នាយកស្ថានីយវិទ្យុសម្បុកឃ្មុំសំឡេងប្រជាពលរដ្ឋទ្រទ្រង់ព្រះ ពុទ្ធសាសនា ដែលអ្នកស្ដាប់នៅកម្ពុជាស្គាល់ជាទូទៅថាវិទ្យុសម្បុកឃ្មុំនោះ បានប្រាប់វិទ្យុអាស៊ីសេរី នៅថ្ងៃនេះថា ស្ថានីយរបស់លោកនឹងធ្វើការផ្សាយបន្តផ្ទាល់ពីប្រទេសបារាំងស្ដីពី សន្និសីទទិវាខ្មែរក្រោមខួបឆ្នាំទី៦០ នៃការបាត់បង់ទឹកដីកម្ពុជាក្រោម ដែលនឹងប្រព្រឹត្តទៅនៅទីក្រុងប៉ារីស នៅចន្លោះម៉ោង ២ ទៅម៉ោង ៤រសៀល ម៉ោងនៅកម្ពុជា នាថ្ងៃសៅរ៍ ទី១៣ ខែមិថុនា ខាងមុខនេះ។
លោក ម៉ម សូណង់ដូ បានប្រាប់វិទ្យុអាស៊ីសេរីនៅមុននេះបន្តិចថា ដោយបញ្ហាខ្មែរក្រោម គឺជាបញ្ហាខ្មែរជាទូទៅ លោកពុំបានគិតថាការផ្សាយនេះនឹងមានផលប៉ះពាល់អ្វីទៅនឹងទំនាក់ ទំនងក្រុងហាណូយជាមួយរាជរដ្ឋាភិបាលភ្នំពេញឡើយ។
លោក ម៉ម សូណង់ដូ មានប្រសាសន៍ដូច្នេះថា ៖ «ខ្ញុំធ្វើករណីយកិច្ច របស់ខ្ញុំ។ ករណីយកិច្ចរបស់ខ្ញុំ គឺផ្សព្វផ្សាយអ្វីដែលខ្មែរកម្ពុជាក្រោម មានសកម្មភាពដើម្បីការពារសិទ្ធិសេរីភាព ទី១ ហើយទី២ ខ្ញុំយល់ថា បញ្ហាខ្មែរកម្ពុជាក្រោម គឺបញ្ហារបស់ខ្មែរ ១០០% ហើយទី៣ ទាក់ទងទៅនឹងប្រវត្តិសាស្រ្ដខ្មែរ ត្រូវឲ្យខ្មែរទាំងអស់គ្នាយល់ច្បាស់អំពីបញ្ហាកម្ពុជាក្រោម ដែលជាបញ្ហាអ្វីមួយ ឬក៏បញ្ហាសាសន៍មួយដែលកើតនៅក្នុងកម្ពុជាក្រោមនៅក្នុងស្រុកយួន តែម្ដង ឬក៏មូលហេតុយ៉ាងដូចម្ដេចបានមានកម្ពុជាក្រោម? ហេតុអ្វីបានខ្ញុំថា បញ្ហារបស់ខ្មែរ? ពីព្រោះបារាំងបានកាត់ដីខ្មែរហៅថាកម្ពុជាក្រោមទៅឲ្យយួន ប៉ុន្តែបារាំង មិនបានកាត់ប្រជាពលរដ្ឋខ្មែរឲ្យទៅយួនទេ»។
ចំណែកអតីតអគ្គលេខាធិការរងគណបក្សហ៊្វុនស៊ិនប៉ិចនិងអតីត តំណាងរាស្រ្ដមណ្ឌលកំពង់ធំ គឺលោក នឹង ស៊ិន ដែលមានឈ្មោះដើម សឺន សំរេច ហើយដែលជាសមាជិកខ្មែរក្រោមមួយរូប ក្នុងចំណោមសមាជិកជាង ២០រូបផ្សេងទៀតពីសហរដ្ឋអាមេរិកនិងកាណាដា ដែលបានទៅដល់ទីក្រុងប៉ារីស ៤ថ្ងៃមុនទិវាខ្មែរក្រោមចាប់ផ្ដើមនោះ បានមានប្រសាសន៍ថា ក្រុមលោកដែលមានកំណើតខ្មែរក្រោមពុំមានជម្រើសអ្វីក្រៅពីការតស៊ូ អហិង្សានេះឡើយ ៖ «យើងខ្ញុំចង់បង្ហាញពិភពលោកថា យើងខ្ញុំត្រូវតែធ្វើការតស៊ូអហិង្សាមួយដែលគ្មានជម្រើស ជម្រើសគឺត្រូវតែធ្វើ អត់មានជម្រើសណាផ្សេងទេ ដើម្បីរស់ជាមនុស្ស ក្នុងនាមប្រជាពលរដ្ឋខ្មែរ មានសេចក្ដីថ្លៃថ្នូរ មិនអាចព្រងើយកន្តើយ»។
រីឯលោក ថាច់ ង៉ុកថាច់ នាយកប្រតិបត្តិសហព័ន្ធខ្មែរកម្ពុជាក្រោមពិភពលោកឲ្យដឹងថា ទិវាខ្មែរក្រោមលើកនេះសំខាន់ណាស់ ព្រោះថាក្រៅពីហេតុផលមួយចំនួននោះ សហគមន៍អឺរ៉ុបនឹងត្រូវបានស្នើឲ្យបន្តការដាក់គំនាបលើរដ្ឋាភិបាល ហាណូយ ឲ្យដកកណ្ដាប់ដៃដែករបស់ខ្លួន ដើម្បីឲ្យខ្មែរកម្ពុជាក្រោមមានសិទ្ធិសម្រេចភ័ព្វវាសនារបស់ខ្លួន ដោយខ្លួនឯង។
លោក ថាច់ ង៉ុកថាច់ មានប្រសាសន៍ដូច្នេះថា ៖ «ទី១ ខួបទី៦០ គឺសំខាន់ ទី២ ប្រទេសបារាំងជាអ្នកដែលផ្ដល់សិទ្ធិឲ្យយួនគ្រប់គ្រងលើទឹកដី កម្ពុជាក្រោម។ យើងមកទីនេះ ដោយមានការសហការជាមួយអង្គការ UNPO អង្គការ TRP ហៅថា Trans-national Radical Party មជ្ឈមណ្ឌលសិទ្ធិមនុស្សក្រុងហាវ៉ៃ ព្រមទាំងយើងបានអញ្ជើញតំណាងសភាអឺរ៉ុប តំណាងអង្គការសហប្រជាជាតិ អ្នកឯកទេសច្បាប់អន្តរជាតិឲ្យមកចូលរួម។ ដូច្នេះក្រោយពីខួបរំឭកការបាត់បង់ទឹកដីទៅ គឺយើងនឹងរៀបចំការតវ៉ាតាមលក្ខណៈផ្លូវច្បាប់ តវ៉ាទៅតាមគណៈកម្មការ២១ ដកនឹមអាណានិគមចេញពីការគ្រប់គ្រងទឹកដីកម្ពុជាក្រោម។ ទី២ យើងជំរុញទៅដល់ក្រុងហ្សឺណែវ ក្រុមប្រឹក្សាសិទ្ធិមនុស្ស ហើយចំពោះមូលហេតុនៃការរំលោភសិទ្ធិមនុស្សមកលើខ្មែរក្រោម។ ទី៣ទៀត គឺថាយើងជំរុញតាមលក្ខណៈតុលាការ»៕
អត្ថបទវិទ្យុអាស៊ីសេរី.
