ដោយ អ្នកនាង ថាច់ សុជាតា/VOKK៖ កាលពីថ្ងៃ អាទិត្យទី ១៨ មីនា ម្សិលមិញនេះ ប្រជាពលរដ្ឋខ្មែរ សញ្ជាតិអាមេកាំង នៅទីក្រុងសាន់ហូស្សេ នៃរដ្ឋកាលី ហ្វ័រញ៉ា បានរៀបចំទិវាខួប ៤២ ឧទ្ទិសកុសល ជូនវីរជនអ្នកស្នេហាជាតិ ប្រឆាំងនឹងកងទ័ពវៀតកុង កាលពីទស្សវត្សរ៍ឆ្នាំ ១៩៧០ នៃរបបសាធារណរដ្ឋ ខ្មែរ។ កម្មវិធីបានប្រព្រឹត្តទៅតាមការព្រៀងទុក ដោយ មានពិធីបង្សុកូល តាមប្រពៃណីសាសនា និងអាននូវ ជីវប្រវត្តិលោកសេនាប្រមុខ លន់ នល់ ជាដើម នេះ លើកទី ២ ហើយ ដែលប្រជាពលរដ្ឋខ្មែរ នៅទីក្រុង សាន់ហូស្ស បានរៀបចំ ទិវាជាប្រវត្តិសាស្រ្តរំលឹក វិញ្ញាណក្ខ័ន្ធ ដល់វីរជនអ្នកស្នេហាជាតិតស៊ូ ដើម្បីបុព្វ ហេតុជាតិ និងបណ្តេញ យួនវៀតកុងចេញពីទឹកដី ខ្មែរ។ លោកស្រី បៃ សុផានី អតីតគ្រូបង្រៀង ក្នុងរបបសាធារណរដ្ឋខ្មែរ និងជាអ្នករៀបចំកម្មវិធី នេះឡើង បានថ្លែងរៀបរាប់អំពីប្រវត្តិលោកសេនាប្រមុខ លន់ នល់ យ៉ាងដូច្នេះ លន់ នល់ (Lon Nol) ជាអ្នកនយោបាយ និង ជាឧត្តមសេនីយ៍យោធាកម្ពុជា ដែលធ្លាប់កាន់តំណែងជានាយករដ្ឋមន្ត្រីកម្ពុជា២លើក និង ជារដ្ឋមន្ត្រីការពារជាតិ ។ គាត់បានដឹកនាំរដ្ឋាភិបាលស្រោចស្រង់ជាតិ និង ជាអ្នកបង្កើតរបបសាធារណរដ្ឋខ្មែរ និង ជាប្រធានាធិបតីសាធារណរដ្ឋនេះ ។ គាត់ក៏ជាមនុស្សទី១ដែរដែលចេញមុខប្រកាសសង្គ្រាមបណ្តេញយួនខាងជើង និងវៀតកុងចេញពីទឹកដីខ្មែរ ។ លន់ នល់ កើតនៅថ្ងៃទី១៣ ខែវិច្ឆិកា ឆ្នាំ១៩១៣ នាខេត្តព្រៃវែង ក្នុងគ្រួសារខ្មែរដើមកំណើតចិន ។ ឪពុករបស់គាត់ឈ្មោះ លន់ ហ៊ិន ម្តាយឈ្មោះ នួន , គាត់ជាកូនទី២ក្នុងគ្រួសារដែលមានបងប្អូន១០នាក់ ដែលក្នុងនោះប្អូនប្រុសទី៧ របស់គាត់ឈ្មោះ លន់ ណុន ជាមនុស្សដែលមានតួនាទីសំខាន់ក្នុងប្រវត្តិសាស្ត្រនយោបាយខ្មែរ ចាប់តាំងពីការចាត់ចែងធ្វើរដ្ឋប្រហារទម្លាក់សម្តេចសីហនុ និងការបង្កើតរបបសាធារណរដ្ឋខ្មែរ ។
គួររំលឹកថា ថ្ងៃ១៨ មីនា ឆ្នាំ១៩៧០ គឺជាថ្ងៃលោកសេនាប្រមុខ លន់ នល់ ដែលជាមនុស្សជំនិត របស់សម្ដេចព្រះនរោត្តម សីហនុ ដឹកនាំរដ្ឋប្រហារទម្លាក់ព្រះអង្គពីអំណាចជាប្រមុខរដ្ឋាភិបាល។ ហើយក្រុមរបស់លោកសេនាប្រមុខ លន់ នល់ បានថ្កោលទោសសម្ដេចព្រះនរោត្តម សីហនុ ថា បានឃុបឃិតអនុញ្ញាតអោយកងទ័ពវៀតកុង ចូលមកបោះទីតាំងនៅលើទឹកដីកម្ពុជា។ ភ្លាមៗក្រោយពីទម្លាក់ព្រះអង្គពីអំណាច ទាហាន នៃរបបសាធារណរដ្ឋខ្មែរ ដឹកនាំដោយលោក លន់ នល់ បានធ្វើយុទ្ធនាការបណ្ដេញកងទ័ពវៀតកុងចេញពីប្រទេស កម្ពុជា៕
