ដោយ ថាច់ ប្រីជា គឿន l សារព័ត៌មាន ព្រៃនគរ
សមណសិស្សរងចាំគណៈកម្មការប្រកាសលទ្ធផលប្រឡង នៅវត្តងវត្តសុវណ្ណសាគរសិរីដើមពោន រាត្រីថ្ងៃទី ៦ ខែមករា ឆ្នាំ ២០១៣ នេះ ។
ខេត្តពលលាវ៖ ព្រះសង្ឃនិងពុទ្ធបរិស័ទចំណុះជើងវត្តសុវណ្ណសាគរសិរីដើមពោន ឋិតនៅក្នុងទីរួម ខេត្តពលលាវ ទើបតែបានបញ្ចប់កម្មវិធីប្រឡងថ្នាក់ឯកនៃកម្មវិធីសិក្សាថ្នាក់ធម្មវិន័យរបស់ព្រះសង្ឃ រយៈពេល ៣ ថ្ងៃ ដោយមានសមណសិស្សសរុប ២៨ អង្គ ។ កម្មវិធីប្រកាសលទ្ធផល និងប្រគល់ សញ្ញាបត្រដល់សមណសិស្សប្រព្រឹត្តទៅចាប់ពីម៉ោង ៧ យប់ នៅវត្តសុវណ្ណសាគរសិរីដើមពោន កាលពីថ្ងៃទី ៦ ខែមករា កន្លងទៅនេះ ។
គណៈកម្មការប្រកាសលទ្ធផលប្រឡង ។
ព្រះតេជព្រះគុណ ថាច់ សុខ ព្រះចៅអធិការវត្តសុវណ្ណសាគរសិរីដើមពោន បានមានថេរដីកាប្រាប់ សារព័ត៌មាន ព្រៃនគរ ថា ព្រះសង្ឃទាំង ២៨ អង្គដែលបាននិមន្តចូលមកប្រឡងថ្នាក់ឯកនេះ រួមមាន ពីរវត្ត គឺ វត្តសុវណ្ណសាគរសិរីដើមពោន ខេត្តពលលាវ និងសិរីតាសេក ឋិតនៅក្នុងស្រុកជ្រោយញរ ខេត្តឃ្លាំង ។
ព្រះតេជព្រះគុណ ថាច់ សុខ មានថេរដីកាថា៖” ហ្នឹងមានតែពីរវត្ត វត្តដើមពោន និង វត្តតាសេក ២៨ អង្គ ។ មួយវត្ត ១៤ អង្គ” ។
ព្រះតេជព្រះគុណ ថាច់ សុខ មានថេរដីកាបន្តទៀតថា កម្មវិធីសិក្សាថ្នាក់ធម្មវិន័យនៅខេត្តពលលាវ នេះ សិក្សារយៈពេល ៧ ខែ គឺចាប់ពីខែវិសាខដល់ថ្ងៃ ១៥ កើតខែមិគសិរ រៀងរាល់ឆ្នាំ ។ ព្រះអង្គ បានបន្តទៀតថា មុខវិញ្ញាសាដែលសមណសិស្សសិក្សានោះមានច្រើន តែលើកយកមកប្រឡង ដំណាច់ឆ្នាំសិក្សា មានតែ ៦ ប៉ុណ្ណោះ ក្នុងនោះមានវិញ្ញាសារ សរសេរតាមអានភាសាខ្មែរ និង ពុទ្ធ ប្រវត្តិជាដើម ។
ពុទ្ធបរិស័ទប្រគេនរង្វាន់លើកទឹកចិត្ត និងសញ្ញាបត្រដល់សមណសិស្ស ។
សូមបញ្ជាក់ថា កម្មវិធីសិក្សាធម្មវិន័យ ជាកម្មវីធីរៀនខាងផ្លូវព្រះពុទ្ធសាសនារបស់ព្រះសង្ឃនៅ តាមវត្តអារាមនានានៅក្នុងខេត្តពលលាវ ខេត្តឃ្លាំង ខេត្តក្រមូនស និង ខេត្តមាត់ជ្រូកជាដើម ។ កម្មវិធីនេះ មាន ៣ ថ្នាក់ គឺ ថ្នាក់ដំបូងហៅថា ថ្នាក់ត្រី ថ្នាក់ទីពីរហៅថា ថ្នាក់ទោ និងថ្នាក់បញ្ចប់ហៅ ថា ថ្នាក់ឯក ។ ចំណែកនៅខេត្តព្រះត្រពាំង កម្មវិធីសិក្សានៃសាលាពុទ្ធកសិក្សាផ្ដោតលើភាសាបាលី ដែលព្រះសង្ឃត្រូវចំណាយពេល ៧ ឆ្នាំទើបចប់ថ្នាក់វិទ្យាល័យ ៕
