តាងនាមអោយគ្រួសារសព លោក សំ បូរិន្ទ ខ្ញុំព្រះករុណា នាងខ្ញុំ ខ្ញុំបាទ ជាភរិយា ព្រមទាំងបុត្រធីតាទាំងបួនរូប សូមថ្លែងអំណរគុណយ៉ាងជ្រាលជៅ្រចំពោះ ព្រះតេជគុណគ្រប់ព្រះអង្គ ញាតិមិត្តជិតឆ្ងាយ ព្រមទាំងបងប្អូនសប្បុរសជនទាំងអស់ ដែលមានសន្តានចិត្តដ៏បរិសុទ្ធ ជ្រះថ្លា បានស្រុះស្រួលមូលមតិគ្នាជួយគាំទ្រ ចាត់ចែងនិងរៀបចំពិធីបុណ្យបូជាសព ស្វាមី និងបិតា របស់ខ្ញុំព្រះករុណា នាងខ្ញុំ ខ្ញុំបាទទាំងអស់គ្នាអោយ អាចប្រព្រឹត្តិទៅ ប្រកបដោយភាពសមរម្យ និងជោគជ័យ។
ខ្ញុំព្រះករុណា នាងខ្ញុំ ខ្ញុំបាទ ជាភរិយា និងជាបុត្រធីតា ក៏សូមថ្លែងអំណរគុណម្តងទៀត ចំពោះព្រះតេជគុណគ្រប់ព្រះអង្គ សហព័ន្ធខ្មែរកម្ពុជាក្រោម ដែលមានលោកប្រធានប្រតិបត្តិ ថាច់ ង៉ុក ថាច់ ជាមេដឹកនាំ សាខាសហព័ន្ធនៅតាមបណ្តារដ្ឋនានា នៅក្នុងសហរដ្ឋអាមេរិក ប្រទេសកាណាដា ប្រទេសបារាំង សហគមន៍អឺរុប សមាគមន៍ និងគណ:បក្សនានា ព្រមទាំងបងប្អូនញាតិមិត្តជិតឆ្ងាយទាំងអស់ ដែលបានចូលបច្ច័យតាមរយ:ប្រអប់សំបុត្រ តាមរយ:វិទ្យុខ្មែរពិភពលោក និងមកដោយផ្ទាល់ ដើម្បីជាកិច្ចចូលរួមមរណ:ទុក្ខ និងជួយសំរួលនៅក្នុងការចំណាយសំរាប់ពិធីបុណ្យបូជាសព ស្វាមីនិងបិតារបស់ខ្ញុំព្រះករុណា នាងខ្ញុំ ខ្ញុំបាទទាំងអស់គ្នា។
ខ្ញុំព្រះករុណា នាងខ្ញុំ ខ្ញុំបាទ ក៏សូមឆ្លៀតពេលនេះសូមថែ្លងអំណរគុណផងដែរ ចំពោះបងប្អូនញាត្តិមិត្តទាំងអស់គ្នានៅក្នុងសហរដ្ឋអាមេរិកក្តី កាណាដាក្តី និងពីក្នុងមាតុភូមិកម្ពុជាក្តី ដែលលោកបានខំប្រឹងប្រែង ផ្ញើរថ្នាំ ស្វះស្វែងរកគ្រូបុរាណ តាំងសីលធ្វើសមាធិពីចំងាយជាក្រុម ឬដោយម្នាក់អែង ក្នុងគោលបំណងជួយព្យាបាលស្វាមីព្រមទាំងបិតាយើងខ្ញុំអោយបានជាសះស្បើយ។ ទោះបីស្វាមីនិងបិតារបស់យើងខ្ញុំមិនអាចជាសះស្បើយបានដូចបំណងក្តី និងបានលាយើងទាំងអស់ទៅកាន់ភពថ្មីហើយក៏ដោយក្តី ក៏ការខំស្វះស្វែងខ្នាស់ខ្នែង ដែលផុះចេញពីឆន្ទ:ដ៏បរិសុទ្ធរបស់ព្រះតេជគុណ និងលោកអ្នកទាំងអស់គ្នា មិនអាចអោយយើងខ្ញុំជាគ្រួសារភ្លេចបានឡើយ។ សន្តានចិត្តស្រឡាញ់ស្មោះស្ម័គ្ររបស់លោកអ្នក ចំពោះស្វាមីនិងបិតារបស់យើងខ្ញុំដែលមិនអាចរកបាននេះ និងគុណូបការ:របស់ព្រះតេជគុណនិងលោកអ្នកទាំងអស់គ្នា នៅតែដក់ជាប់ក្នុងបេះដូង របស់ខ្ញុំព្រះករុណា នាងខ្ញុំ ខ្ញុំបាទជានិច្ច។
ដោយពេលវេលាមិនអនុគ្រោះ ខ្ញុំព្រះករុណា នាងខ្ញុំ ខ្ញុំបាទ សូមអភ័យទោសពីសំណាក់លោកអ្នកជាសប្បុរសជនទាំងអស់ ដោយយើងខ្ញុំមិនអាចរៀបរាប់ព្រះនាមនិងនាមបានគ្រប់ៗគ្នានៅក្នុងសេចក្តីថ្លែងនេះ។ ទោះបីយ៉ាងណាក្តី ព្រះនាមរបស់ព្រះតេជគុណ ព្រមទាំងនាមរបស់លោកអ្នក ត្រូវបានលោកប្រធានវិទ្យុខ្មែរពិភពលោក ចាត់ចែងផ្សាយជូនជ្រាបតាមថ្ងៃនីមួយៗ ព្រមទាំងមានដាក់ជាអក្សររត់នៅលើគេហទំព័រនៃវិទ្យុនោះទៀតផង។ ខ្ញុំព្រះករុណា នាងខ្ញុំ ខ្ញុំបាទ សូមអភ័យទោសម្តងទៀត ចំពោះការខុសឆ្គងទាំងឡាយណាដែលកើតមានជាពាក្យសំដីក្តី ឬជាកាយវិការក្តី ពីសំណាក់ខ្ញុំព្រះករុណា នាងខ្ញុំនិងបុត្រធីតា នៅមុន ឬក្រោយពិធី ឬតទៅមុខទៀតក្តី។ ខ្ញុំព្រះករុណា នាងខ្ញុំ ខ្ញុំបាទសង្ឃឹមថា ព្រះតេជគុណ ព្រមទាំងបងប្អូនញាតិ្តមិត្តិទាំងអស់ពិតជាយោគយល់ ផ្តល់មេត្តាធ៌ម ព្រមទាំងអនុគ្រោះចំពោះការខ្វះខាតនេះ ដល់ខ្ញុំព្រះករុណា នាងខ្ញុំ ខ្ញុំបាទជាក់ជាមិនខាន។
ជាទីបពា្ចប់ ខ្ញុំព្រះករុណា នាងខ្ញុំ ខ្ញុំបាទ សូមថ្វាយព្រះពរនិងជូនពរព្រះតេជគុណគ្រប់ព្រះអង្គ ព្រមទាំងសប្បុរសជន និងបងប្អូនញាត្តិមិត្តទាំងអស់ សូមមានសុខភាពបរិបូណ៌ ទទួលជោគជ័យក្នុងការងារនិងអាជីវកម្ម ព្រមទាំងមានអាយុយឺនយូរ រស់នៅជួបជុំគ្រួសារដោយសុខសាន្ត និងពោរពេញទៅដោយភាពសប្បាយរីករាយជាអង្វែងតរៀងទៅ។
សូមអរព្រះគុណ និងអរគុណ ! ដោយសេចក្តីគោរព
ពីគ្រួសារសព លោក សំ បូរិន្ទ
