វិញឡុង – វៀតណាម: លេខាបក្សកុម្មុយនីស្តវៀតណាម អះអាងថា ប្រជាជនខ្មែរកម្ពុជាក្រោម ដែលសព្វថ្ងៃមានសញ្ជាតិវៀតណាម ហើយបានក្លាយជាជនជាតិភាគតិច នៅវៀតណាម ត្រូវបានបក្សជ្រើសរើសបញ្ចូលជាបក្ខជន មានតំណែងតួនាទី និងកាន់ការក្នុងបក្ស និងមូលដ្ឋានគ្រប់មន្ទីរអង្គភាព។ ឯកុមារ និងយុវជនខ្មែរកម្ពុជាក្រោម ក៏ត្រូវលើកកម្ពស់អភិវឌ្ឍន៍ជាធនធានមនុស្សល្អ ចេះដឹង តាមរយៈការបំប៉នជីវភាព សុខភាព ឲ្យរៀនសូត្រ និងមានអគារអន្តេវាសិកដ្ឋាន ស្នាក់នៅតាំងពីរៀនថ្នាក់ទី៨ ដល់ ទី១២ សាលាចំណេះទូទៅ និងបានប្រឡងជាប់រៀននៅមហាវិទ្យាល័យ មានជំនាញនានា។ទាំងនេះជាការអះអាងរបស់អ្នកស្រី ដាង ធីង៉ុកធីញ សមាជិកមជ្ឈិមបក្សកុម្មុយនីស្តវៀតណាម និងជាលេខាបក្ស ខេត្តវិញឡុង នៅទីស្នាក់ការបក្សខេត្តវិញឡុង ប្រទេសវៀតណាម ខណៈជួបប្រតិភូជាន់ខ្ពស់គណបក្សប្រជាជនកម្ពុជា-ខេត្តបន្ទាយ មានជ័យ ដឹកនាំដោយលោក អ៊ុង អឿន សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណបក្សខេត្ត កាលពីថ្ងៃទី២៣ មេសា ឆ្នាំ២០១២។
អ្នកស្រី ធីញ និយាយបន្តថា ជនជាតិខ្មែរក្រោមជិត ៣ % នៅខេត្តនេះ ត្រូវបានបក្ស និងរដ្ឋ ជួយលើកកម្ពស់ជីវភាពផុតពីភាពក្រីក្រ ៣៦ % ក្នុង ២ ឆ្នាំចុងក្រោយនេះ។
លេខាបក្សខេត្តរូបនេះ និយាយពីគោលនយោបាយបក្សថា ជនជាតិខ្មែរ ដែលមានគុណសម្បត្តិ គុណបំណាច់ក្នុងបដិវត្ត ត្រូវបានលើកទឹកចិត្ត។ ជនជាតិខ្មែរ ក៏ចេះសម្របសម្រួលរស់នៅធើ្វការជាមួយជនជាតិវៀតណាម និងជនជាតិដទៃទៀត ហើយចេះសាមគ្គីភាពទំនាក់ទំនងល្អ។
ក្នុងឱកាសនោះ លោក អ៊ុង អឿន ប្រធានគណបក្សប្រជាជនកម្ពុជា ខេត្តបន្ទាយមានជ័យ និងជាអភិបាលខេត្តបន្ទាយមានជ័យ បានលើកឡើងថា គណបក្សខិតខំបន្តធើ្វល្អ និងដើម្បីសេចក្តីចម្រើនរបស់ពលរដ្ឋ ទើបពលរដ្ឋគ្រាំទ្របោះឆ្នោតជូនរហូតមក។
លោកនិយាយដូច្នេះ ឆ្លើយតបនឹងលេខាបក្សកុម្មុយនីស្តវៀតណាមខេត្តវិញឡុង ដែលថា បក្សបានធើ្វគំរូល្អ ទើបប្រជាជនស្រឡាញ់ និងជំហរគាំទ្រ។ កម្មាភិបាលវៀតណាមអះអាងពីការចាត់តាំងកម្មាភិបាលបក្ស និងរដ្ឋសួរសុខទុក្ខជនជាតិភាគតិចខ្មែរ ក្មុងឱកាសបុណ្យចូលឆ្នាំខ្មែរ និងពិធីប្រពៃណីនានា។ ប៉ុន្តែគេពុំឃើញលេខាបក្សខេត្តរូបនេះ អះអាងពីការបន្ធូរបន្ថយសេរីភាពនានា ដល់ពលរដ្ឋខ្មែរកម្ពុជាក្រោមនោះទេ៕ ប្រភពព័ត៌មាន៖ CEN
សំឡេងកម្ពុជាក្រោម
Friday, September 29, 2023
ព្រឹត្តិប័ត្រ កម្ពុជាក្រោម លេខ ៩៤
កាសែត ព្រៃនគរ លេខ ៤៥
KKFYC Quarterly Vol.11 Aug 2014
P.O Box 51201 San Jose CA 95151 USA
(408) 550-5060 (USA)
vokk2001@gmail.com
%d bloggers like this: