្រោមហើយនិងបងប្អូនខ្មែរនៅទីនោះរៀបចំពិធីបុណ្យរំឭកខួបព្រះវិញ្ញាណក្ខន្ធនិងវិញ្ញាណក្ខន្ធវិរសមណ្ណៈនិងវិរបុរសដែលបានស្នេហាជាតិ បាត់បង់ទៅវិញហ្នឹង។ នៅទីនោះមានកម្មវិធីការឃោសនារបស់សហព័ន្ធខ្មែរកម្ពុជាក្រោម នៅក្នុងនោះក៏មានលោកប្រធាន ថាច់ ង៉ុកថាច់ ទៅចូលរួមផ្ទាល់ដើម្បីពន្យល់អំពីទិសដៅឬក៏ការស្វែងរកសិទ្ធិសម្រេចវាសនាខ្លួនដោយខ្លួនឯងនៅទីក្រុងប្រេស្នូនោះ»។
សហព័ន្ធខ្មែរក្រោមនឹងរៀបចំកិច្ចប្រជុំពិសេសនៅទីក្រុង Sanjose
លុះដល់ថ្ងៃអាទិត្យ ទី២២ ខែមីនានេះដែរ សហព័ន្ធខ្មែរកម្ពុជាក្រោមនឹងរៀបចំកិច្ចប្រជុំពិសេសមួយទៀត ប៉ុន្តែធ្វើនៅឯវត្តខេមរង្សី នៃទីក្រុង Sanjose នៃរដ្ឋកាលីហ្វ័រញ៉ា សហរដ្ឋអាមេរិក ដែលនឹងមានសកម្មជននិងឥស្សរជនរបស់សហព័ន្ធពីតាមតំបន់នានានៅទូទាំងរដ្ឋកាលីហ្វ័រញ៉ាទៅចូលរួមដែរដែលមានចំនួនទាំងអស់ប្រមាណជិត៤០នាក់។
ព្រះតេជគុណ សឺង យ៉ឹងរតនា មានដីកាឲ្យវិទ្យុអាស៊ីសេរីដឹងបន្ថែមថា កិច្ចប្រជុំនៅថ្ងៃអាទិត្យ ទី២២ ខែមីនានេះ នឹងរៀបចំឡើងចាប់ពីម៉ោង១ដល់ម៉ោង៤រសៀល។
ព្រះតេជគុណ ស៊ឺង យ៉ឹងរតនា បានមានដីកាថា ៖ «ថ្ងៃអាទិត្យ ទី២២ នៅទីក្រុងSanjose នៃវត្តខេមរង្សីហ្នឹងក៏មានកិច្ចពិភាក្សាអំពីបញ្ហាខ្មែរក្រោមដែលស្លាប់ក្នុងជំនាន់ខ្មែរក្រហម។ កិច្ចពិភាក្សានោះក៏មានឌុកទ័រមកពីស្ទេនផតផងដែរ។ ឌុកទ័រហ្នឹងគាត់សរសេរអំពីរឿងខ្មែរក្រោមដែលស្លាប់នៅក្នុងរបបខ្មែរក្រហមហ្នឹង»។
លោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោម មានប្រសាសន៍ឲ្យដឹងបន្ថែមថា ជំនួបនាថ្ងៃអាទិត្យនេះនឹងផ្តោតអំពីសោកនាដកម្មរបស់ពលរដ្ឋខ្មែរក្រោមក្នុងរបបខ្មែរក្រហមចន្លោះពីឆ្នាំ១៩៧៥ដល់ឆ្នាំ១៩៧៩ ពិភាក្សាអំពីថាតើមូលហេតុអ្វីបានជាខ្មែរក្រោមត្រូវបានសម្លាប់ផ្តាច់ពូជរាប់ពាន់គ្រួសារនាសម័យនោះនិងអំពីលទ្ធភាពរបស់ពលរដ្ឋខ្មែរក្រោមក្នុងការចូលរួមដំណើរការកាត់ទោសអតីតមេដឹកនាំខ្មែរក្រហមនៅឯប្រទេសកម្ពុជា។
សូមរំឭកជូនថា សហព័ន្ធខ្មែរកម្ពុជាក្រោមធ្វើយុទ្ធនាការជាបន្តបន្ទាប់នេះដោយផ្តើមចាប់ពីខែមីនានេះរហូតដល់ខែមិថុនា ឆ្នាំ២០០៩។
ក្នុងរយៈពេលនេះដែរសហព័ន្ធខ្មែរកម្ពុជាក្រោមគ្រោងនឹងធ្វើមហាបាតុកម្មអហិង្សាពិសេសមួយនៅថ្ងៃទី៨ ខែឧសភា ឆ្នាំ២០០៩ខាងមុខនេះ នៅចំពេលនិងនៅមុខអគារដែលក្រុមប្រឹក្សាសិទ្ធិមនុស្សនៃអង្គការសហប្រជាជាតិកោះអញ្ជើញរដ្ឋាភិបាលនៃរបបសាធារណរដ្ឋសង្គមនិយមវៀតណាមឲ្យទៅបង្ហាញអំពីបញ្ហាសិទ្ធិមនុស្សនៅក្នុងប្រទេសវៀតណាមដោយថ្លែងនៅក្នុងកិច្ចប្រជុំពិសេសនៅឯទីក្រុងហ្សឺណែវ ប្រទេសស្វ៊ីស៕
អត្ថបទ៖ វិទ្យុអាស៊ីសេរី.
