នៅក្នុងពេលថ្មីៗ នេះអង្គការសហព័ន្ធខ្មែរកម្ពុជាក្រោម ពិភពលោក (Khmers Kampuchea-Krom Federation – KKF) ដែលជាអង្គការក្រៅ រដ្ឋាភិបាលអន្ដរជាតិមានមូលដ្ឋាន នៅសហរដ្ឋ អាម៉េរិកបានព្យាយាម ដាក់ពាក្យសុំចូលជាសមាជិក ពិសេសនៅក្នុងក្រុម ប្រឹក្សាសេដ្ឋកិច្ច និងសង្គមកិច្ចរបស់អង្គការសហប្រជាជាតិហៅកាត់ថា ECOSOC (Economic and Social Council)។ គណៈកម្មាធិការអង្គការក្រៅរដ្ឋាភិបាល ដែលមាន១៩ ប្រទេស បានធ្វើការពិនិត្យទៅលើការដាក់ពាក្យរបស់ អង្គការសហព័ន្ធខ្មែរ កម្ពុជាក្រោមពិភពលោកកាលពី ខែឧសភា ឆ្នាំ២០១២កន្លងទៅ។ ប៉ុន្ដែតំណាងពីប្រទេសវៀតណាមបានប្រឆាំងទៅនឹងការដាក់ពាក្យនេះ កាលពីថ្ងៃទី៣០ ខែមិថុនា ឆ្នាំ២០១២។ ទោះជាយ៉ាងណាក៏ដោយ ក្រុមប្រឹក្សា ECOSOC របស់អង្គការសហប្រជាជាតិនៅថ្ងៃទី២៣ ខែកក្កដា ឆ្នាំ២០១២ ខាងមុននេះនឹងធ្វើការបោះឆ្នោតជាទូទៅមួយដើម្បីសម្រេចថាតើនឹង អនុញ្ញាតឲ្យអង្គការក្រៅរដ្ឋាភិបាលសហព័ន្ធខ្មែរកម្ពុជាក្រោមពិភព លោកចូលជាសមាជិកពេញសិទ្ធិ ឬក៏យ៉ាងណា។
លោក ថាច់ ង៉ុកថាច់ ដែលជាប្រធានអង្គការសហព័ន្ធខ្មែរកម្ពុជាក្រោមពិភពលោកបានមាន ប្រសាសន៍ប្រាប់ Radio Australia ជុំវិញរឿងនេះ។
(សំឡេងលោក ថាច់ ង៉ុកថាច់ ១)
ប៉ុន្ដែ ទោះជាយ៉ាងណាក៏ដោយប្រទេសវៀតណាមបានធ្វើការប្រឆាំងនឹងការចូលជា សមាជិកភាពនេះ។ វិទ្យុអូស្រ្ដាលីទទួលបាននូវសេចក្ដីប្រកាសមួយរបស់ឯកអគ្គរដ្ឋទូត Le Hoai Trung តំណាងអចិន្រ្តៃយ៍នៃប្រទេសវៀតណាមនៅក្នុងគណៈកម្មាធិការអង្គការក្រៅ រដ្ឋាភិបាលរបស់អង្គការសហប្រជាជាតិ ដោយវៀតណាមបានលើកឡើងថា អង្គការសហព័ន្ធខ្មែរកម្ពុជាក្រោមពិភពលោកគឺជាអង្គការបរទេសមិនមែន ជាអង្គការនៅក្នុងប្រទេសវៀតណាម ហើយក៏មិនជាតំណាងនៃពលរដ្ឋខ្មែរក្រោមនោះដែរ។ វៀតណាមចាត់ទុកថាខ្មែរក្រោមគឺជាជនជាតិភាគតិចនៅក្នុងប្រទេស វៀតណាម។
ចំណុចមួយទៀតដែលវៀតណាមបានលើកឡើងផងដែរនោះ គឺគេបានចោទអង្គការសហព័ន្ធខ្មែរពិភពលោកថា ជាអង្គការដែលធ្វើការញុះញ៉ុងចង់ឲ្យមានការបង្កើតរដ្ឋឯករាជ្យ ដាច់ចេញពីប្រទេសវៀតណាម។ ទាំងនេះប្រទេសវៀតណាមបានលើកឡើងថា ផ្ទុយទៅនឹងគោលការណ៍លក្ខន្ដិកៈរបស់អង្គការសហប្រជាជាតិ។ ទោះជាយ៉ាងណាក៏ដោយ លោក ថាច់ ង៉ុកថាច់ ប្រធានអង្គការសហព័ន្ធខ្មែរកម្ពុជាក្រោមបានបកស្រាយប្រាប់ Radio Australia ថា រឿងនេះមិនមែនដូច្នេះនោះទេ។
(សំឡេងលោក ថាច់ ង៉ុកថាច់ ២)
ទាក់ ទងនឹងការជួយជ្រោមជ្រែងពីសំណាក់ស្ថានទូតខ្មែរនៅបរទេសវិញ នៅពេលដែល Radio Australia សាកសួរទៅលោក ថាច់ ង៉ុកថាច់ លោកបានឲ្យដឹងថា ទូតខ្មែរនៅបរទេសមិនដែលបានផ្ដល់ការគាំទ្រជាផ្លូវការនោះទេ។
(សំឡេងលោក ថាច់ ង៉ុកថាច់ ៣)
សូម ជម្រាបថា តាមព័ត៌មានដែលវិទ្យុអូស្រ្ដាលីទទួលបានពីអង្គការសហព័ន្ធខ្មែរ ក្រោមពិភពលោក ខ្មែរកម្ពុជាក្រោមរស់នៅក្នុងទឹកដីវៀតណាមខាងត្បូងសព្វថ្ងៃមាន ចំនួនប្រមាណ៨លាននាក់ ប៉ុន្ដែមិនមានស្ថិតិផ្លូវការណាមួយបញ្ជាក់អំពីតួលេខនេះទេ។
តាម ប្រវត្ដិសាស្រ្ដទឹកដីខ្មែរក្រោមត្រូវបានអាណានិគមនិយមបារាំងកាល ពីជំនាន់ត្រួតត្រាតំបន់ឥណ្ឌូចិន បានកាត់ទឹកដីខ្មែរក្រោមទៅឲ្យវៀតណាមនៅក្នុងឆ្នាំ១៩៤៩ ដោយធ្វើឲ្យពលរដ្ឋខ្មែរជាច្រើននាក់រហូតដល់សព្វថ្ងៃ មានការខឹង និងសោកស្ដាយយ៉ាងខ្លាំងចំពោះទឹកដីដែលបានបាត់បង់ទៅយ៉ាងស្រោះៗ បែបនេះ៕ ប្រភពព័ត៌មានៈ វិទ្យុអូស្រ្តាលី ខេមរភាសា
