ដោយ សារព័ត៌មាន ព្រៃនគរ
ការរឹតត្បិតផ្នែកសេរីភាពដើរហើររបស់ពលរដ្ឋខ្មែរក្រោម ដែលត្រូវបានរំលោភពីសំណាក់អាជ្ញាធរវៀតណាម បានជំរុញឲ្យអង្គការសមាគមខ្មែរកម្ពុជាក្រោមនៅកម្ពុជារៀបចំសន្និសីទកាសែត នៅថ្ងៃអាទិត្យទី ២១ មេសា ២០១៣ នៅសាលប្រជុំរបស់សមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ ភូមិគោកឃ្លាង សង្កាត់ភ្នំពេញថ្មី ខ័ណ្ឌសែនសុខ រាជធានី ភ្នំពេញ ។
អង្គសន្និសីទផ្តោតសំខាន់ទៅលើស្ថានភាពសេរីភាពធ្វើដំណើររបស់ពលរដ្ឋខ្មែរក្រោមទៅលេងស្រុកកំណើត ដើម្បីសួរសុខទុក្ខសាច់ញាតិក្រុមគ្រួសារ និងចូលរួមក្នុងពិធីបុណ្យប្រពីណី ជាតិផ្សេងៗ មានពិធីបុណ្យចូលឆ្នាំ ពិធីបុណ្យភ្ជុំបិណ្ឌជាដើម ត្រូវបានអាជ្ញធរមូលដ្ឋានរឹតត្បិត និងគំរាមកំហែង ឬបង្ខំឲ្យធ្វើភ្នាក់ងារសម្ងាត់ដើម្បីរាយការណ៍ ពីស្ថានភាពខ្មែរក្រោមនៅកម្ពុជា ឲ្យអាជ្ញាធរវៀតណាម ។ សន្និសីទនេះ ធ្វើឡើងបន្ទាប់ពី លោក លី ឈូន ចាងហ្វាង សារព័ត៌មាន ព្រៃនគរ ដែលមានមូលដ្ឋាននៅកម្ពុជា និងក្រុមគ្រួសារ ត្រូវបានឆ្មាំព្រំដែនវៀតណាមចាប់ឃុំខ្លួននៅប៉ុស្តិ៍ព្រំដែនអស់ ៤៨ ម៉ោង ខណៈដែលលោកធ្វើដំណើរទៅសួរសុខទុក្ខញាតិក្នុងឱកាសបុណ្យចូលឆ្នាំខ្មែរ កាលពីពេលកន្លងទៅនេះ ។
សមាគមខ្មែរកម្ពុជាក្រោម រិះគន់អាជ្ញាធរវៀតណាម ថានៅតែបន្តគាបសង្កត់ និងបំបិទសិទ្ធិសេរីភាពរបស់ពួកគេតាមរយៈសកម្មភាពមួយចំនួន ដូចជាការរឹបអូសយកលិខិតឆ្លងដែន ព្រមទាំងចាប់បង្ខំឲ្យធ្វើជាគិញសម្ងាត់ ដើម្បីរាយការណ៍អំពីស្ថានភាពខ្មែរក្រោម ឲ្យអាជ្ញាធរវៀតណាម ។
អង្គការសមាគម ខ្មែរកម្ពុជាក្រោម ប្រចាំនៅកម្ពុជា អំពាវនាវជាថ្មីទៀតឲ្យអាជ្ញាធរវៀតណាម បញ្ឈប់រាល់ទង្វើរំលោភសិទ្ធិខ្មែរក្រោម ខណៈដែលអ្នកគ្រប់គ្រងការផ្សាយ កាសែត ព្រៃនគរ គ្រោងដាក់ពាក្យបណ្ដឹង ទៅអង្គការសហប្រជាជាតិ ស្ដីពីការរំលោភសិទ្ធិរបស់អាជ្ញាធរវៀតណាម ។
នាយកកម្មវិធី សមាគមខ្មែរកម្ពុជាក្រោមដើម្បីសិទ្ធិមនុស្ស និងការអភិវឌ្ឍ និងជាប្រធានបណ្ដាញ យុវជនខ្មែរ កម្ពុជាក្រោម លោក សឺន ជុំជួន រៀប រាប់ឲ្យដឹងនៅថ្ងៃទី ១៧ ខែមេសា ថា ថ្មីៗនេះមានពលរដ្ឋខ្មែរកម្ពុជាក្រោមខ្លះ ក្នុង ខណៈធ្វើដំណើរទៅស្រុកកំណើត នៅកម្ពុជាក្រោម ត្រូវបានអាជ្ញាធរវៀត ណាម នៅច្រកព្រំដែនហាមឃាត់មិនឲ្យធ្វើដំណើរទៅស្រុកកំណើត ខ្លះត្រូវបានឃាត់ខ្លួនជាច្រើនម៉ោង ត្រូវបានពិន័យជាទឹកប្រាក់ជាច្រើន ត្រូវបានឆែកឆេរឥវ៉ាន់ចាប់សួរចម្លើយ និងគំរាមកំហែងបំភិតបំភ័យ មុននឹងបញ្ជូនត្រឡប់មកកម្ពុជាវិញ ។
លោក សឺន ជុំជួន បន្តថា មានខ្មែរកម្ពុជាក្រោមខ្លះ ពេលទៅដល់ស្រុកកំ ណើតនៅកម្ពុជាក្រោម ត្រូវបានអាជ្ញាធរវៀតណាម រឹតត្បិតសិទ្ធិសេរីភាពក្នុងការធ្វើដំណើរ រួមមានការហៅទៅសួរចម្លើយ នៅទីស្នាក់ការនគរបាលឃុំ ស្រុក និងខេត្តជាញឹកញាប់ ។ អ្នក ខ្លះទៀត ត្រូវបានគំរាមកំហែងដល់គេហដ្ឋានខ្លះត្រូវបានរឹបអូសយកលិខិតឆ្លងដែន ព្រមទាំងចាប់បង្ខំឲ្យធ្វើជាគិញសម្ងាត់ ដើម្បីរាយការណ៍ពីស្ថានភាពខ្មែរក្រោម ឲ្យអាជ្ញាធរវៀតណាម ថែមទៀត ។ ករណីទាំងនោះ ត្រូវបានលោក សឺន ជុំជួន ចាត់ទុកថាជាការរំលោភសិទ្ធិមនុស្សធ្ងន់ធ្ងរ ។
លោក សឺន ជុំជួន៖ «អ្នកខ្លះទៀតបានទៅដល់កម្ពុជាក្រោម ក៏ត្រូវបានអាជ្ញាធរវៀតណាម គាត់ហៅសួរណែនាំមួយចំនួនទាក់ទងអ្វីជាសកម្មភាពរបស់ខ្មែរក្រោមនៅកម្ពុជា ជារឿងសំខាន់ដែលយើងចង់ឲ្យបណ្ដាញព័ត៌មានជាតិ និងអន្តរជាតិ ឲ្យអង្គការនានាដែលទាក់ទងសិទ្ធិមនុស្ស បានជ្រាបពីស្ថានភាព នៃការធ្វើដំណើរយើងទៅស្រុកកំណើត»។
ដោយឃើញ ការរំលោភសិទ្ធិមនុស្សបែបនេះ ទើបអង្គការសមាគមខ្មែរកម្ពុជាក្រោម គ្រោងរៀបចំសន្និសីទកាសែតនៅថ្ងៃទី ២១ ខែមេសា ចុង សប្ដាហ៍នេះស្ដីពី “សេរីភាពដើរហើររបស់ខ្មែរកម្ពុជាក្រោមកំពុងត្រូវរំលោភពីសំណាក់អាជ្ញាធរវៀតណាម” ដើម្បីជាការអំពាវនាវ សូមឲ្យអាជ្ញាធរវៀតណាម ត្រូវតែបញ្ឈប់ រាល់ទង្វើរំលោភសិទ្ធិមនុស្សខ្មែរក្រោម ។
ការអំពាវនាវនេះ ធ្វើឡើងបន្ទាប់ពីចាងហ្វាង កាសែត ព្រៃនគរ លោក លី ឈួន និងក្រុមគ្រួសារដែលជាខ្មែរក្រោម ត្រូវបានអាជ្ញាធរវៀតណាម ពិន័យប្រាក់ ៣០ លានដុង ឬ ប្រហាក់ប្រហែលនឹង ១.៥០០ ដុល្លារ ជាថ្នូរនឹងការដោះលែងឲ្យមានសេរីភាព បន្ទាប់ពីអាជ្ញាធរវៀតណាម ចាប់ឃុំខ្លួនលោក និងប្រពន្ធ កូន កាលពីថ្ងៃទី ១២ ខែមេសា ដើម្បីសួរចម្លើយ និងឆែកឆេរតាំងពីក្បាលដល់ចុងជើងនៅតាមព្រំដែនដោយគ្រាន់ តែគ្រួសារលោកមានបំណង ទៅស្រុកកំណើតដើម្បីជួបជុំគ្រួសារ និងសាច់ញាតិក្នុងឱកាសបុណ្យចូលឆ្នាំប្រពៃណីខ្មែរ ។
ជុំវិញបញ្ហានេះដែរ ចាងហ្វាងកាសែតព្រៃនគរ លោក លី ឈួន បញ្ជាក់ថា លោកនឹងដាក់ពាក្យបណ្ដឹងទៅអង្គការសិទ្ធិមនុស្សក្នុងស្រុក និងអង្គការសហប្រជាជាតិ ស្ដីពីការរំលោភសិទ្ធិខ្មែរក្រោម របស់អាជ្ញាធរវៀតណាម ក្រោយពីធ្វើសន្និសីទកាសែតនៅថ្ងៃច័ន្ទ ដើមសប្ដាហ៍ក្រោយ ក្រោយពីសមាគមខ្មែរក្រោមចេញរបាយការណ៍ ស្ដីពីការរំលោភសិទ្ធិខ្មែរក្រោមជាផ្លូវការរួច៖ «ខ្ញុំធ្វើពាក្យបណ្ដឹងស្ដីពីសិទ្ធិមនុស្សហ្នឹង គឺដើម្បីឲ្យរដ្ឋាភិបាលវៀតណាម កុំគាបសង្កត់សិទ្ធិសេរីភាព ខ្មែរកម្ពុជាក្រោមខ្លាំងពេក»។
ព្រះតេជព្រះគុណ សៀង សុវណ្ណារ៉ា ព្រះចៅអធិការវត្តសាមគ្គីរង្ស៊ី ដែលជាវត្តខ្មែរកម្ពុជាក្រោមស្ថិតនៅភូមិទ្រា ក្នុងខណ្ឌមានជ័យ បានឲ្យដឹងថា ព្រះអង្គត្រូវបានអាជ្ញាធរវៀតណាម ដកហូតលិខិតឆ្លងដែននៅព្រំដែន តែពេលតវ៉ាខ្លាំង ទើបប្រគល់ឲ្យវិញ ។ ពេលព្រះអង្គទៅដល់ស្រុកកំណើត នៅខេត្តឃ្លាំងក្នុងខែកុម្ភៈ ឆ្នាំ ២០១៣ នេះ ត្រូវនគរបាលវៀតណាមមកនិមន្តព្រះអង្គទៅផ្ទះមន្ត្រីម្នាក់និងចោទសួរជាច្រើន ។ ព្រះតេជព្រះគុណបន្តថា៖« គេប្រាប់កុំឲ្យអាត្មាធ្វើអី(ជំទាស់វៀតណាម) តែតាមពិតអាត្មាគ្រាន់តែទៅធ្វើបុណ្យ នៅវត្តនៅកម្ពុជាក្រោមប៉ុណ្ណោះ ។ គេហាមអាត្មាមិនឲ្យអាត្មាចូលរួមការងារ ពាក់ព័ន្ធចលនាទាមទារសិទ្ធិសេរីភាពខ្មែរក្រោម ពេលមកដល់កម្ពុជាវិញ» ។
ព្រះតេជព្រះគុណ លី ចាន់ នេន និមន្តមកពីប្រទេសកាណាដា ដែលនិមន្តទៅលេងស្រុកកំណើត នៅខេត្តឃ្លាំងកាលពីខែកុម្ភៈ មិនត្រូវបានរដ្ឋការវៀតណាមអនុញ្ញាតឲ្យចូលទៅឡើយ។ ព្រះអង្គ មានសង្ឃដីកាថាព្រះអង្គនឹងដាក់ពាក្យបណ្តឹង ទៅគ្រប់ស្ថាប័នពាក់ព័ន្ធ ជាពិសេសអង្គការសិទ្ធិមនុស្សអន្តរជាតិស្តីបញ្ហាខាងលើនេះ ។
លោក គឹម ស៊ីសំណា លេខាធិការនៃលេខាធិការដ្ឋានសមាគមខ្មែរកម្ពុជាក្រោម (KKKHRDA) ឲ្យដឹងថា ករណីខាងលើនេះ គឺគ្រាន់តែជាករណីខ្លះដែលអាជ្ញាធរវៀតណាមបានធ្វើទុក្ខបុកម្នេញ ក្នុងការបំបិទសិទ្ធិសេរីភាពមកលើប្រជាពលរដ្ឋខ្មែរប៉ុណ្ណោះ ។ លោកកត់សម្គាល់ថា៖ «យើងឃើញថាវៀតណាមធ្វើកាន់តែធ្ងន់ធ្ងរទៅៗមកលើខ្មែរកម្ពុជាក្រោម ។ នេះគឺបំពាននឹងសេចក្តីថ្លែងការណ៍ជាសកលស្តីពីសិទ្ធិមនុស្ស និងសេចក្តីប្រកាសរបស់អង្គការសហប្រជាជាតិ ស្តីពីសិទ្ធិជនជាតិដើមភាគតិចដែលវៀតណាមក៏ជាហត្ថលេខីដែរ» ។
លោកបានបន្តទៀតថា អង្គការសមាគមខ្មែរកម្ពុជាក្រោម នឹងសរសេររបាយការណ៍ ស្តីពីទង្វើរំលោភបំពានច្បាប់របស់វៀតណាមនេះ ផ្ញើជូនទៅការិយាល័យឧត្តមស្នងការសិទ្ធិមនុស្សអង្គការសហប្រជាជាតិប្រចាំកម្ពុជា និងសហគមន៍អន្តរជាតិ ឲ្យជួយធ្វើអន្តរា គមន៍លើការរំលោភបំពាននេះ ។
កាលពីខែមីនាកន្លងទៅនេះលោក សឺន ស៊ូបែរ្តិ៍ ជាឧត្តមក្រុមប្រឹក្សាព្រះមហាក្សត្រ ដែលមានដើមកំណើតជាខ្មែរកម្ពុជាក្រោម ត្រូវបានអាជ្ញាធរវៀតណាមឃាត់ខ្លួនជាច្រើនម៉ោង រួចឲ្យត្រឡប់មកកម្ពុជាវិញ ៕
