លោកនាយករដ្ឋមន្រ្តី ហ៊ុន សែន នៅថ្ងៃសុក្រ បានចេញមុខប្រកាសថា លោកនឹងមិនធ្វើតាមសំណើរបស់បក្សប្រឆាំងដែលស្នើឲ្យលោកចុះចេញពីតំណែង និងរំលាយសភា ជាដាច់ខាត ។
ថ្លែងប្រាប់ក្រុមអ្នករាយការណ៍ព័ត៌មាន បន្ទាប់ពីចូលរួមប្រជុំសភា លោក ហ៊ុន សែន ក៏រំលេចផងដែរនូវរដ្ឋធម្មនុញ្ញ ដែលចែងអំពីការមិនអាចរំលាយរដ្ឋសភាបាន ទោះព្រះមហាក្សត្រ ឬនាយករដ្ឋមន្រ្តី ក៏មិនអាចរំលាយបានដែរ ។
លោក ហ៊ុន សែន បានថ្លែងផងដែរ ការធ្វើបាតុកម្មបិទផ្លូវណាមួយ មិនមែនត្រឹមប៉ះពាល់ ដល់រាជរដ្ឋាភិបាល និងស្ថាប័នរដ្ឋនោះទេ ប៉ុន្តែប៉ះពាល់ដល់ជីវភាពរបស់ប្រជាពលរដ្ឋ ជាអ្វីដែលលោកនាយករដ្ឋមន្រ្តីចាត់ទុកថា បិទផ្លូវ ដូចបិទឈាមខ្លួនឯងយ៉ាងដូច្នេះដែរ ។
គួររំឭកថា មេដឹកនាំគណបក្សសង្រ្គោះជាតិ បាតុករ បានស្នើឱ្យលោកនាយករដ្ឋមន្រ្តី ចុះចេញពីតំណែង និងរំលាយសភា ព្រមទាំងឱ្យមានការបោះឆ្នោតឡើងវិញជាមួយនឹងការគំរាមធ្វើបាតុកម្មបិទផ្លូវ ជាដើម ។
លោក ហ៊ុន សែន អះអាងថា រដ្ឋាភិបាលមានការអត់ធ្មត់ គោរពសិទ្ធិប្រជាពលរដ្ឋ ក្នុងការធ្វើបាតុកម្មដោយសន្តិវិធី ប៉ុន្តែរដ្ឋាភិបាល មិនអាចទទួលយកទង្វើទាំងឡាយណាដែលប៉ះពាល់ដល់សន្តិសុខជាតិនោះឡើយ ៕
