បាតុករប្រមាណ ២០ ម៉ឺននាក់ នៅតែបន្តប្រមូលផ្តុំនៅទីក្រុងបាងកក ដើម្បីទាមទារឲ្យលោកស្រី យីងលក្ខណ៍ ជីនវ័ត្រ រំលាយគណៈរដ្ឋមន្ត្រីហើយប្រគល់អំណាចឲ្យក្រុមប្រឹក្សាប្រជាជន តាមការចាត់តាំងដើម្បីដឹកនាំប្រទេសវិញ ។
សារព័ត៌មាន បាងកកប៉ុស្តិ៍ ចុះផ្សាយថា បាតុករទាំងនោះប្រមូលផ្តុំនៅតាមដងផ្លូវនានា នៅទីក្រុងបាងកកនៅថ្ងៃអង្គារនេះ និងនៅក្បែរវិមានរដ្ឋាភិបាល ដើម្បីទាមទារឲ្យលោកស្រីយីងឡាក់ រំលាយគណៈរដ្ឋមន្ត្រី ។
នៅព្រឹកថ្ងៃចន្ទម្សិលមិញ លោកស្រី យីងលក្ខណ៍ ជីនវ័ត្រ បានប្រកាសរំលាយសភា និងរៀបចំការបោះឆ្នោតឡើងវិញនៅថ្ងៃទី ២ ខែកុម្ភៈ ដើម្បីបញ្ចប់វិបត្តិនយោបាយ ។
នៅយប់ថ្ងៃចន្ទម្សិលមិញ ព្រះមហាក្សត្រថៃបានយល់ព្រម ចំពោះការរំលាយសភា និងរៀបចំការបោះឆ្នោតឡើងវិញនេះ ។ ព្រះអង្គលើកឡើងថា ក្នុងរយៈពេលនេះ រហូតដល់ការបោះឆ្នោត រដ្ឋាភិបាល លោកស្រី យីងលក្ខណ៍ ជីនវ័ត្រ ក្លាយជារដ្ឋាភិបាលចាំផ្ទះ ។
តែសម្រាប់មេដឹកនាំ បាតុករលោក សូទេព ថងសូបាន ថ្លែងថា ការរំលាយសភា និងរៀបចំការបោះឆ្នោតនោះ មិនគ្រប់គ្រាន់ទេ គឺលោកទាមទារឲ្យដកខ្សែស្រលាយ លោក ទក្សិណ ចេញពីថ្នាក់ដឹកនាំរដ្ឋាភិបាលទាំងអស់ ហើយប្រគល់អំណាចទៅឲ្យក្រុមប្រឹក្សា ប្រជាជនតាមការចាត់តាំងវិញ ។
លោក សុទេព កំណត់ឲ្យលោក លោកស្រី យីងលក្ខណ៍ ជីនវ័ត្រ ត្រូវរំលាយគណៈរដ្ឋមន្ត្រី ចោលក្នុងរយៈពេល ២៤ ម៉ោង ដោយមិនបាច់បោះឆ្នោត ។ លោកព្រមាន ចំនួនបាតុករ និងកើនឡើងពី ២០ ទៅ ៤០ ម៉ឺននាក់ ប្រមូលផ្តុំនៅទីក្រុងបាងកក ដើម្បីទាមទាររហូតដល់ លោកស្រី យីងលក្ខណ៍ ជីនវ័ត្រ រំលាយគណៈរដ្ឋមន្ត្រីដោយមិនមានលក្ខខណ្ឌ ៕
