ប្រធាន និង អនុប្រធានគណបក្សសង្គ្រោះជាតិ លោក សម រង្ស៊ី និង លោក កឹម សុខា នៅយប់ថ្ងៃព្រហស្បតិ៍ ទី ០៧ ខែវិច្ឆិកា នេះ នឹងចាកចេញពីកម្ពុជា ដើម្បីបំពេញបេសកកម្មរៀងខ្លួន នៅប្រទេសហ្វីលីពីន និងប្រទេសអូស្ត្រាលី ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានថ្លែងប្រាប់ VOD វិទ្យុក្នុងស្រុកដែលបាន ចេញផ្សាយ នៅព្រឹកថ្ងៃទី ០៧ ខែវិច្ឆិកា ថា ចាប់ពីថ្ងៃទី ៨ ដល់ថ្ងៃទី ១២ ខែវិច្ឆិកា លោក សម រង្ស៊ី នឹង ចូលរួមកិច្ចប្រជុំខួបលើកទី ២០ នៃក្រុមប្រឹក្សាអ្នកប្រជាធិបតេយ្យសេរីនិយមអាស៊ី (CALD) នៅទីក្រុងម៉ានីល ប្រទេសហ្វីលីពីន ។ លោក សម រង្ស៊ី ជាប្រធាននៃកិច្ចប្រជុំនេះ ដែលមានគណបក្ស ១១ តំណាងឲ្យប្រទេស ១១ ចូលរួម ។
លោក យឹម សុវណ្ណ បន្តថា លោកសម រង្ស៊ី នឹងលើកទ្បើងពីវិបត្តិនយោបាយនៅកម្ពុជា ក្រោយការបោះឆ្នោតថ្នាក់ជាតិ និងដំណោះស្រាយដែលគណបក្សស្នើទ្បើង ។
ចំណែក លោក កឹម សុខា នឹងជួបប្រជាពលរដ្ឋកម្ពុជា នៅប្រទេសអូស្ត្រាលី រហូតដល់ថ្ងៃទី ១១ ខែវិច្ឆិកា ដើម្បីបង្ហាញពីការវិវត្តន៍នៃស្ថានការណ៍នយោបាយនៅកម្ពុជា ៕
.
