ថ្ងៃអង្គារ, 21 ខែកញ្ញា 2010 ដោយលោក សុខ សេរី វិទ្យុអាស៊ីសេរី ភ្នំពេញ
ដោយសារ ពុំមានចំណាត់ការណាមួយដោយ អាជ្ញាធរវៀតណាម លើសំណុំរឿងឃាតកម្ម លើខ្មែរកម្ពុជាក្រោមចំនួន ២នាក់កន្លងមកនេះ តំណាងរាស្ត្រមួយចំនួនរបស់គណបក្ស សម រង្ស៊ី បានស្នើសុំឲ្យអាជ្ញាធរកម្ពុជា ជួយធ្វើអន្តរាគមន៍។
តំណាងរាស្ត្រគណបក្សប្រឆាំង សម រង្ស៊ី ចំនួន ៩រូប បានស្នើសុំរដ្ឋមន្ត្រីការបរទេសកម្ពុជា លោក ហោ ណាំហុង ដើម្បីណែនាំឲ្យអគ្គកុងស៊ុលកម្ពុជា នៅទីក្រុងព្រៃនគរប្រទេស វៀតណាម សុំឲ្យរដ្ឋាភិបាលវៀតណាម ចាប់ខ្លួន និងផ្ដន្ទាទោសជនសង្ស័យ ដែលបានសម្លាប់ខ្មែរកម្ពុជាក្រោម ចំនួន ២នាក់ កាលពីដើមខែកញ្ញា កន្លងទៅនេះ។
សូមចុចស្តាប់សេចក្តីរាយការណ៍របស់លោក សុខ សេរី វិទ្យុអាស៊ីសេរី ភ្នំពេញ
ការស្នើសុំកិច្ចអន្តរាគមន៍នោះ បានធ្វើឡើងតាមរយៈញត្តិរួមគ្នាមួយ ចុះថ្ងៃទី១៦ ខែកញ្ញា កន្លងទៅនេះ។
តំណាងរាស្ត្រគណបក្សប្រឆាំង សម រង្ស៊ី លោក យន្ត ថារ៉ូ នៅក្នុងចំណោមតំណាងរាស្ត្រ ៩រូបនោះ បានមានប្រសាសន៍ប្រាប់វិទ្យុអាស៊ីសេរី នៅថ្ងៃទី២១ ខែកញ្ញាថា ៖ «យើង ចង់ឲ្យមានប្រព័ន្ធច្បាប់មួយដ៏យុត្តិធម៌ដល់ប្រជាពលរដ្ឋខ្មែរនៅ ទីនោះ។ ជៀសវាងកុំឲ្យមានទង្វើទាំងអស់នេះកើតមានដល់ជនរួមជាតិខ្មែរ កម្ពុជាក្រោម នៅថ្ងៃអនាគតខាងមុខ»។
កាលពីថ្ងៃទី២ ខែកញ្ញា កន្លងទៅ ខ្មែរកម្ពុជាក្រោមចំនួន ២នាក់បានរងការព្រួតវាយសម្លាប់ ដោយប្រើកាំបិត និងដំបងពីសំណាក់អ្នកភូមិវៀតណាម រាប់សិបនាក់ នៅតំបន់ចម្ការកៅស៊ូមួយ នៅក្នុងខេត្តរោងដំរី ឬខេត្តតៃនិញ ទឹកដីខ្មែរកម្ពុជាក្រោម។ ខ្មែរកម្ពុជាក្រោម ១១នាក់ទៀត បានរងរបួសនៅក្នុងអំពើហិង្សានោះ ដែលគេចោទថា គឺបណ្ដាលមកពីការប៉ះទង្គិចពាក្យសម្ដីគ្នា និងការរើសអើងជាតិសាសន៍ជាដើម។
ខ្មែរកម្ពុជាក្រោមដែលបានស្លាប់នោះ មានឈ្មោះ ចៅ ណែត អាយុ ២២ឆ្នាំ មានស្រុកកំណើតនៅក្នុងភូមិរលៀង ឃុំរលៀង ស្រុកស្វាយទង ខេត្តអានយ៉ាង ឬខេត្តមាត់ជ្រូក និងខ្មែរកម្ពុជាក្រោមមួយរូបទៀតឈ្មោះ ចៅ ផាត មានស្រុកកំណើតនៅឃុំបន្ទាយស្វាយ ស្រុកស្វាយទង ខេត្តអានយ៉ាង ឬខេត្តមាត់ជ្រូក។
មន្ត្រីអ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍បញ្ជាក់នៅថ្ងៃទី២១ ខែកញ្ញាថា ក្រសួងមិនទាន់បានទទួលលិខិតនោះនៅឡើយទេ។
លោកបានបន្តថា ៖ «ក្រសួងតែងតែណែនាំឯកអគ្គកុងស៊ុលយើងនៅក្រុង ហូជីមិញហ្នឹង (Ho Chi Minh) ធ្វើការស្រាវជ្រាវព័ត៌មានហ្នឹងពិត ឬមិនពិត ហើយទី២ បើពិតហើយ គឺឲ្យអគ្គកុងស៊ុលយើងនៅទីនោះធ្វើការសហការជាមួយនឹងអាជ្ញាធរ វៀតណាម ដើម្បីផ្ដន្ទាទោសជនល្មើស»។
ឪពុករបស់ ចៅ ណែត សុំមិនឲ្យបញ្ចេញឈ្មោះ នៅភូមិរលៀង ឃុំរលៀង ស្រុកស្វាយទង ខេត្តអានយ៉ាង ទឹកដីខ្មែរកម្ពុជាក្រោម បានថ្លែងប្រាប់នៅថ្ងៃទី២១ ខែកញ្ញា តាមទូរស័ព្ទមកថា លោកបានទៅជួបជាមួយអាជ្ញាធរនគរបាល នៅស្រុកស្វាយទង រួចហើយ ប៉ុន្តែគេបានណែនាំលោកឲ្យធ្វើពាក្យបណ្ដឹងដោយខ្លួនឯងផ្ទាល់ទៅ អាជ្ញាធរក្រុងព្រៃនគរ ៖ «ឲ្យអ៊ីចឹងណា ដល់ថ្នាក់លើឲ្យគេដឹងឮ។ ឥឡូវគម្រោងការគិតធ្វើលិខិតថ្មីទៀត។ ក្រដាសបណ្ដឹង»។
តំណាងរាស្ត្រគណបក្សប្រឆាំង សម រង្ស៊ី លោក យន្ត ថារ៉ូ ដែលជាខ្មែរកម្ពុជាក្រោមផងដែរនោះ បានផ្ញើលិខិតមួយច្បាប់ កាលពីថ្ងៃទី១៦ ខែកញ្ញា ជូនលោក សឺន សុងសឺន ជាសមាជិកមជ្ឈិមបក្ស និងជាអនុប្រធានចង្អុលទិសភាគខាងត្បូងនៃប្រទេសវៀតណាម ឲ្យជួយអន្តរាគមន៍បើកការស្រាវជ្រាវចាប់ខ្លួនជនសង្ស័យដើម្បី ផ្ដន្ទាទោស។
លិខិតនោះត្រូវបានផ្ញើតាមរយៈស្ថានទូតវៀតណាម នៅក្នុងប្រទេសកម្ពុជា ប៉ុន្តែមន្ត្រីស្ថានទូតវៀតណាម មិនបានអនុញ្ញាតឲ្យចូលដាក់ ឬទទួលយកលិខិតនោះទេ៕
