ដោយ ថាច់ ប្រីជា គឿន l សារព័ត៌មាន ព្រៃនគរ
សហព័ន្ធខ្មែរកម្ពុជាក្រោមដែលមានមូលដ្ឋាននៅសហរដ្ឋអាមេរិក នឹងបន្តធ្វើការតស៊ូតាមផ្លូវច្បាប់ដោយ វិធីការទូតដើម្បី ស្វែងរក “សិទ្ធិសម្រេចវាសនាខ្លួនដោយខ្លួនឯង” ជូនពលរដ្ឋខ្មែរក្រោម នៅដែនដីកម្ពុជា ក្រោម ។ នេះបើតាមការ លើកឡើង របស់មន្ត្រីជាន់ខ្ពស់ នៃសហព័ន្ធខ្មែរកម្ពុជាក្រោម ដែលបានថ្លែងនៅ ទីក្រុងឡង់ប៊ិច រដ្ឋកាលីហ្វញ៉ា សហរដ្ឋអាមេរិក ក្នុងកិច្ច ប្រជុំ តែងតាំងគណៈកម្មការថ្មីសម្រាប់សាខាសហ ព័ន្ធខ្មែរកម្ពុជាក្រោម នៅក្នុងតំបន់មួយនេះ នៅថ្ងៃ ២ ខែកុម្ភៈ ឆ្នាំ ២០១៤ ។
ចុចស្ដាប់ សហព័ន្ធខ្មែរកម្ពុជាក្រោមតស៊ូតាមផ្លូវច្បាប់ដើម្បីទាមទារសិទ្ធិជូនពលរដ្ឋខ្មែរក្រោម
លោក ប្រាក់ សេរីវុឌ្ឍ អនុប្រធានសហព័ន្ធខ្មែរកម្ពុជាក្រោម បានថ្លែងនៅក្នុងកិច្ចប្រជុំនេះថា សហព័ន្ធខ្មែរ កម្ពុជាក្រោម នៅតែធ្វើការតស៊ូដើម្បីស្វែងរកសេរីភាពជូនពលរដ្ឋខ្មែរក្រោមដោយ “ប្រើប្រាជ្ញាប្រសើរជាងប្រើកម្លាំងបាយ” ។ លោកបញ្ជាក់ ថា ដោយសារសហព័ន្ធខ្មែរកម្ពុជាក្រោមប្រើច្បាប់នេះហើយ ទើបធ្វើឲ្យ រដ្ឋាភិបាលបក្សកុម្មុយនិស្តវៀតណាម ខ្លាចសហគមន៍ អន្តរជាតិផ្ដាច់សេដ្ឋកិច្ច ផ្ដាច់ជំនួយ ហើយដោះ លែងព្រះសង្ឃខ្មែរក្រោមចេញពីពន្ធនាគារទាំងបង្ខំ នាពេលកន្លងមក ។
លោក ប្រាក់ សេរីវុឌ្ឍ បានថ្លែងថា៖
“អាហ្នឹងហើយដែលយើងហៅថា Work smart than work hard ។ Work hard យើងទៅកាន់ កាំភ្លើង បាញ់យួនតាមព្រំដែន ដាក់គ្រាប់បែក គ្រាប់អ៊ី គេអត់គាំទ្រ គេចាប់យើងឲ្យយួនទៀត ។ ប៉ុន្តែបើយើង Work Smart យើងទាក់ទងតាមផ្លូវច្បាប់ អន្តរជាតិ…..” ។
ថ្លែងនៅក្នុងកិច្ចប្រជុំនេះដែរ លោក ប្រាក់ សេរីវុឌ្ឍ ក៏បានរំឭកអំពីអត្ថន័យនៃកិច្ចប្រជុំ UPR របស់ក្រុម ប្រឹក្សាសិទ្ធិមនុស្សនៃ អង្គការសហប្រជាជាតិ នាទីក្រុង ហ្សឺណែវ ប្រទេសស្វិស ផងដែរ ។ លោកបញ្ជាក់ ថា UPR គឺជាកិច្ចប្រជុំមួយរបស់អង្គការ សហប្រជាជាតិធ្វើឡើងរៀងរាល់ ៤ ឆ្នាំម្ដង សម្រាប់ឲ្យប្រទេស នានាក្នុងពិភពលោកដែលបានចុះហត្ថលេខាជាមួយ UPR ឡើងការពាររបាយការសិទ្ធិមនុស្សរបស់ខ្លួន ក្នុងនោះមានប្រទេសវៀតណាមផងដែរ ។ លោក ប្រាក់ សេរីវុឌ្ឍ បានបន្ត ទៀតថា នៅក្នុងកិច្ចប្រជុំ UPR ឆ្នាំនេះ សហព័ន្ធខ្មែរកម្ពុជាក្រោមបានផ្ញើ របាយការណ៍ស្ដីពីការរំលោភ សិទ្ធិមនុស្សលើពល រដ្ឋខ្មែរក្រោមរួច ហើយៗ ក្រុមប្រឹក្សាសិទ្ធិមនុស្សនឹងសួរទៅរដ្ឋាភិបាលវៀតណាម អំពីការដែលវៀតណាមបានចាប់ព្រះ សង្ឃ និងពលរដ្ឋខ្មែរក្រោម ដាក់ពន្ធនាគារនៅពេលថ្មីៗនេះ ជាមិនខាន ។
លោក ប្រាក់ សេរីវុឌ្ឍ បានថ្លែងថា៖
“នៅពេលដែលគេសួរយួនហ្នឹងយួនត្រូវដោះស្រាយ ថា ឥឡូវ ម៉េចហែងបានចាប់ព្រះ សង្ឃខ្មែរ ក្រោម នៅវត្ត តាសេកដាក់គុក វៃច្រកបាវចឹង យួនត្រូវឆ្លើយហើយ ។ ហើយ អ្នក ដែលសួរ ចម្លើយ យួនហ្នឹង មិនមែនខ្មែរ ក្រោម យើងទៅសួរបានទេ យើងគ្មាន សិទ្ធិទេ ប៉ុន្តែយើង មានសិទ្ធិចូលប្រជុំ យើងបានផ្ដល់ព័ត៌មានឲ្យ អ្នកឯកទេសនៅក្នុងអង្គការសហប្រជាជាតិ ជាប្រទេស សមាជិកដែរនោះ ជាប្រទេសមានសិទ្ធិជាអ្នកសួរ សំនួរនោះ ហើយ បណ្ឌិត Joshua Cooper គាត់ បានទៅ ទាក់ទង ប្រទេសទាំងនោះ ឲ្យយើងហើយស្រេច” ។
សូមបញ្ជាក់ នៅថ្ងៃទី ០២ ខែកុម្ភៈ នេះ គណៈកម្មការនាយកសហព័ន្ធខ្មែរកម្ពុជាក្រោម បានជួបជុំគ្នានៅ វត្តកម្ពុជាក្រោម ឋិត នៅ ក្នុងទីក្រុងឡងប៊ិច រដ្ឋកាលីហ្វញ៉ា ដើម្បីធ្វើបុណ្យផ្កាប្រាក់រៃអង្គាសថវិកាទៅក សាងសាលាបីជាន់ នៅវត្តសាមគ្គីរង្សី ឋិត នៅក្នុងទីក្រុងភ្នំពេញ តាមការអំពាវនាវរបស់សហព័ន្ធខ្មែរ កម្ពុជាក្រោម និងដើម្បីតែងតាំងគណៈកម្មការសាខា សហព័ន្ធខ្មែរ កម្ពុជាក្រោម ប្រចាំទីក្រុងឡុងប៊ុច ផង ដែរ ។ ក្នុងពិធីជួបជុំនេះ មានការចូលរួមពី លោក សឺង ហួរ អគ្គលេខាធិការនៃសហព័ន្ធ ខ្មែរកម្ពុជាក្រោម ព្រះតេជព្រះគុណ សឺង យ៉ឹងរតនា ប្រធាននាយកដ្ឋានព័ត៌មាននៃសហព័ន្ធខ្មែរកម្ពុជាក្រោម និងលោក ថាច់ តង ប្រធានតំបន់ភាគខាងលិចសហរដ្ឋអាមេរិក នៃសហព័ន្ធខ្មែរកម្ពុជាក្រោម ផងដែរ ។
ថ្លែងទៅកាន់អ្នកចូលរួម លោក សឺង ហួរ បានជម្រាបដល់អ្នកចូលរួមឲ្យបានជ្រាបអំពីផែនការឆ្នាំ ២០១៤ របស់សហព័ន្ធ ខ្មែរកម្ពុជាក្រោម ដែលទើបតែបានសម្រេចនៅក្នុងកិច្ចប្រជុំដំណាច់ឆ្នាំ ២០១៣ កន្លងទៅ នេះ ។ តាមការការបញ្ជាក់ របស់ លោក សឺង ហួរ ផែនការឆ្នាំ ២០១៤ របស់សហព័ន្ធខ្មែរកម្ពុជាក្រោម មាន ៣ ចំណុចធំ គឺ កិច្ចការអន្តរជាតិ កិច្ចការ នៅកម្ពុជាក្រោម និង កិច្ចការនៅកម្ពុជា និង តាមតំបន់ ។ ក្នុង ផែនការទាំងនេះ សហព័ន្ធខ្មែរកម្ពុជាក្រោម នឹងពង្រឹងទំនាក់ ទំនងសម្រាប់ ជួយសំឡេងសហព័ន្ធខ្មែរកម្ពុជាក្រោមឲ្យកាន់តែប្រសើរឡើង ដោយធ្វើការ និងចូលរួមជាដៃគូជាមួយ អង្គការ សិទ្ធិមនុស្ស អង្គការជន ជាតិដើម និង ក្រុមជនជាតិភាគតិចដទៃទៀតលើរាល់បញ្ហាណាសំខាន់ៗចំពោះខ្មែរក្រោម , ធ្វើសន្និបាត នៅក្នុងទីក្រុង បាងកក ប្រទេសថៃ, បង្កើនល្បឿនការប្តេជ្ញាចិត្តទាមទារវាសនាខ្លួនដោយខ្លួនឯង ដោយប្រើ គោល ដៅ សំអាងលើអង្គការ UNPO, សេចក្ដីប្រកាសជាសកលស្ដីពីសិទ្ធិមនុស្សអន្តរជាតិ និង សេចក្ដីប្រ កាសជាសកលស្ដីពី សិទ្ធិជនជាតិដើម ជាយន្តការយុទ្ធសាស្ត្រ , អនុវត្តយុទ្ឋសាស្ត្រ និងការងារប្រកប ដោយភាពឆ្លាតវៃ ជាមួយនឹងការទីភ្នាក់ ងារអន្តរ ជាតិ នៃអង្គការសហប្រជាជាតិ សហភាពអឺរ៉ុប និង អាស៊ាន ។
ដោយឡែក ចំពោះកិច្ចការនៅកម្ពុជាក្រោម លោក សឺង ហូរ បានបញ្ជាក់ថា ផែនការនេះ រួមមាន ការបង្កើតទំព័រ Facebook របស់សហព័ន្ធមួយដោយគណៈកម្មាធិការយុវជន ក្នុងគោលបំណងផ្សាយព័ត៌មាន និងជួយអប់រំ , អនុវត្តផែនការ បណ្ដុះបណ្ដាលយុវជនខ្មែរក្រោម ឲ្យមានសមត្ថភាពដើម្បីជំនួសតួនាទីរបស់គណៈកម្មការនាយក នៃសកម្មជនសហព័ន្ធ ខ្មែរ កម្ពុជាក្រោម, ការគ្រប់គ្រងហិរញ្ញវត្ថុ ការអនុវត្តធម្មតា និងទទួលខុសត្រូវក្នុងការអនុលោម តាមច្បាប់គណនេយ្យ ,ធ្វើឱ្យទាន់ សម័យសៀវភៅគម្រោង និង ចង ក្រងសៀវភៅ “នរណាជានរណានៅកម្ពុជាក្រោម” ។
លោក សឺង ហួរ បានថ្លែងថា៖
” ទីបី យើងត្រូវតែបង្កើនល្បឿនយើង ដើម្បីស្វែងរកនូវ សិទ្ធិសម្រេចវាសនាខ្លួន ដោយខ្លួនឯង ដោយយើង ធ្វើ ការជាមួយ អង្គការ UNPO យើងសំអាងទៅលើសិទ្ធិសេរីភាព របស់អង្គការសហ ប្រជាជាតិ….” ។
យោងតាមសៀវភៅមគ្គុទ្ទេស “ ផ្លូវទៅយកសិទ្ធិសម្រេចវាសនាខ្លួនដោយខ្លួនឯង” ដែលបានបោះពុម្ព ដោយសហព័ន្ធ ខ្មែរ កម្ពុជាក្រោម នៅឆ្នាំ ២០០៩ បានបញ្ជាក់អំពីទិសដៅនៃការតស៊ូរបស់សហព័ន្ធខ្មែរ កម្ពុជាក្រោមថា ធ្វើការ “ តស៊ូទាមទាម ឱ្យរដ្ឋាភិបាលវៀតណាមគោរពសិទ្ធិមនុស្ស សិទ្ធិរស់នៅដោយសុវត្ថិភាព សិទ្ធិរក្សាសាសនា វប្បធម៌ ទំនៀមទម្លាប់ ប្រពៃណី និង សិទ្ធិសម្រេចវាសនាខ្លួនដោយខ្លួនឯង របស់ខ្មែរក្រោម ដែលជាជនជាតិដើម នៅលើដែនដីកម្ពុជាក្រោម” ៕
