សហព័ន្ធខ្មែរកម្ពុជាក្រោមបានចេញលិខិតចំហមួយដោយចោទប្រកាន់សម្តេច ព្រះសង្ឃរាជគណៈមហានិកាយខ្មែរនិងមេដឹកនាំព្រះសង្ឃព្រះពុទ្ធសាសនា មួយចំនួនទៀតថាបានប្រតិបត្តិកិច្ចការរំលោភសិទ្ធិមនុស្សនិង គោលការណ៍ព្រះពុទ្ធសាសនាទៀតផង។
មេដឹកនាំសហព័ន្ធខ្មែរកម្ពុជាក្រោមដែលមានមូលដ្ឋាននៅសហរដ្ឋ អាមេរិកបានធ្វើការអំពាវនាវនៅថ្ងៃ១៩ កញ្ញា សុំឲ្យស្ថានទូតបរទេសនៅកម្ពុជានិងសហគមន៍ខ្មែរនានានៅឯបរទេសផងដែរ ឈប់ផ្តល់ទិដ្ឋាការនិងគាំទ្រដល់សកម្មភាពរបស់មេដឹកនាំព្រះសង្ឃ ព្រះពុទ្ធសាសនាខ្មែរមួយចំនួនដែលត្រូវបានចោទប្រកាន់ពីបទរំលោភ សិទ្ធិមនុស្សនិងប្រតិបត្តិប្រាសចាកគន្លងព្រះពុទ្ធសាសនា។
លោក ថាច់ ង៉ុកថាច់ ប្រធានប្រតិបត្តិសហព័ន្ធខ្មែរកម្ពុជាក្រោម បានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទថា ដោយសារតែរយៈពេលកន្លងមកថ្មីៗនេះមានកើតនូវអំពើរំលោភសិទ្ធិមនុស្ស ជាច្រើនដែលប្រព្រឹត្តនិងដឹកនាំដោយមេដឹកនាំព្រះសង្ឃខ្មែរ ជាពិសេសគឺករណីរបស់ព្រះតេជគុណ ទឹម សាខន ដែលត្រូវគេចាប់ផ្សឹកនិងបញ្ជូនទៅដាក់គុកក្នុងប្រទេសវៀតណាមនោះ។
លោក ថាច់ ង៉ុកថាច់ បានបញ្ជាក់ថា ៖ «ផ្សឹកលោកគ្រូ ទឹម សាខន ហើយជាមួយនឹងចូលរួមក្នុងការទៅវ៉ៃព្រះសង្ឃនៅពេលដែលព្រះសង្ឃខ្មែរ ក្រោមយើងធ្វើញត្តិដាក់នៅទូតយួន»។
លោក ថាច់ ង៉ុកថាច់ បានមានប្រសាសន៍បន្តថា ដូច្នេះហើយបានជាលោកចង់ឲ្យមានការដាក់ពិន័យដល់មេដឹកនាំព្រះសង្ឃ ព្រះពុទ្ធសាសនាខ្មែរទាំងនោះដែលមិនមានគំរូល្អសម្រាប់ពុទ្ធ បរិស័ទខ្មែរឡើយ។
លោក ថាច់ ង៉ុកថាច់ បានថ្លែងថា ៖ «ព្រះសង្ឃទាំងអស់ហ្នឹងមិន គោរពនូវវិន័យសង្ឃ ធ្វើនូវបទឧក្រិដ្ឋកម្មចំពោះមនុស្សជាតិ វាខុសនឹងខ្លួនជាមេដឹកនាំក្នុងផ្នែកព្រះពុទ្ធសាសនា»។
នៅក្នុងលិខិតចំហនោះបានរាយនាមមេដឹកនាំព្រះសង្ឃចំនួន៧អង្គ ដែលបានចោទប្រកាន់ថាបានប្រព្រឹត្តខុសឆ្គងនោះ រួមមាន៖ សម្តេចព្រះអគ្គមហាសង្ឃរាជាធិបតី ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា គង់នៅវត្តឧណ្ណាលោម, សម្តេចព្រះមហាសុមេធាធិបតី នន្ទ ង៉ែត សម្តេចព្រះសង្ឃនាយកនៃព្រះរាជាណាចក្រកម្ពុជា គង់នៅវត្តបទុមវតី, សម្ដេចព្រះពោធិវង្ស អំ លឹមហេង គង់នៅវត្តចំពុះក្អែក ខេត្តកណ្ដាល, ព្រះតេជគុណ ឡុង គឹមលាង កំពុងគង់នៅវត្តខ្មែរមួយនារដ្ឋកាលីហ្វ័រញ៉ា សហរដ្ឋអាមេរិក, ព្រះតេជគុណ សៅ ចាន់ថុល ឧត្តមក្រុមប្រឹក្សាគណៈសង្ឃនាយក គង់នៅវត្តលង្កា, ព្រះតេជគុណ ណយ ច្រឹក គង់នៅវត្តច័ន្ទបុរីវង្ស នាស្រុកពញាឮ ខេត្តកណ្តាល និងព្រះតេជគុណ ជៀស ឱម គង់នៅវត្តសីហរតនារាមក្នុងខេត្តតាកែវ។
នៅពេលនេះមិនទាន់មានប្រតិកម្មពីមេដឹកនាំព្រះសង្ឃខ្មែរចំពោះ ការចោទប្រកាន់នោះទេ ប៉ុន្តែលោក ផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្រ្តី បានមានប្រសាសន៍ចំពោះការចោទប្រកាន់ក្នុងលិខិតចំហនោះថា ៖ «យើង មានច្បាប់ទម្លាប់របស់រាជាណាចក្រកម្ពុជា អង្គការសាសនាគឺជាអង្គការសាសនារបស់រដ្ឋ ម៉្លោះហើយយើងជឿថា សម្ដេចព្រះសង្ឃលោកមានអំណាចនៅក្នុងការគ្រប់គ្រងរបស់ការងារសាសនា»។
គួរបញ្ជាក់ថា នេះជាលើកដំបូងហើយដែលសហព័ន្ធខ្មែរកម្ពុជាក្រោមបានប្រកាសការដាក់ សម្ពាធទៅលើមន្រ្តីនិងមេដឹកនាំព្រះសង្ឃព្រះពុទ្ធសាសនាខ្មែរទាំង ឡាយដែលត្រូវបានចោទប្រកាន់ជារឿយៗពីរឿងទាក់ទងអ្នកនយោបាយ ហើយអ្នករិះគន់ខ្លះចាត់ទុកថា មេដឹកនាំព្រះសង្ឃទាំងនោះគឺមាននិន្នាការធ្វើសកម្មភាពគាំទ្រ រដ្ឋាភិបាលនិងប្រទេសវៀតណាមផង៕
ប្រភពពីវិទ្យុអាស៊ីសេរី.
