ដោយៈ សឺង សុជាតិ
នៅថ្ងៃសៅរ៏ ទី០៩ សីហា កន្លងទៅនេះ សហព័ន្ធខែ្មរកម្ពុជាក្រោម ភាគជើងខាងលិច សហរដ្ឋអាមេរិក ដែល ដឹកនាំដោយលោក ថាច់ តង ប្រធានតំបន់ បានរៀបចំកម្មវិធីបញ្ចាំងកុនឯកសារខែ្មរក្រោម ដែលផលិតដោយ អ្នកស្រី Rebecca Sommer ក្រោមចំណងជើងថា ការរំលាយពូជសាសន៏ដោយគ្មានបង្ហូរឈាម (Eliminated Without Bleeding) នៅទីក្រុងសាន់ហូស្សេ រដ្ឋកាលីហ្វ័រនីញ៉ា ចាប់ពីម៉ោង ៤ និង ៣០នាទី រហូតដល់ម៉ោង៨និង៣០នាទី យប់ ក្រោមព្រះអធិបតីភាព ព្រះតេជគុណ ថាច់ ប៊ីរង្គ សង្ឃនាយកសហព័ន្ធខែ្មរកម្ពុជាក្រោម ទទួលបន្ទុកអន្តរ សាសនា។
មន្រ្តីជាន់ខ្ពស់ ប្រធានតំបន់ ប្រធានសាខា សមាជិក សមាជិកា នៃសហព័ន្ធខែ្មរកម្ពុជាក្រោម និងបងប្អូន រួមឈាម ព្រមទាំងឥស្សរជនខែ្មរប្រមាណជាង៥០រូប អញ្ជើញមកពីទីក្រុងនានា ជុំវិញរដ្ឋកាលីហ្វ័រនីញ៉ា បាន ចូលរួមគាំទ្រនិងទស្សនាកុនឯកសារខែ្មរក្រោម ប្រកបដោយស្មារតីក្តុកក្តួល និងឈឺចាប់ជាទីបំផុត។
លោក ថាច់ ង៉ុក ថាច់ ប្រធានប្រតិបត្តិសហព័ន្ធខែ្មរកម្ពុជាក្រោម បានថ្លែងនៅក្នុងពិធីនោះថា
“សហព័ន្ធខែ្មរកម្ពុជាក្រោម បានធ្វើចលនាយ៉ាងសកម្មភាព លើឆាកអន្តរជាតិ និងដាក់ផែនការដំណើរឆ្ពោះទៅ កាន់មាតុភូមិ ដើម្បីស្វែងរកសិទ្ធិសេរីភាព ជំនឿសាសនា និងសិទ្ធិស្វ័យសម្រេចវាសនាខ្លួនដោយខ្លួនឯង” ។
លោកប្រធានប្រតិបត្តិ ថាច់ ង៉ុក ថាច់ បានសង្កត់ធ្ងន់ថា៖ “យើងជាកូនខែ្មរ ត្រូវតែមានគោលជំហសេ្នហា ជាតិឲ្យពិតប្រាកដ ហើយយើងទាំងគ្នាត្រូវតែធ្វើចិត្តឲ្យវាឯករាជ្យ ទើបយើងដឹកនាំសង្គម ឬប្រទេសជាតិ ផុតពី គ្រោះមហន្តរាយ ជាពិសេសយើងត្រូវចេះសាមគ្គីគ្នា ការពារទ្រព្យសម្បត្តិជាតិ ហើយអ្វីដែលបាត់បង់យើងត្រូវ តែទាមទារយកមកវិញ យើងមិនត្រូវបាក់ស្បាត ឬខ្លាចសត្រូវបរទេសឡើយ។
លោក ប្រាក់ សេរីវុឌ្ឍ អនុប្រធានប្រតិបត្តិសហព័ន្ធខែ្មរកម្ពុជាក្រោម ទទួលបន្ទុកកិច្ចការបរទេស បាន ថ្លែងអំពីសកម្មភាពថ្មីៗ លើឆាកអន្តរជាតិ ក្នុងនោះមានការចូលរួមប្រជុំជាមួយនឹងមន្រ្តីជាន់ខ្ពស់ក្រសួងការ បរទេសសហរដ្ឋអាមេរិក ផែ្នកសេរីភាពជំនឿសាសនា ស្តីពីបញ្ហាព្រះតេជគុណ ទឹម សាខន និងស្ថានភាព ព្រះ ពុទ្ធសាសនាខែ្មរ នៅកម្ពុជាក្រោមជាដើម។
នៅក្នុងឧកាសនោះដែរ លោក ថាច់ ង៉ុក ថាច់ ប្រធានប្រតិបត្តិសហព័ន្ធខែ្មរកម្ពុជាក្រោម ក៏បានជូនលិខិត តែងតាំងលោកបណ្ឌិត Daryn Reicherter ជនជាតិអាមេរិកាំង ជាឧត្តមទីប្រឹក្សាជាន់ខ្ពស់ នៃសហព័ន្ធ ខែ្មរកម្ពុជាក្រោម ចាប់ពីពេលនេះតទៅ ។ ហើយលោកបណ្ឌិតក៏ទទួលដោយសោមនស្សរីករាយ ព្រមទាំងប្តេជ្ញា ចិត្តយ៉ាងមុតមាំថា នឹងខិតខំឲ្យអស់ពីសមត្ថភាព ដើម្បីជំរុញឲ្យអន្តរជាតិជួយធ្វើអន្តរាគមន៏ចំពោះបញ្ហាសិទ្ធិ មនុស្សខែ្មរ នៅកម្ពុជាក្រោម លុះត្រាណាតែទទួលបានលទ្ធផលជោគជ័យ ៕
គួររំឭកថា សហព័ន្ធខែ្មរកម្ពុជាក្រោម គឺជាអង្គការជាតិខែ្មរក្រោម ធ្វើចលនា តស៊ូ ដោយអហឹង្សា នៅជុំវិញពិភពលោក ស្របតាមច្បាប់អង្គការសហប្រជាជាតិ និងជាសមាជិកពេញសិទ្ធិនៃអង្គការ UNPO ដើម្បីទាមទារសិទ្ធិសេរីភាព ស្វ័យសម្រេចវាសនាខ្លួនដោយខ្លួនឯង ជូនបងប្អូនជនរួមជាតិខែ្មរក្រោមរាប់លាន នាក់ ដែលកំពុងរស់នៅក្រោមរបបអាណានិគមយួនបច្ចុប្បន្ន។ .
