សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ ស្នើសុំឲ្យក្រសួងការបទេសកម្ពុជាបញ្ជាក់ជាផ្លូវការ អំពីអ្វីដែលក្រសួងការបរទេសខ្មែរ អះអាងថា ពលរដ្ឋខ្មែរក្រោម គឺជាប្រជាពលរដ្ឋវៀតណាម។
លិខិតរបស់សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ ចុះថ្ងៃទី៧ខែមករា ដែលចុះហត្ថាលេខាដោយនាយកប្រតិបត្តិសមាគមខ្មែរកម្ពុជាក្រោមដើម្បី សិទ្ធិមនុស្ស និងអភិវឌ្ឍន៍ លោក សឺន យឿន ដាក់ជូនរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ លោក អ៊ុច បូររិទ្ធិ ឲ្យដឹងថា កាលពីព្រឹកថ្ងៃទី២ ខែមករា ឆ្នាំ២០១៤ នៅវេលាម៉ោងប្រមាណ១០ បុរសម្នាក់បានទូរស័ព្ទលេខ ០២៣ ២១២ ៦៤១ ប្រាប់ថា ទូរស័ព្ទពីក្រសួងការបរទេស និងសហប្រតិបត្តិការអន្តរជាតិកម្ពុជា ។ បុរសនោះបានប្រាប់ថា ខ្មែរក្រោមគឺប្រជាពលរដ្ឋវៀតណាម ដូច្នេះឋិតនៅក្រោមការគ្រប់គ្រងរបស់ប្រទេសវៀតណាម ដែលចម្លើយនេះមានន័យថា រដ្ឋាភិបាលកម្ពុជា មិនអាចអន្តរាគមន៍បានចំពោះពលរដ្ឋខ្មែរក្រោម ដែលកំពុងរងការរំលោភសិទ្ធិមនុស្សនៅកម្ពុជាក្រោមបានឡើយ។
លិខិតបន្តថា ថ្វីត្បិតតែសមាគមកម្ពុជាក្រោមរស់នៅលើទឹកដីវៀតណាម ប៉ុន្តែទោះជាយ៉ាងណា ពួកគេនៅតែជាខ្មែរក្រោម ជាជនជាតិខ្មែរ ដោយមិនអាចប្រកែកបាន ហើយត្រូវឋិតនៅក្រោមការការពារដោយច្បាប់កម្ពុជា។ លិខិតបន្តថា ព្រះរាជសេចក្តីថ្លែងការណ៍ ចុះថ្ងៃទី២២ ខែធ្នូ ឆ្នាំ១៩៩២ របស់អតីតព្រះមហាក្សត្រ ព្រះបាទនរោត្តមសីហនុ បានមានព្រះបន្ទូលថា ខ្មែរទាំងប្រុសទាំងស្រីរស់នៅក្នុង ឬក្រៅប្រទេសក្តី គឺជាជនជាតិខ្មែរទាំងអស់។
VOD មិនអាចទាក់ទងរដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ លោក អ៊ុច បូររិទ្ធិ បានទេ។
ច្បាប់រដ្ឋធម្មនុញ្ញនៃព្រះរាជាណាចក្រ កម្ពុជា ឆ្នាំ២០០៦ មាត្រា៣ ចែងថា ប្រជាពលរដ្ឋខ្មែរដែលកំពុងរស់នៅឯបរទេសត្រូវបានរដ្ឋការពារ៕ ដោយ៖ ជន ស្រីណុច | ថ្ងៃពុធ ទី8 ខែមករា ឆ្នាំ2014
សូមសរសេរមកកាន់ កញ្ញា ជន ស្រីណុច តាមរយៈអ៊ីម៉ែល chornsreynoch@vodhotnews.com
