អាជ្ញាធរនៃស្រុកទិនបៀង ខេត្តអានយ៉ាង ប្រទេសវៀតណាម ទឹកដីខែ្មរកម្ពុជាក្រោមនោះបានដកកងកម្លាំងយោធានិងនគរបាលសរុប ប្រមាណ៨០០នាក់ហើយពីកន្លែងតវ៉ារឿងដីធ្លីកន្លងមកនេះ ក្រោយពេលដែលផែនការជីកព្រែកកាត់តាមដីស្រែរបស់ក្រុមអ្នកតវ៉ានោះ បានឈានដល់ការសម្រេចតាមផែនការហើយ។
ប្រជាពលរដ្ឋខែ្មរកម្ពុជាក្រោមម្នាក់នៅក្នុងចំណោមអ្នកដែលបាន ងើបតវ៉ាកន្លងមកប្រឆាំងនឹងផែនការជីកព្រែកនោះនៅក្នុងឃុំអាងគឺ ស្រុកទិនបៀង ខេត្តអានយ៉ាង ប្រទេសវៀតណាម បានថែ្លងប្រាប់វិទ្យុអាស៊ីសេរីតាមទូរស័ព្ទមកថា ស្ថានការណ៍នៃកងកម្លាំងទ័ពវៀតណាមនិងនគរបាលវៀតណាមបានដកចេញអស់ហើយ ពីកន្លែងតវ៉ានោះ កាលពីយប់ថៃ្ងសុក្រនិងព្រឹកថ្ងៃសៅរ៍ ទី១២ ខែកញ្ញា ប៉ុន្តែប្រជាពលរដ្ឋខ្មែរកម្ពុជាក្រោមជាង៤០០គ្រួសារបានបាត់បង់ដី ស្រែកសិកម្មនាពេលនេះ ៖ «ស្ថានការណ៍ ឥឡូវទ័ពដកហើយ ឥឡូវគ្រាន់ថា ខ្ញុំនឹងទៅមើលដីប្រឡាយវាកាយឬនៅ? វាកាយគម្របរួចហើយ»។
សុខ សេរី ៖ ដកអស់ហើយហ្នឹងមានន័យថាម៉េច? ពលរដ្ឋ ៖ មានន័យថា វាដកទ័ពវាលែងមកគំរាមកនខ្ញុំ ប៉ុន្តែវាធ្វើរួចហើយបានវាដកហ្នឹង។ គេមិនវ៉ៃតប់អីទេ ទ័ពវា៨០០។
លោកស្រីបានឲ្យដឹងថា គ្រួសាររបស់លោកស្រីបានបាត់បង់ដីស្រែពីដូនតាចំនួន២ហិកតារនៅពេលនេះដោយគ្មានសំណងអ្វីទ្បើយ។
តំណាងប្រជាពលរដ្ឋខែ្មរកម្ពុជាក្រោមម្នាក់ទៀតនៅក្នុងស្រុក ទិនបៀងនោះដែរ បានថែ្លងថា លោកបានបាត់បង់ដីស្រែកសិកម្មចំនួនជាង១ហិកតារក្រោមផែនការជីក ព្រែកនោះ។ លោកបានបន្តថា ៖ «គេដកហើយ គេដកតាមកប៉ាល់»។
សុខ សេរី ៖ ឥឡូវនេះលោកមានការធូរអារម្មណ៍ទេ? ពលរដ្ឋ ៖ ធូរអីទេ នៅតឹងមាំណាស់!។
ប្រភពបានឲ្យដឹងថា ពុំមានសកម្មភាពកងកម្លាំងទ័ពនិងនគរបាលវៀតណាមជាច្រើនរយនាក់ទៀត ទេ ហើយក៏ពុំមានការហ៊ុមព័ទ្ធផ្ទះសម្បែងរបស់សកម្មជនតវ៉ាដីធ្លីនោះ ដែរ។ រីឯគ្រឿងចក្រកាយដីឬជីកព្រែកនោះក៏ត្រូវបានដកចេញស្ទើរតែទាំង អស់ហើយដែរ។
នៅមិនទាន់មានប្រតិកម្មណាមួយពីមន្រ្តីនៃស្ថានទូតវៀតណាមនៅ ក្នុងទីក្រុងភ្នំពេញជុំវិញស្ថានការណ៍ចុងក្រោយនេះនៅទ្បើយទេ។
លោក ថាច់ សេដ្ឋា ប្រធានសហគមន៍ខែ្មរកម្ពុជាក្រោមនៅក្នុងប្រទេសកម្ពុជា បានមានប្រសាសន៍ថា ៖ «ដូច្នេះ ខ្ញុំបានសរសេរលិខិតមួយហើយទៅក្រសួងការបរទេស ដូច្នេះយើងនឹងសុំឲ្យរដ្ឋាភិបាលយើងជួយអន្តរាគមន៍ធ្វើម៉េចឲ្យគាត់ មានដីវិញ ដើម្បីឲ្យរដ្ឋាភិបាលយួនហ្នឹងរកដីដើម្បីជាសំណងរបស់គាត់ទៅវិញ»។
សូមជម្រាបថា អាជ្ញាធរមូលរដ្ឋាននៅក្នុងស្រុកទិនបៀង ខេត្តអានយ៉ាង ប្រទេសវៀតណាម ទឹកដីខែ្មរកម្ពុជាក្រោមនោះ បានដាក់ពង្រាយកងកម្លាំងទ័ពនិងនគរបាលសរុបប្រមាណ៨០០នាក់និងសត្វ ឆ្កែប្រដេញផងចាប់តាំងពីថៃ្ងទី៩ ខែកញ្ញាមក ដើម្បីត្រៀមបង្រ្កាបនិងចាប់ខ្លួនប្រជាពលរដ្ឋខែ្មរកម្ពុជាក្រោមណា ដែលហ៊ានបន្តងើបតវ៉ាប្រឆាំងនឹងផែនការជីកព្រែកនោះ។
ប្រជាពលរដ្ឋខែ្មរកម្ពុជាក្រោមចំនួនជាង៤០គ្រួសារនៅក្នុងចំណោម ជាង៤០០គ្រួសារបានងើបតវ៉ាជាច្រើនសប្តាហ៍មកហើយប្រឆាំងនឹងផែនការ ជីកព្រែកមួយខែ្សប្រវែងប្រមាណ១០គីឡូម៉ែត្រនិងទទឹង៥០ម៉ែត្រកាត់ តាមដីស្រែកសិកម្មចំនួនជាង៤០០ហិកតារដោយគ្មានសំណងជាប្រាក់និងដី ស្រែកសិកម្មវិញទ្បើយចំពោះការបាត់បង់នោះ៕.
