ព្រះសង្ឃខ្មែរក្រោម១អង្គ ព្រះនាម ថាច់ វាសនា ព្រះជន្ម ២៩ព្រះវស្សា ដែលធ្វើដំណើរតាមជើងយន្តហោះ ពីក្រុងបាងកកទៅកាន់ក្រុងហូជីមិញ ត្រូវបានប៉ូលសវៀតណាមនៅព្រលានយន្តហោះឃាត់ខ្លួន នៅថ្ងៃទី១ មេសានេះ និងបង្ខំឲ្យឡើងយន្តហោះត្រឡប់ទៅក្រុងបាងកកវិញ។ ព្រះសង្ឃខ្មែរកម្ពុជាក្រោម ថាច់ វាសនា បានមានព្រះថេរដីកាតាមទូរស័ព្ទពីទីក្រុងហូជីមិញឲ្យដឹងថា ក្រោយពេលមកបួសរៀននៅក្រុងភ្នំពេញ ព្រះអង្គបានចាកចេញទៅរៀនបន្តវិជ្ជានៅក្រុងបាងកក ប្រទេសថៃ រយៈពេល ៣ឆ្នាំ ហើយនៅថ្ងៃទី១ មេសានេះ ព្រះអង្គក៏បាននិមន្តចេញពីបាងកកទៅក្រុងហូជីមិញ ប្រទេសវៀតណាម ដើម្បីទៅលេងស្រុកកំណើតនៅភូមិជ្រៃតាស ឃុំដើមជ្រៃ ស្រុកមាត់សមុទ្រ ខេត្តព្រះត្រពាំង ប្រទេសវៀតណាម។
ព្រះអង្គមានលិខិតឆ្លងដែនកម្ពុជាក្នុងការធ្វើដំណើរនោះ។ ព្រះសង្ឃ ថាច់ វាសនា មានព្រះថេរដីកាឲ្យដឹងទៀតថា ព្រះអង្គមិនព្រមឡើងយន្តហោះទៅប្រទេសថៃវិញទេ ព្រោះព្រះអង្គមិនមានកំហុសអ្វីទេ ៖ «ឥឡូវគេមិនឲ្យអាត្មាចូល ស្រុក អាត្មាចេញពីបាងកកហ្នឹង មកដល់នេះម៉ោង៩ ថ្ងៃទី១ ខែ៤។ អាត្មាមកពីបាងកក មកទីក្រុងព្រៃនគរ ហើយទៅលេងស្រុកកំណើតនៅខេត្តព្រះត្រពាំង។ អាត្មាទៅរៀននៅបាងកក ៣ឆ្នាំហើយ ពេលនេះអាត្មានិមន្តមកលេងស្រុក។ ឥឡូវមកដល់ព្រលានយន្តហោះត្រូវបានប៉ូលិសព្រលានឃុំឃាំង មិនឲ្យអាត្មាចូលស្រុក។ គេដេញឲ្យអាត្មាត្រឡប់ទៅបាងកកវិញ ហើយអាត្មាមិនទាន់ព្រមទៅ អាត្មានៅតវ៉ាបន្តិច…»។ ព្រះសង្ឃ ថាច់ វាសនា បានមានព្រះថេរដីកាបន្តថា ៖ «…មូលហេតុគេ ថា បញ្ហាសន្តិសុខ មិនអាចទទួលអាត្មាហ្នឹងឲ្យនៅក្នុងប្រទេសគេបានទេ គេថាអ៊ីចឹង ហើយអាត្មាបាននិយាយប្រាប់គេថា កន្លែងហ្នឹងគឺជាប្រទេសកំណើតរបស់អាត្មាដែរ អ៊ីចឹងអាត្មាទៅសិក្សារៀនសូត្រ ហើយត្រឡប់មកវត្តវិញ សួរសុខទុក្ខគ្រូ ញាតិញោម បងប្អូន ឪពុកម្ដាយអ៊ីចឹងទៅណា៎! គេថា គេមិនអាចទទួលបានទេ ឲ្យអាត្មាត្រឡប់ទៅកន្លែងដើមវិញ គឺទីក្រុងបាងកក»។ ព្រះសង្ឃ ថាច់ វាសនា បានមានព្រះថេរដីកាបន្ថែមថា ព្រះអង្គបានសុំអាជ្ញាធរវៀតណាម ដើម្បីជួបជាមួយអ្នកការទូតខ្មែរដែរ ប៉ុន្តែគេមិនអនុញ្ញាតឲ្យជួបទេ។ មកទល់នឹងពេលនេះ មិនទាន់មានការពន្យល់បកស្រាយណាមួយពីសំណាក់អាជ្ញាធរវៀតណាមនៅឡើយទេ៕ ប្រភពពី RFA .
