អាយុធ្យា, ប្រទេសថៃ៖ សមណនិស្សិតខ្មែរក្រោមចំនួន ៣២ អង្គបានទទួលសញ្ញាប័ត្រថ្នាក់បរិញ្ញា និង អនុបណ្ឌិត ពីសកលវិទ្យាល័យ មហាចុឡាឡុងករណ៍ រាជវិទ្យាល័យ ក្នុងពិធីប្រទាន និងជូនសញ្ញាប័ត្រ ដល់និស្សិតចំនួន ៣.៦៧៤ អង្គ និង រូប នៅថ្ងៃទី ១៣ ខែឧសភា ឆ្នាំ ២០១២ នេះ ដែល បានរៀបចំឡើង នៅមជ្ឈមណ្ឌលមហាវិទ្យាល័យ មួយនេះ នៅក្នុងខេត្តអាយុធ្យា ។

ព្រះតេជព្រះគុណ ថាច់ តារា ប្រធានមូលនិធិព្រះពុទ្ធសាសនាថេរវាទខ្មែរនៅវៀតណាមខាងត្បូង បានប្រាប់ សារព័ត៌មាន ព្រៃនគរ ថ្ងៃនេះថា និស្សិតខ្មែរក្រោមដែលនិមន្តមកពីកម្ពុជាក្រោម  [កាន់ លិខិតឆ្លងដែនវៀតណាម] និងទាំងមកពីកម្ពុជា (កាន់លិខិតឆ្លងដែនខ្មែរ) ឆ្នាំនេះ បានទទូលសញ្ញា ប័ត្របរិញ្ញាប័ត្រចំនួន ៣១ អង្គ និង អនុបណ្ឌិត ១ អង្គ ក្រោយពីសមណនិស្សិតទាំងនេះ បានបញ្ចប់ ការសិក្សាថ្នាក់ទាំងនេះ នៅក្នុងមហាវិទ្យាល័យ មហាចុឡាឡុងករណ៍រាជវិទ្យាល័យ ។

យោងតាមសេចក្ដីប្រកាសព័ត៌មានរបស់ពិធីប្រទានសញ្ញាប័ត្រនេះថា ពិធីប្រទានសញ្ញាប័ត្រឆ្នាំនេះ និស្សិតទាំង ព្រះសង្ឃ និងគ្រហស្ថនៃមហាវិទ្យាល័យមហាចុឡាឡុងករណ៍រាជវិទ្យាល័យ មានចំនួន ៣.៦៧៤ អង្គ និងរូប ក្នុងនោះ មាននិស្សិត ដែលបានបញ្ចប់ថ្នាក់បរិញ្ញាប័ត្រជំនាន់ទី ៥៧ [ពុទ្ធ សាស្ត្របណ្ឌិត ] , អនុបណ្ឌិត ជំនាន់ទី ២២ [ពុទ្ធសាស្ត្រមហាបណ្ឌិត] និង បណ្ឌិតជំនាន់ទី ៨ [ពុទ្ធ សាស្ត្រទ្រឹស្តីបណ្ឌិត] ។ និស្សិតទាំងនេះរួមមាន ជនជាតិថៃ និងបរទេសដែលបានសិក្សានៅមជ្ឈម ណ្ឌលមហាវិទ្យាល័យមហាចុឡាឡុងករណ៍រាជវិទ្យាល័យ ដែលមានទីតាំងនៅក្នុងខេត្តអយុធ្យា និងនៅតាមសាខានានាទូទាំងប្រទេសថៃ ព្រមទាំងសាខា នៅក្រៅប្រទេស មួយចំនួន ដូចជា តៃ វ៉ាន់, កូរ៉េ , ជប៉ុន , សិង្ហបុរី និង ស្រីលង្កា ជាដើម ។

ពិធីប្រទានសញ្ញាប័ត្រនេះ មានមនុស្សចូលរួមយ៉ាងច្រើនកុះករ ដោយមានចាត់តាំងកម្មវិធីលេងកម្សាន្ត តាំង ពិព័រណ៍ អំពីវប្បធម៌សិល្បៈរបស់ជនជាតិមកខេត្តនីមួយៗនៅក្នុងប្រទេសថៃផងដែរ ។ ការតាំងពិព័រណ៍នេះ  ក្រុមខ្មែរមកពីខេត្តបុរីរម្យ , ស្រីល្លាកេត (ស៊ីសាកេត)  និងសុរិន្ទ្រ ក៏ត្រូវបាន មហាវិទ្យាល័យមួយនេះ អនុញ្ញាត ឲ្យមកសម្តែងអំពីវប្បធម៌របស់ខ្លួនផងដែរ ៕  ប្រភពព័ត៌មាន៖ សារព័ត៌មាន ព្រៃនគរ

សមណនិស្សិតខ្មែរក្រោមថតរូបរូបអនុស្សាវរីយ៍ ។ រូបថត៖ សារព័ត៌មាន ព្រៃនគរ

សមណនិស្សិតខ្មែរក្រោមថតរូបរូបអនុស្សាវរីយ៍ ។ រូបថត៖ សារព័ត៌មាន ព្រៃនគរ

និស្សិតថតរូបរូបអនុស្សាវរីយ៍ ។ រូបថត៖ សារព័ត៌មាន ព្រៃនគរ

ក្រុមបច្ចេកទេសថតរូបកំពុងតែរៀបចំការថតរូប ។ រូបថត៖ សារព័ត៌មាន ព្រៃនគរ