ដោយ ថាច់ ប្រីជា គឿន l សារព័ត៌មាន ព្រៃនគរ
ចាប់ពីថ្ងៃទី ១២ ខែឧសភានេះ មេដឹកនាំ និងក្រុមយុវជន នៃសហព័ន្ធខ្មែរកម្ពុជាក្រោម នៅតាមបណ្ដារដ្ឋនានា នៃទឹកដីសហរដ្ឋអាមេរិក, ប្រទេសកាណាដា និងកម្ពុជា បានមកជួបជុំគ្នានៅវត្តខ្មែរសុរិយារង្សី ដែលឋិតនៅក្នុង ទីក្រុង ភីឡាដែលផ្យា (Philadelphia) រដ្ឋផែនស៊ីវ៉េនៀ (Pennsylvania) ដើម្បីចូលថ្លែងការណ៍អំពីបញ្ហាខ្មែរក្រោម នៅក្នុងវេទិកាចិន្ដ្រៃយ៍នៃអង្គការសហប្រជាជាតិស្ដីអំពី បញ្ហា ជនជាតិដើម (UNPFII) នៅការិយាល័យ អង្គការសហប្រជាជាតិ នាទីក្រុង New York ។ ក្នុងឱកាសនេះដែរ ក្រុមយុវជននៃសហព័ន្ធខ្មែរកម្ពុជាក្រោម ក៏នឹងធ្វើសន្និបាតយុវជនមួយ នៅទីក្រុង ភីឡាដែលផ្យា នៅថ្ងៃទី ១៧ ខែឧសភា នេះ ដើម្បីរំឭកដល់ខួប ១០ ឆ្នាំ ដែលសហព័ន្ធខ្មែរកម្ពុជាក្រោម បានចូលជាសមាជិក UNPFII ។
នៅថ្ងៃទី ១៤ ខែឧសភា នេះ ជាថ្ងៃទី ២ ហើយដែលក្រុមយុវជន នៃសហព័ន្ធខ្មែរកម្ពុជាក្រោម បាន ចូលស្ដាប់ និងថ្លែងការណ៍នៅក្នុងវេទិកាអចិន្ត្រៃយ៍នៃអង្គការសហប្រជាជាតិ ស្ដីអំពីបញ្ហាជនជាតិ ដើម នៅក្នុងការិយាល័យអង្គការសហប្រជាជាតិ នាទីក្រុង New York សហរដ្ឋអាមេរិក ។
ថ្លែងប្រាប់ទូរទស្សន៍ Online ព្រៃនគរ (PTV) លោក ត្រឹង ម៉ាន់ រិន្ទ ប្រធានផែនការនៃសហព័ន្ធ ខ្មែរកម្ពុជាក្រោម បានបញ្ជាក់ថា ក្រុមយុវជននៃសហព័ន្ធខ្មែរកម្ពុជាក្រោមមួយក្រុម បានចូលទៅអង្គ ការសហប្រជាជាតិ តាំងពីថ្ងៃទី ១៣ ខែឧសភា ម្ល៉េះ ដើម្បីលើកយកបញ្ហាសេរីភាពសាសនា បញ្ហា សិទ្ធិមនុស្ស និងការអប់រំរបស់ខ្មែរក្រោមនៅដែនដីកម្ពុជាក្រោម ដែលត្រូវបានរំលោភដោយរដ្ឋា ភិបាលវៀតណាមទៅថ្លែងនៅក្នុងអង្គការសហប្រជាជាតិ ។
លោក ត្រឹង ម៉ាន់ រិន្ទ បានបន្តទៀតថា សហព័ន្ធខ្មែរកម្ពុជាក្រោម នឹងលើកយកបញ្ហាដែលរដ្ឋា ភិបាលវៀតណាមបានធ្វើទុក្ខបុកម្នេញ ព្រះសង្ឃខ្មែរក្រោម នៅវត្តសេរីតាសេក និងវត្តព្រៃជាប់ នៃខេត្តឃ្លាំង កាលពីឆ្នាំទៅមិញ ទៅថ្កោលទោសនៅចំពោះមុខសហគមន៍អន្តរជាតិ នៅក្នុងវេទិកា ជនជាតិដើមមួយនេះ ផងដែរ ។
លោក ត្រឹង ម៉ាន់ រិន្ទ បានបន្តទៀតថា ក្រៅពីចូលថ្លែងការណ៍នៅក្នុងអង្គការសហប្រជាជាតិ ក្រុមយុវជននៃសហព័ន្ធខ្មែរកម្ពុជាក្រោម នឹងធ្វើសន្និបាតយុវជន នៅថ្ងៃទី ១៧ ខែឧសភា នេះ ដើម្បី រំឭកខួប ១០ ឆ្នាំ ថ្ងៃសហព័ន្ធខ្មែរកម្ពុជាក្រោម បានចូលជាសមាជិក UNPFII ។ ក្នុងសន្និបាតនេះ នឹងមានការចូលរួមពីថ្នាក់ដឹកនាំសហព័ន្ធខ្មែរកម្ពុជាក្រោម លោក ថាច់ ង៉ុក ថាច់ ផងដែរ ។
សូមបញ្ជាក់ថា សហព័ន្ធខ្មែរកម្ពុជាក្រោមបានចូលថ្លែងការណ៍នៅក្នុងវេទិកាអចិន្ត្រៃយ៍នៃអង្គការ សហប្រជាជាតិស្ដីអំពីបញ្ហាជនជាតិដើម ហៅកាត់ជាភាសាអង់គ្លេសថា UNPFII ចាប់ពីឆ្នាំ ២០០៤ មករហូតមកដល់បច្ចុប្បន្ន ។ ព្រឹត្តិការណ៍នេះ ត្រូវបានពលរដ្ឋខ្មែរក្រោមចាត់ទុកថា ជាប្រវត្តិសាស្រជោគជ័យមួយសម្រាប់ពួកគេ ដែលមិនធ្លាប់មានតាំងពីដើមមក ។
អង្គការសហប្រជាជាតិកំពុងតែបើកមហាសន្និបាតវេទិកាអចិន្ត្រៃយ៍ស្ដីពីបញ្ហាជនជាតិដើម នៅ ការិយាល័យកណ្ដាល របស់ខ្លួន នាទីក្រុង New York ចាប់ពីថ្ងៃទី ១២ ដល់ ថ្ងៃទី ២៣ ខែឧសភា នេះ ដើម្បីផ្ដល់ឱកាសឲ្យជនជាតិដើមក្នុងពិភពលោក បានថ្លែងអំពីកង្វល់របស់ពួកគេ ទៅកាន់ សហគមន៍អន្តរជាតិ ។ ប្រធានបទនៃវេទិកាឆ្នាំនេះ នឹងពិភាក្សាអំពីបញ្ហារបស់ជនជាតិដើមភាគតិចដែលទាក់ទងទៅនឹងការអភិវឌ្ឍសេដ្ឋកិច្ច ,សង្គម, វប្បធម៌, បរិស្ថាន, អប់រំ, សុខភាព និង សិទ្ធិមនុស្ស ៕
