ដោយ ថាច់ ប្រីជា គឿន l សារព័ត៌មាន ព្រៃនគរ
នៅថ្ងៃទី ១៧ ខែធ្នូ ឆ្នាំ ២០១៤ នេះ ពលរដ្ឋខ្មែរក្រោម នៅចំណុះជើងវត្តឫស្សីម្គុម្ភ ឋិតនៅស្រុកថ្កូវ ខេត្តព្រះត្រពាំង បានប្រទះឃើញ រូបចម្លាក់ព្រះវិស្ណុបុរាណមួយអង្គ ដែលបានកប់នៅក្រោមដី ក្បែរគុម្ពឫស្សីមួយកន្លែង ។
អ្អ្នកភូមិភ្ញាក់ផ្អើលបាននាំគ្នាមកមើល ហើយអុជធូបបូជាបន់ស្រន់ បន្ទាប់ពីពួកគេបានឃើញរូបចម្លាក់នេះ ។ ក្នុងហេតុ ការណ៍ នេះ គេសង្កេតឃើញ មាននគរបាលវៀតណាមជាច្រើនបានមកត្រួតពិនិត្យ ផងដែរ ។
បន្ទាប់ពីបានប្រទះឃើញរូបរូបចម្លាក់នេះ ក្រុមអ្នកប្រើបណ្ដាញសង្គម Facebook បានបង្ហោះ និងចែករំលែករូបថតនៃហេតុការណ៍នេះពីម្នាក់ទៅម្នាក់ ហើយបានសួរគ្នាទៅវិញទៅមក ។
អ្នកបុរាណវិទ្យានៅប្រទេសកម្ពុជា បានសន្និដ្ឋានថា រូបចម្លាក់នេះ ស្ថិតនៅក្នុងសម័យអង្គរ ។
លោក លឹម ថេងហាក់ អតីតនិស្សិតបរិញ្ញាបត្រផ្នែកបុរាណវិទ្យា នៃសាកលវិទ្យាល័យភូមិន្ទវិចិត្រសិល្បៈ នៅក្នុងប្រទេសកម្ពុជា ដែលមានដើមកំណើតជាខ្មែរក្រោម បានបញ្ជាក់នៅលើទំព័រ Face book របស់ខ្លួនថា រូបចម្លាក់នេះបើ “យោងតាមអ្នកជំនាញសិល្បៈខ្មែរសន្និដ្ឋានថាស្ថិតក្នុងសម័យកាលអង្គរ ក្នុងទម្រង់ វិស័យព្រហ្មញ្ញសាសនា ” ។
លោក លឹម ថេងហាក់ បានបបន្តទៀតថា យោងតាមរូបថត និងទីតាំង ដែលគេបានប្រទះ ឃើញរូបចម្លាក់នេះ៖
ទីមួយបរិស្ថានភូមិសាស្ត្រ អាចជាទីទួលបុរាណគោរពបូជាមនុស្សជាន់ ដើម ។ ទីពីរ តំបន់នោះ ស្ថិតក្រោមការគ្រប់គ្រង ចំណុះជើងវត្តណាមួយ គួរគប្បីវត្តនោះស្នើទៅអាជ្ញាធរវៀតណាមមករក្សាជាការល្អជាងប្រគល់ទៅរដ្ឋអំណាច ។ ទីបីរូបបដិមា យោងលើព្រះ កេសមានមកុដ ក្នុងទម្រង់ឈរអាចជាចម្លាក់ ណាមួយក្នុងវិស័យព្រហ្មញ្ញសាសនា ច្រើនជាង ។
គេនៅមិនទាន់ដឹងថា តើអ្នកភូមិ និងព្រះសង្ឃវត្តឫស្សីម្គុម្ភមានចំណាត់ការបែបណានៅឡើយលើរូបចម្លាក់នេះ ខណៈដែលរដ្ឋាភិបាលវៀតណាមតែងតែចង់បានរបស់បែបនេះទៅដាក់តាំងនៅក្នុងសារមន្ទីររបស់ពួកគេ ។
នៅពេលថ្មីៗនេះដែរ ពុទ្ធបរិស័ទចំណុះជើង វត្តមុនីរង្សីសិរីវរារាម (ស្វាយពក) ឋិតនៅក្នុងឃុំកំពង់តារាជ ស្រុកថ្កូវ ខេត្តព្រះត្រពាំង ក៏បានប្រទះឃើញរូបចម្លាក់ព្រះវិស្ណុបុរាណ មួយអង្គផងដែរ ។ ពេលបានដឹង អាជ្ញាធរវៀតណាមបានមកគំរាមព្រះសង្ឃ និងគណៈកម្មការវត្តដើម្បីយករូបចម្លាក់នេះទៅតាំងនៅសារមន្ទីរ តែត្រូវបានព្រះសង្ឃបដិសេធ ។
ខ្មែរក្រោមជាជនជាតិដើមនៃដែនដីកម្ពុជាក្រោម ។ វប្បធម៌ វត្តអារាម និងសាសនារបស់ពួកគេបានតាំងនៅ នៅលើទឹកដីដ៏មានចំណាស់មួយនេះជាយូរលង់ណាស់មកហើយ ។ វត្តសម្បូររង្សី (សម្បួរ) បានកកើតឡើងក្នុង គ្រិស្តសករាជ ៣៧៣ ពុទ្ធសករាជ ៩១៦ បើគិតមកដល់ឆ្នាំ ២០១៤ នេះ វត្តសម្បូររង្សី មានអាយុកាល ១៦៤១ ឆ្នាំ ហើយ ៕
