ប្រជាពលរដ្ឋខ្មែរកម្ពុជាក្រោមមួយរួប ឈ្មោះ តាំង ធុយ (Tang Thuy) ត្រូវបានអាជ្ញាធរវៀតណាម ខែត្រឃ្លាំង ចាប់ឃុំខ្លួនរយៈពេលពីរថ្ងៃមកហើយ គឺពីថ្ងៃទី២៣ ដល់ថ្ងៃទី២៤ ក្រោមបទចោទថា បានដឹកនាំធ្វើកូដកម្ម និងទាក់ទងជាមួយ អ្នករស់នៅឯបរទេស។
លោក តាំង ធុយ បានមានប្រសាសន៍ប្រាប់វិទ្យុអាស៊ីសេរី នៅថ្ងៃទី២៦ ខែមីនាថា កាលពីថ្ងៃទី២២ ខែមីនា មេប៉ុស្តិ៍នគរបាលវៀតណាម ឃុំវៀនប៊ិន (VienBinh) បានចេញលិខិតកោះហៅលោកឲ្យទៅបំពេញបែបបទបញ្ជីគ្រួសារ ដើម្បីធ្វើការបោះឆ្នោតពេលខាងមុខ។ ផ្ទុយទៅវិញ លោក តាំង ធុយ បានបញ្ជាក់ថា អាជ្ញាធរបានបញ្ជូនរូបលោកពីឃុំវៀនប៊ិន ទៅឃុំខ្លួននៅខែត្រឃ្លាំង ហើយចោទលោកថា បានដឹកនាំព្រះសង្ឃធ្វើកូដកម្ម កាលពីថ្ងៃទី៨ ខែកុម្ភៈ ឆ្នាំ២០០៧ និងបានទាក់ទងជាមួយបងប្អូនរស់នៅក្រៅប្រទេស ដូចជានៅប្រទេសអាមេរិក និងប្រទេសដទៃទៀតជាដើម។
លោក តាំង ធុយ បានអះអាងថា នៅមុនពេលគេបានដោះលែងរូបលោកចេញពីកន្លែងឃុំឃាំងនៃខែត្រឃ្លាំង កាលពីល្ងាចថ្ងៃទី២៤ ខែមីនា ឆ្នាំ២០១១ អាជ្ញាធរវៀតណាម ខែត្រឃ្លាំង បានបង្ខំឲ្យលោកធ្វើកិច្ចសន្យាមិនឲ្យទាក់ទងជាមួយអ្នកសារព័ត៌មាន និងអ្នករស់នៅឯបរទេសឡើយ ៖ «គេដាក់គំនាបយ៉ាងធ្ងន់ធ្ងរដើម្បីគេ បំភិតបំភ័យឲ្យយើងភ័យខ្លាច មិនឲ្យយើងបញ្ចេញមតិបាន សង្កត់យក ដើម្បីមិនឲ្យយើងងើបឡើងរួច»។
លោក តំាង ធុយ ធ្លាប់បានចូលរួមជាមួយព្រះសង្ឃខ្មែរកម្ពុជាក្រោមប្រមាណ ២០០នាក់ ធ្វើកូដកម្មអហិង្សាកាលពីឆ្នាំ២០០៧ កន្លងទៅ ដើម្បីទាមទារសិទ្ធិសេរីភាពដែលអាជ្ញាធរវៀតណាម បានគាបសង្កត់មិនឲ្យធ្វើការបិណ្ឌបាត និងបង្ខំឲ្យព្រះសង្ឃធ្វើភ្នាក់ងារសម្ងាត់របស់អាជ្ញាធរវៀតណាម ជាដើម។
បន្ទាប់ពីលោកបានចូលរួមធ្វើកូដកម្មកាលពីឆ្នាំ២០០៧នោះ លោក តាំង ធុយ បានភៀសខ្លួនមករស់នៅក្នុងប្រទេសកម្ពុជា អស់រយៈពេល ១៣ខែ ដើម្បីគេចពីអាជ្ញាធរវៀតណាម តាមចាប់ខ្លួន ហើយនៅក្នុងឆ្នាំ២០០៨ លោកបានចូលទៅរស់នៅក្នុងឃុំវៀនប៊ិន ខែត្រឃ្លាំង ដល់បច្ចុប្បន្នវិញ។
នៅថ្ងៃទី២៦ ខែមីនា ឆ្នាំ២០១១នេះ វិទ្យុអាស៊ីសេរីមិនអាចទាក់ទងសុំការបំភ្លឺពីអាជ្ញាធរវៀតណាម ខែត្រឃ្លាំង អំពីការចាប់ឃុំខ្លួនលោក តាំង ធុយ កាលពីថ្ងៃទី២៣ ដល់ថ្ងៃទី២៤ បាននៅឡើយ៕ ប្រភព៖ វិទ្យុអាស៊ីសេរី
