ដោយ ថាច់ ប្រីជា គឿន l សារព័ត៌មាន ព្រៃនគរ
មនុស្សចំនួន ១២ នាក់ ត្រូវបានតុលាការវៀតណាមផ្ដន្ទាទោសពីបទ “បង្កអសន្តិសុខទីសាធារណៈ” នៅក្នុងបាតុកម្មហិង្សាមួយប្រឆាំងនឹងចិន កាលពីខែឧសភា ឆ្នាំ ២០១៤ នេះ ។
ព័ត៌មានវៀតណាមក្នុងស្រុកបានជូនដំណឹងថា តុលាការបក្សកុម្មុយនិស្តយួន នៃខេត្តដូនណៃ នៅថ្ងៃទី ២៣ ខែកញ្ញា បានកាត់ទោសមនុស្ស ១២ នាក់ឲ្យជាប់គុកពី ១០ ខែទៅ ១៦ ខែ ព្រោះបាន “ប្រមូលផ្ដុំគ្នា” បង្កអសន្តិសុខ និងបាន “ធ្វើឲ្យខូចខាតដ៏ធ្ងន់” ដល់រោងចក្រឧស្សាហកម្មមួយឈ្មោះ ញើងត្រាច (Nhơn Trạch) កាលពីថ្ងៃទី ១៣ ខែឧសភា ឆ្នាំ ២០១៤ ។
សាលក្រមបានបញ្ជាក់ថា ក្រុមយុវជននេះ បានយកលេសការដង្ហែក្បួនប្រឆាំងនឹងប្រទេសចិន ដែលបាន យកនាវាខួងប្រេងលេខ ៩៨១ មកដាក់នៅលើផ្ទៃសមុទ្រ កន្លែងដែលក្រុមបាតុករចាត់ទុកថា ជារបស់វៀត ណាម ដើម្បីបំផ្លាញទ្រព្យសម្បត្តិនៅតាមរោងចក្ររបស់ចិន ។
មនុស្សរាប់ពាន់នាក់បានចាប់ខ្លួន និងមនុស្សជាច្រើនរូបទៀតត្រូវបាននាំចេញកាត់ទោស ក្រោយពីការធ្វើ បាតុកម្មហិង្សាប្រឆាំងនឹងចិន កាលពីខែឧសភា បានបង្ក្រាប ។
កាលពីខែមិថុនា កាសែតបក្សកម្មុយនិស្តវៀតណាម ដែលចេញផ្សាយក្នុងស្រុកបានផ្សាយថា ការធ្វើ បាតុកម្មនេះ មានការញុះញង់ពីជនជាតិយួននៅក្រៅប្រទេស ។
ប្រព័ន្ធឃោសនារដ្ឋវៀតណាមផ្សាយថា “ក្រោយពីការស៊ើបអង្កេត នគរបាលទីក្រុងព្រៃនគរ (công an TPHCM) បានបញ្ជាក់ថា គណបក្សវៀតតឹង ជាចលនាមួយដែលមានគោលបំណងផ្ដួលរំលំរដ្ឋាភិបាលបក្សកុម្មុយនិស្តវៀតណាម បានឆក់យកឱកាសនេះ ហើយញុះញង់ឲ្យក្រុមមនុស្សអាក្រក់មួយចំនួន ឃោសនាឲ្យពលរដ្ឋ និង កម្មករ មកបន្ថែមរាប់រយនាក់ ហើយវាយកម្ទេចនូវរោងចក្រ នៅតាមតំបន់ ឧស្សាហកម្ម ផលិត” ។
ការធ្វើបាតុកម្មដោយសន្តិវិធី ហើយឈានដល់ការផ្ទុះអំពើហិង្សានេះ បានសម្រុកទៅរកក្រុមហ៊ុន ចិន តៃវ៉ាន់ សិង្ហបុរី និង កូរ៉េ ដែលកំពុងដំណើរការនៅវៀតណាម បណ្ដាលឲ្យមនុស្សយ៉ាងហោច ៤ នាក់ស្លាប់ និង រាប់រយនាក់រងរបួស ៕
