ថ្ងៃអង្គារ ០៩ ខែវិច្ឆិកា ២០១០ ដោយលោក សេក បណ្ឌិត វិទ្យុអាស៊ីសេរី ភ្នំពេញ
ប្រទេសកម្ពុជា ប្រារព្ធបុណ្យខួប ៥៧ឆ្នាំ ថ្ងៃបានទទួលឯករាជ្យពីអាណានិគមនិយមបារាំង (ឆ្នាំ១៩៥៣ ដល់ ឆ្នាំ២០១០) នៅវិមានឯករាជ្យ រាជធានីភ្នំពេញ។ព្រះករុណាព្រះបាទបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រឹកថ្ងៃអង្គារ ទី៩ ខែវិច្ឆិកា ឆ្នាំ២០១០ បានយាងជាព្រះអធិបតីក្នុងពិធីបុណ្យខួបលើកទី៥៧ ថ្ងៃបុណ្យឯករាជ្យ ដែលប្រទេសកម្ពុជា បានទទួលពីប្រទេសបារាំង ដោយទ្រង់បានដុតទៀនជ័យ និងដាក់កម្រងផ្កានៅវិមានឯករាជ្យ ដើម្បីគោរព និងរំឭកដល់វិញ្ញាណក្ខន្ធបុព្វបុរសដែលបូជាជីវិត ដើម្បីប្រទេសឯករាជ្យជាតិមាតុភូមិ។ ចុចស្តាប់ជាសំឡេង
នៅក្នុងពិធីនេះ ព្រះករុណាមិនបានថ្លែងព្រះសង្កថាអ្វីឡើយ ក្រៅពីយាងសួរសុខទុក្ខប្រជារាស្ត្ររបស់ព្រះអង្គ សិស្ស និស្សិត មន្ត្រីជាន់ខ្ពស់ក្នុងរដ្ឋាភិបាល មន្ត្រីទូតជាដើម។ លោកនាយករដ្ឋមន្ត្រី ហ៊ុន សែន ក៏បានចូលរួមនៅក្នុងពិធីនោះផងដែរ។
និស្សិតមួយរូបមកពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ឈ្មោះ សួ គីមនី អាយុប្រមាណ ២៣ឆ្នាំ មានចំណាប់អារម្មណ៍ថា ទោះបីរូបគេកើតមិនទាន់សម័យកាលដែលកម្ពុជា ទទួលបានឯករាជ្យពីបារាំងភ្លាមៗនោះក៏ដោយ ប៉ុន្តែតាមរយៈការសិក្សាបានឲ្យគេដឹងថា ការទាមទារឯករាជ្យពីអាណានិគមបារាំងនោះ ទម្រាំបានជោគជ័យគឺពិតជាមានការលំបាកណាស់ ដូច្នេះថ្ងៃ៩ ខែវិច្ឆិកា ឆ្នាំ១៩៥៣ ពិតជាមានន័យឧដុង្គឧត្ដមបំផុត ដែលមិនអាចកាត់ថ្លៃបានសម្រាប់ពលរដ្ឋកម្ពុជាគ្រប់រូប។
និស្សិត សួ គីមនី បន្ថែមថា ៖ «ខ្ញុំមានអារម្មណ៍សប្បាយរីករាយ ណាស់ ដែលប្រទេសកម្ពុជា មិនស្ថិតនៅក្រោមអាណានិគមរបស់អ្នកណាទៀត ហើយខ្ញុំសូមអរគុណចំពោះសម្ដេចតា ដែលទ្រង់តែងតែព្យាយាមពុះពារទាមទារឯករាជ្យនេះមកជូនប្រជាពលរដ្ឋ ខ្មែរ»។
និស្សិតរូបនេះក៏សូមបួងសួងផងដែរ សូមឲ្យឯករាជ្យនេះស្ថិតស្ថេរគង់វង្សជារៀងរហូតនៅកម្ពុជា។
តំណាងរាស្ត្របក្សជំទាស់ លោក សុន ឆ័យ មានប្រសាសន៍ថា ការប្រារព្ធទិវាបុណ្យឯករាជ្យជាតិ គឺជាការរំឭកដឹងគុណដល់មេដឹកនាំជំនាន់មុនៗផង និងជាការរំឭកដាស់តឿនដល់មេដឹកនាំឲ្យគិតគូរ និងទទួលខុសត្រូវចំពោះបូរណភាពដែនដីរបស់ខ្លួន។
លោក សុន ឆ័យ មានប្រសាសន៍ទៀតថា ៖ «ក្នុងថ្ងៃនេះ ជាថ្ងៃមួយដ៏សំខាន់ ដែលពលរដ្ឋយកថ្ងៃឯករាជ្យនេះមកវិនិច្ឆ័យមើលថា តើមេដឹកនាំរបស់ខ្លួនបានបំពេញតួនាទីការពារឯករាជ្យរបស់ខ្លួនដែរ ឬទេ?»។ 
ឯកសារដែលនិយាយអំពីប្រវត្តិសាស្ត្រកម្ពុជា បាន បង្ហាញថា ប្រទេសបារាំង បានធ្វើអាណានិគមត្រួតត្រាលើប្រទេសកម្ពុជា ចាប់ពីឆ្នាំ១៨៦៣ រហូតដល់ឆ្នាំ១៩៥៣ គឺនៅថ្ងៃទី៩ ខែវិច្ឆិកា ទើបប្រទេសបារាំង បានប្រកាសជាផ្លូវការផ្តល់នូវឯករាជ្យទាំងស្រុង ឲ្យ ដល់ ព្រះរាជាណាចក្រកម្ពុជាវិញ ក្រោមព្រះរាជ បូជនីយកិច្ចរបស់សម្ដេចឪ ព្រះបាទសម្ដេចព្រះ នរោត្តម សីហនុ ព្រះមហាក្សត្រខ្មែរ។
គិតមកដល់ឆ្នាំ២០១០នេះ កម្ពុជាបានទទួលឯករាជ្យពេញលេញពីបារាំង បានរយៈពេល ៥៧ឆ្នាំហើយ។
គណៈកម្មាធិការបុណ្យជាតិ បានប្រកាសឲ្យដឹងថា ព្រះសង្ឃរាជទាំងពីរគណៈ ព្រះមហាក្សត្រ ព្រះបរមនាថ នរោត្តម សីហមុនី នឹងយាងពន្លត់ទៀនជ័យនៅថ្ងៃព្រហស្បតិ៍ ទី១១ ខែវិច្ឆិកា ខាងមុខ ក្រោយគេតម្កល់ទុករយៈពេល ៣ថ្ងៃ ដើម្បីរឭកដល់វិញ្ញាណក្ខន្ធទាហាន និងអ្នកតស៊ូខ្មែរ ដែលបានពលីជីវិតក្នុងបុព្វហេតុទាមទារឯករាជ្យពីអាណានិគមបារាំង៕
