ដោយ ថាច់ ប្រីជា គឿន l សារព័ត៌មាន ព្រៃនគរ
នៅថ្ងៃទី ២៧ ខែធ្នូ ជាថ្ងៃទី ២ នៃដំណើរទស្សនកិច្ចរបស់ លោក ហ៊ុន សែន ទៅប្រទេសវៀតណាម ។ នៅថ្ងៃនេះ លោក ហ៊ុន សែន បានជួបអតីតកងទ័ព និងមេបញ្ជាការវៀតណាម ប្រមាណ ៥០០ នាក់ អ្នកដែលធ្លាប់បានចូលវាយលុករបប ប៉ុល ពត នៅប្រទេសកម្ពុជា កាលពីថ្ងៃទី ០៧ ខែមករា ឆ្នាំ ១៩៧៩ ។
ថ្លែងទៅកាន់អ្នកចូលរួម លោក ហ៊ុន សែន បាននិយាយជាភាសាយួនរំឭកពីគុណបំណាច់របស់ វៀត ណាម ថា ពលរដ្ឋ កម្ពុជាបានទទួលលទ្ធផល រយៈពេល ៣៥ ឆ្នាំ ក្រោយពីរបបខ្មែរក្រហម ដួលរលំនេះ ក៏អាស្រ័យ លើបំណាច់នៃការ ជួយសង្គ្រោះពីវៀតណាម ដែលលោកលើកឡើងថា ជា សគុណ មិនអាចបំភ្លេចបានឡើយ ។ លោកបន្តថា ប្រសិនបើមិន មានកង ទ័ពស្មគ្រចិត្តវៀតណាមមក ជួយទេ កម្ពុជាមិនរំដោះខ្លួនចេញ ពីរបប ប៉ុល ពត ឡើយ ។
លោក ហ៊ុន សែន បានថ្លែងថា៖
“ប្រសិនបើពេលនោះ មិនមានជំនួយពីកងទ័ពស្មគ្រចិត្តវៀតណាម គឺកម្ពុជាមិនអាចរំដោះទឹកដីបានទេ ។ ខ្ញុំគិតគូរថា ប្រសិនបើពេលនោះ មានតែកម្លាំងកងទ័ពរបស់កម្ពុជា វាត្រូវអូសបន្លាយដល់ទៅ ៥ ឆ្នាំ ។ តែបើ ៥ ឆ្នាំ ពលរដ្ឋកម្ពុជាស្លាប់អស់ហើយ ។ ពេលនោះ វៀតណាមត្រូវតថ្លៃខ្ពស់ណាស់ មានន័យថា ត្រូវពលិជីវិត ប្រ ជាពលរដ្ឋ កងទ័ពវៀតណាម ត្រូវចំណាយទ្រព្យសម្បត្តិវៀតណាម ត្រូវពលីកម្មខាង នយោបាយ និងកិច្ចការ បរទេសរបស់វៀតណាម ។ បញ្ហានេះ មិនអាចបំភ្លេចចោលបានឡើយ” ។
លោក ហ៊ុន សែន បានបន្តរំឭករឿងដើមថា លោកធ្លាប់បានភៀសខ្លួនទៅវៀតណាម ហើយត្រូវបានជន ជាតិយួនដាក់ ឈ្មោះ ឲ្យលោកជាភាសាយួនថា ម៉ាយ ផុក (Mai Phuc) ពេលដែលលោកមានអាយុ ២៥ ឆ្នាំ ។
លោក ហ៊ុន សែន បានថ្លែងថា៖
“ពេលនោះ គ្រូពេទ្យ បានដាក់ឈ្មោះឲ្យខ្ញុំថា ម៉ាយផុក អាយុ ២៥ ឆ្នាំ នៅភូមិភាគយោធា X ។ ដូច្នេះ កាល នោះ ខ្ញុំមិនចេះនិយាយភាសាយួនទេ ។ រំឭកដល់រឿងនោះ វាជារឿងមួយ ធ្វើឲ្យខ្ញុំ ត្រូវតែចងចាំ ដល់ទីតាំង ដែលខ្ញុំជាអ្នកបញ្ជាការ” ។
នៅថ្ងៃទី ២៧ នេះដែរ លោក ហ៊ុន សែន ក៏បានចូលដាក់កម្រងផ្កាគោរពវិញ្ញាណក្ខន្ធ លោក ហ៊ូ ជី មិញ មេបក្សកុម្មុយនិស្ត វៀតណាម នៅរដ្ឋធានីហាណូយ ផងដែរ ។
ទាក់ទងនឹង លោក ហ៊ុន សែន និយាយភាសាយួនក្នុងដំណើរទស្សនកិច្ចផ្លូវការនៅវៀតណាមនេះ ត្រូវបានអ្នកប្រើ បណ្ដាញ សង្គម Facebook រិះគន់ចំពោះ លោក ហ៊ុន សែន យ៉ាងខ្លាំងថាជា ទង្វើនេះមិនសម នឹងមេដឹកនាំប្រទេសមួយ ឡើយ ។ ការរិះគន់នេះធ្វើឡើង បន្ទាប់ពីមានវីដេអូឃ្លីបមួយដែល មានរយៈ ពេលប្រមាណ ៤ នាទីកន្លះ ផ្សាយលើកញ្ចក់ ទូរទស្សន៍ជាតិវៀតណាម (VTV) ហើយត្រូវបានអ្នកប្រើបណ្ដាញ់សង្គម Facebook យកមកផ្សព្វផ្សាយបន្ត ។
នាង ធី សុវណ្ណថា ម្ចាស់គេហទំព័រ I love Cambodia Hot News បានដាក់វីដេអូឃ្លីបមួយនេះឡើង លើ ទំព័រ Facebook របស់ខ្លួន ភ្ជាប់ជាមួយពាក្យរិះគន់ថា៖
“ហ៊ុន សែន កំពុងគោរព និង រំឭកដឹងគុណយួន ទៀតហើយនិយាយឱនលំទោន ជាភាសា យួនតែម្ដង” ។
អ្នកប្រើ Facebook ម្នាក់ឈ្មោះ Souvarda Ly បានរិះគន់ថា៖
“ក្នុងនាមជាមេដឹកនាំម្នាក់បែរទៅនិយាយភាសាគេ ខ្វះអ្នកបក ប្រែមែន ? ឬ មិនទុកចិត្តអ្នកបកប្រែ ? មេដឹកនាំប្រទេសភាគច្រើន ទោះបី ចេះច្រើន ភាសាយ៉ាងណាក៏ដោយ ក៏គេមិន និយាយ ភាសាអ្នកដទៃ ដោយខ្លូនឯងនៅមុខមហាជនហូរហែដែរ គឺគេ រក្សាទំនៀមទំលាប់ ប្រពៃណីយរបស់ គេរៀងៗ ខ្លូន”។
អ្នកប្រើ Facebook ម្នាក់ឈ្មោះ Sukun Dara បានសរសេររិះគន់ថា៖
“មិនមែនរំឭកគុណទេ គឺទៅអូស ទាញយួនមកគាំទ្រ អំណាចខ្លួន ។ ក្នុងករណីប្រដាប់អាវុធ ណាមួយងាយស្រួលពឹងគេទៀត ។ ព្រោះ ហ៊ុន សែន ដឹងថាកៅអីខ្លួនចាប់ ផ្តើមក្តៅ ហើយ” ។
ទូរទស្សន៍ជាតិយួន (VTV) បានផ្សាយថា នេះជាលើកទីមួយហើយ ដែល លោក ហ៊ុន សែន នាយករដ្ឋ មន្ត្រីនៃប្រទេស កម្ពុជា បាននិយាយភាសាយួន នៅក្នុងកិច្ចប្រជុំផ្លូវការរវាងប្រទេសទាំងពីរ ខណៈមិនដែល មានមេដឹកនាំនៃប្រទេសណា មួយមក បំពេញទស្សនកិច្ចជាផ្លូវការនៅវៀតណាម ហើយនិយាយភាសាការ ទូតជាភាសាយួនឡើយ ។
ដំណើរទស្សនកិច្ចរបស់ លោក ហ៊ុន សែន ទៅវៀតណាមនេះ ត្រូវបានប្រធានគណបក្សសង្គ្រោះជាតិ បានថ្លែងចំអកឲ្យថា ទៅទទួលការបង្រៀនពីមេដឹកនាំវៀតណាម ។
លោក សម រង្ស៊ី បានថ្លែងដូចនេះ កាលពីយប់ថ្ងៃទី ២៥ ខែធ្នូ លើវេទិកានៅទីលានប្រជាធិបតេយ្យ ខណៈប្រជាពលរដ្ឋជាច្រើនម៉ឺននាក់ ឈរស្ដាប់លោក ថ្លែងពីបញ្ហានយោបាយប្រទេស និងករណីរបស់កម្មករ ។
លោក សម រង្ស៊ី បានថ្លែងថា ការធ្វើដំណើររបស់ លោក ហ៊ុន សែន នៅវៀតណាម នៅថ្ងៃទី២៦ ខែធ្នូ គឺសមល្មម ដែលលោកចង់ឃើញ លោក ហ៊ុន សែន មិនត្រឡប់មកវិញ ។ លោកបន្តថា ប្រជាជនកម្ពុជា លែងគាំទ្រ លោក ហ៊ុន សែន ជានាយករដ្ឋមន្ត្រីទៀតហើយ ។ លោកសម រង្ស៊ី បានថ្លែងចំអកឲ្យ លោកហ៊ុន សែន ដូចនេះថា ៖
“គាត់មានការព្រួយបារម្ភ គាត់ទៅសួរចៅហ្វាយគាត់ថាធ្វើម៉េចឥឡូវហ្នឹង តាមខ្ញុំយល់ ប្រហែលជាយួនអត់សប្បាយចិត្តទេ ពីព្រោះយួនបានបង្រៀនគាត់ ថាឲ្យមកបោកបញ្ឆោតខ្មែរ តែឥឡូវខ្មែរឈប់ជឿ ឥឡូវធ្វើម៉េចទៅ? អញ្ចឹងបានយួនហៅ ហ៊ុន សែន ទៅបង្រៀនម្តងទៀត ប៉ុន្តែត្រូវការរៀនយូរបន្តិច ប្រហែលអត់ឲ្យមកវិញទេ នៅទីនោះទៅ នៅស្រុកយួនទៅ។ ហើយបើនៅស្រុកយួន នៅទៀតទៅ មិនបាច់មកវិញទេ ត្រូវតែរើសនាយករដ្ឋមន្ត្រីថ្មី”។
