ដោយអនុវត្តផែនការគោលរបស់ខ្លួន នៅថ្ងៃអាទិត្យ ទី៣ ខែមីនា ឆ្នាំ២០១៣នេះ សម្ព័ន្ធសមណនិស្សិត-និស្សិតខ្មែរកម្ពុជាក្រោម ដែលមានមូលដ្ឋាននៅទីក្រុងភ្នំពេញ នៃព្រះរាជាណាចក្រកម្ពុជា បានប្រារព្ធពិធីបុណ្យផ្ការស្មីសាមគ្គី ដើម្បីប្រមូលថវិកាទ្រទ្រង់សមណនិស្សិត-និស្សិតខ្មែរកម្ពុជាក្រោម ក្នុងការសិក្សារៀនសូត្រប្រចាំឆ្នាំ២០១៣។ អង្គពិធីធ្វើឡើងនៅកុដិលេខ១៧ វត្តបទុមវតី សង្កាត់ចតុម្មុខ ខណ្ឌដូនពេញ រាជធានីភ្នំពេញ។ ការរៀបចំពិធីបុណ្យនេះឡើង គឺព្រោះតែភាពខ្វះខាត និងសេចក្ដីត្រូវការរបស់សមណនិស្សិត-និស្សិតខ្មែរកម្ពុជាក្រោម ដែលកំពុងសិក្សាទាំងនៅក្នុង និងក្រៅប្រទេស។
ពិធីបុណ្យផ្កានេះត្រូវបានផ្តើមគំនិតរៀបចំឡើងដោយក្រុមប្រឹក្សាភិបាល គណៈកម្មការ និងសមាជិក សមាជិកានៃសម្ព័ន្ធសមណនិស្សិត-និស្សិតខ្មែរកម្ពុជាក្រោម។ ព្រះតេជព្រះគុណ យឿង តារា ដែលជាប្រធានសម្ព័ន្ធសមណនិស្សិត និស្សិតខ្មែរកម្ពុជាក្រោម, ព្រះតេជព្រះគុណ ម៉ក់ សម្បូណ៌ ប្រធានកុដិលេខ១៧ វត្តបទុមវតី ព្រមទាំងពុទ្ធបរិស័ទទាំងក្នុង និងក្រៅប្រទេស។ រីឯកម្មវិធីបុណ្យមានដូចជា នៅពេលថ្ងៃត្រង់មានការប្រគេនចង្ហាន់ដល់ព្រះសង្ឃ ដើម្បីឧទ្ទិសកុសលជូនដល់បុព្វការីជន។ នៅវេលាម៉ោង២រសៀល ជួបជុំពុទ្ធបរិស័ទជិតឆ្ងាយ និងវេលាម៉ោង៤រសៀល ប្រារព្ធបទនមស្ការ សមាទាននិច្ចសីល និមន្តព្រះសង្ឃចម្រើនព្រះបរិត្ត និងអារាធនាធម្មកថិកសម្ដែងធម្មវិសេសទេសនាគ្រែពីរ និងទីបញ្ចប់នៃធម៌ទេសនា គឺការឧទ្ទិសភាគផលជាកិច្ចបង្ហើយបុណ្យ។ ពិធីបុណ្យមានមនុស្សប្រមាណជាជាងមួយពាន់នាក់ចូលរួម។
ព្រះតេជព្រះគុណ កែ អ៊ុក ដែលជាអនុប្រធានទី១ នៃសម្ព័ន្ធសមណនិស្សិត-និស្សិតខ្មែរកម្ពុជាក្រោម និងជាអង្គធម្មកថិកសម្ដែងធម៌ទេសនា ក្នុងងារជាព្រះអនុត្ថេរនោះ បានមានថេរដីកាក្នុងឱកាសសម្ដែងធម៌ទេសនាថា ការធ្វើបុណ្យផ្កានេះគឺក្នុងគោលបំណងយកបច្ច័យកសាងធនធានមនុស្ស។
ស្ដ្រីម្នាក់ដែលរស់នៅភូមិទួលសង្កែ សង្កាត់ទួលគោក ខណ្ឌឫស្សីកែវ រាជធានីភ្នំពេញ បានមានប្រសាសន៍ថា គាត់តែងតែគាំទ្រជានិច្ចចំពោះការប្រារព្ធពិធីបុណ្យផ្កានេះ ដើម្បីស្វែងរកថវិកាជួយដល់អ្នកក្រីក្រមានឱកាសបន្តការសិក្សារៀនសូត្រ។ គាត់ថាកម្មវិធីនេះមានភាពល្អប្រសើ។
រីឯយុវជនម្នាក់ឈ្មោះ ស៊ុន ស៊ីណារាជ ដែលជាសិស្សថ្នាក់ទី១២ នៃវិទ្យាល័យព្រះយុគន្ធរ និងជាសិស្សនៅសាលាបញ្ញាសាស្ដ្រកម្ពុជា ដែលបានចូលរួមចាប់មគ្គផលក្នុងពិធីបុណ្យផ្កានោះ បានមានប្រសសាសន៍យល់ស្របផងដែរថា ជាការល្អ និងជាការជួយគ្នាទៅវិញទៅមកក្នុងគ្រាក្រ។ យុវជនរូបនេះបានបន្តទៀតថាគាត់តែងតែចូលរួមក្នុងសកម្មភាពជាហូហែមកដែរជាមួយព្រះសង្ឃខ្មែរក្រោម។ យុវជនរូបនេះក៏សម្ដែងនូវសេចក្ដីសង្ឃឹមថា សមណនិស្សិត ឬនិស្សិតដែលទទួលបានជំនួយតាមរយៈបុណ្យផ្កាថ្ងៃនេះ នឹងខិត្តខំសិក្សាស្របតាមគោលបំណងរបស់ពុទ្ធបរិស័ទដែលចង់បាន។
រីឯលោក កៃ ចាន់សុធា ដែលជាប្រធានការិយាល័យសិក្សាធិការ នៃសម្ព័ន្ធសមណនិស្សិត-និស្សិតខ្មែរកម្ពុជាក្រោម បានឲ្យដឹងផងដែរថា ផែនការសិក្សាប្រចាំឆ្នាំ២០១៣នេះមានដូចជា ការបញ្ជូនសមាជិកទៅសិក្សានៅក្រៅប្រទេស ការផ្តល់អាហារូបករណ៍ដល់សមាជិកដែលកំពុងសិក្សានៅក្នុងប្រទេស និងការបើកវគ្គបណ្ដុះបណ្ដាលផ្នែករដ្ឋបាលដល់សមាជិកគណៈកម្មការ រួមទាំងផែនការផ្នែកអប់រំផងដែរ។ រីឯការចំណាយ គឺសម្ព័ន្ធបានគិតជារួមដែលត្រូវចំណាយប្រមាណជាជាងមួយម៉ឺនដុល្លារសហរដ្ឋអាមេរិក។ ចំណែកថវិកាដែលបានមក គឺតាមរយៈសប្បុរសជន និងការធ្វើពិធីបុណ្យផ្កានេះជាដើម។ ក្នុងនាមជាប្រធានសិក្សាធិការ លោក កៃ ចាន់សុធា សង្ឃឹមដល់សមណនិស្សិត និស្សិតនឹងខិត្តខំប្រឹងប្រែងសិក្សារៀនសូត្រឲ្យបានជោគជ័យ ដើម្បីកុំឲ្យម្ចាស់ទានមានការខកបំណង។
ព្រះតេជព្រះគុណ យឿង តារា ព្រះប្រធានសម្ព័ន្ធសមណនិស្សិត-និស្សិតខ្មែរកម្ពុជាក្រោម បានមានថេរដីកាឲ្យដឹងថា សមាជិក សមាជិការបស់សម្ព័ន្ធសមណនិស្សិត-និស្សិតខ្មែរកម្ពុជាក្រោមរហូតមកដល់ពេលនេះ មានប្រមាណជា៣៥០រូប។ ក្នុងចំណោមសមាជិក សមាជិកាទាំងនោះមានទាំងនៅក្នុង និងក្រៅប្រទេសផង ហើយសមាជិកទាំងនោះភាគច្រើនគឺសិក្សាត្រឹមកម្រិតបរិញ្ញាបត្រ និងបរិញ្ញាបត្រជាន់ខ្ពស់ (អនុបណ្ឌិត)។ ព្រះអង្គបានមានថេរដីកាបន្តថា សមាជិកទាំងអស់មានភាពខ្វះខាតស្ទើតែទាំងស្រុង ព្រោះមកពីកម្ពុជាក្រោមដែលជាអ្នកគ្មានទីលំនៅឋានផ្ទាល់ខ្លួន គឺភាគច្រើនរស់នៅពឹងអាស្រ័យតាមបណ្ដាវត្តអារាម។ រីឯការជ្រើសរើសបេក្ខភាពដែលនឹងត្រូវបានទទួលអាហារូបករណ៍នោះ ព្រះអង្គបានមានថេរដីការឲ្យដឹងថា គឺពិនិត្យមើលទៅលើស្ថានភាពជាក់ស្ដែង និងសកម្មភាពការងារក្នុងសង្គម។
សូមជម្រាបផងដែរថា សម្ព័ន្ធសមណនិស្សិត-និស្សិតខ្មែរកម្ពុជាក្រោម មានផែនការសកម្មភាពគោលមួយនេះចាប់តាំងពីឆ្នាំ២០១០មកម្លេះ ហើយសម្ព័ន្ធនឹងរក្សាផែនការសកម្មភាពមួយនេះជារៀងរាល់ឆ្នាំ។
គឹម បុរី VOKK
