គ្រួសារខែ្មរកម្ពុជាក្រោមចំនួន ២៤នាក់ដែលអាជ្ញាធរថៃបានចាប់បញ្ជូនមកប្រ ទេសកម្ពុជាកាលពីពេលថ្មីៗនេះកំពុងតែស្ថិតក្រោមការគាំពារ និងឃ្លាំមើលដោយអង្គការការពារសិទ្ធិមនុស្សក្រៅរដ្ឋាភិបាល និងអង្គការសហប្រជាជាតិនៅក្នុងប្រទេសកម្ពុជា។ ប៉ុន្តែជោគវាសនារបស់ពួកគាត់នៅមិនទាន់ច្បាស់លាស់នៅទ្បើយទេ។
លោក ម៉ង់ ពុទ្ធី ប្រធានសមាគមប្រជាធិបតេយ្យ ឯករាជ សេដ្ឋកិច្ចក្រៅប្រព័ន្ធប្រចាំនៅក្នុងខេត្តបន្តាយមានជ័យជាប់ព្រំដែន កម្ពុជា-ថៃ បានមានប្រសាសន៍ថាគ្រួសារខែ្មរកម្ពុជាក្រោមទាំង ២៤នាក់នោះមានសុវត្ថិភាពជាធម្មតាទេ ប៉ុន្តែការហូបចុកគឺពួកគាត់ពឹងផ្អែកដោយខ្លួនឯង។
លោក ម៉ង៉ ពុទ្ធី បញ្ជាក់ថា៖ «បងប្អូនកម្ពុជាក្រោមគាត់នៅទីនេះ គាត់មានជីវភាពធូរធា គាត់ជួយឧបត្ថមខ្លះដែរណា! យើងជាអ្នកផ្តល់កន្លែងឲ្យស្នាក់នៅ»។
នាយរងប៉ុស្តិ៍នគរបាលប៉ោយប៉ែតខេត្តបន្ទាយមានជ័យ លោក តឹក យ៉ាឌី ដែលបានទទួលគ្រួសារទាំងនោះពីភាគីថៃថ្មីៗនេះបានមានប្រសាសន៍ថា៖ «មិនថាកម្ពុជាក្រោម ឬកម្ពុជាលើអីទេឲ្យតែឃើញកម្ពុជា យើងទទួលហើយអប់រំ។ បានថៃបញ្ជូនមកអ៊ីចឹងរួចទុក្ខទោសហើយ។ យើងអត់មានធ្វើអីគេទេ គឺយើងឲ្យគេចេញប្រញ៉ាប់ទៅផ្ទះតែម្តង»។
ខែ្មរកម្ពុជាក្រោមម្នាក់នៅក្នុងចំណោមគ្រួសារខែ្មរកម្ពុជាក្រោម ២៤នាក់ឈ្មោះ ចៅ ហេន ដែលកំពុងតែរស់នៅបណ្តោះអាសន្នក្រោមកិច្ចគ្រប់គ្រងដោយអង្គការ ក្រៅរដ្ឋាភិបាលខាងលើនេះនៅប៉ោយប៉ែតខេត្តបន្ទាយមានជ័យបានថែ្លង ប្រាប់វិទ្យុអាស៊ីសេរីថា ៖ «សុំអំពាវនាវដល់អាជ្ញាធរប្រទេសកម្ពុជាយើងដើម្បីជួយអន្តរាគមផ្តល់ សិទ្ធិជ្រកកោណអ្វីមួយដែលស្របច្បាប់លើពលរដ្ឋរបស់ខ្មែរ ហើយដោយមានការរស់នៅពឹងពាក់ពំនាក់អស្រ័យប្រចាំថ្ងៃ»។
នៅមិនទាន់មានការបញ្ចាក់ជាផ្លូវការណាមួយនៅទ្បើយទេពី មន្រ្តីក្រសួងមហាផៃ្ទ ឬក្រសួង ការបរទេសកម្ពុជាអំពីជោគវាសនានៃគ្រួសារខែ្មរកម្ពុជាក្រោម ២៤នាក់នោះ។
លោក ថាច់ ឈួនយ៉ាត ប្រធានអង្គភាពស៊ើបអង្កេតសមាគមការពារសិទ្ធិមនុស្សខែ្មរកម្ពុជា ក្រោមនៅក្នុងប្រទេសកម្ពុជាដែលកំពុងតែតាមដានករណីខាងលើនេះ បានមានប្រសាសន៍ថា ៖ «ខ្ញុំព្រួយបារម្ភខ្លាំងណាស់ត្រង់ថាទី ១គាត់អត់មានទីជម្រកមិនដឹងគាត់ទៅនៅឯណា។ មួយទៀត បើអាជ្ញាធររបស់កម្ពុជាយើងហ្នឹងមានការចាត់វិធានការឲ្យស្នាក់នៅ ប្រទេសកម្ពុជានេះ ជាការល្អមួយ ហើយប្រហែលជាគាត់នៅហើយ មិនទៅណាទេ។ ប៉ុន្តែបើសិនណាមានការចាប់បញ្ជូនទៅវៀតណាមវិញនោះ គឺគ្រោះថ្នាក់ណាស់ ព្រោះពួកគាត់មកហ្នឹងព្រោះមានបញ្ហាតវ៉ារឿងដីធ្លីជាមួយវៀតណាម»។
គ្រួសារខែ្មរកម្ពុជាក្រោមចំនួន ២៤នាក់ខាងលើនេះ បានរត់គេចខ្លួនពីខេត្តអានយ៉ាងទឹកដីខែ្មរ
កម្ពុជា ក្រោមដែលកំពុងកាន់កាប់ដោយវៀតណាមកាលពីឆ្នាំ២០០៨កន្លងទៅ ទៅកាន់ប្រទេសថៃ ដើម្បីសុំសិទ្ធិជ្រកកោណនៅប្រទេសទី៣ ក្រោយពីអាជ្ញាធរវៀតណាមបានតាមចាប់ខ្លួនដោយសារតែពួកគាត់ទាំងនោះ បានងើបតវ៉ាទាមទារដីធ្លីពីដូនតាមកវិញកាលពីឆ្នាំ២០០៧កន្លងទៅ។
ក្រោយមកពួកគាត់ត្រូវបានអាជ្ញាធរថៃចាប់បញ្ជូនពីប្រទេសថៃមក ប្រទេសកម្ពុជា តាមច្រកព្រំដែនប៉ោយប៉ែត ខេត្តបន្ទាយមានជ័យ កាលពីថៃ្ងសៅរ៍ ចុងសប្តាហ៌កន្លងទៅថ្មីៗនេះប្រគល់ឲ្យអាជ្ញាធរកម្ពុជា៕
ប្រភពពីវិទ្យុអាស៊ីសេរី.
