ដោយ ថាច់ ប្រីជា គឿន l សារព័ត៌មាន ព្រៃនគរ
មនុស្សរាប់ពាន់នាក់ បានធ្វើបាតុកម្មប្រឆាំងរដ្ឋាភិបាលនៅប្រទេសថៃឈានដល់ថ្ងៃទី ២ កាលពីថ្ងៃសុក្រ ។ ក្បួនយាត្រា នៅតាមដងផ្លូវនានាក្នុងទីក្រុងបាងកក ដើម្បីទាមទារឲ្យអ្នកស្រី យិងលក្សណ៍ ជិនវ័ត្រ នាយករដ្ឋមន្ត្រី ចុះចេញពីតំណែង ។
អ្នកចូលរួមក្នុងក្បួនបាតុកម្មម្នាក់បានថ្លែងថា ពលរដ្ឋថៃមិនអាចអត់ទ្រាំបានទេ និងត្រូវតែបង្ហាញនូវកម្លាំងរបស់ យុត្តិ ធម៌ ។ មនុស្សម្នាក់នេះ បានថ្លែងបន្តទៀតថា រដ្ឋាភិបាលមិនអាចធ្វើព្រងើយចំពោះ កម្លាំងរបស់មហាជនបានឡើយ ។
អ្នកចូលរួមបាតុកម្មបានថ្លែងថា ការធ្វើបាតុកម្មនៅក្នុងសប្ដាហ៍នេះ គឺដើម្បីត្រៀមមនុស្សឲ្យចូលរួមក្នុង មហាបាតុកម្មនៅ តាមដងផ្លូវនៅថ្ងៃអាទិត្យ ទី ២២ ខែធ្នូ ខាងមុខនេះ ។
លោកស្រី យិងលក្សណ៍ ជាទិសដៅរបស់ក្រុមបាតុករ ដែលត្រូវបានគេរិះគន់ថា បានរំលាយសភានៅ ពេលថ្មីៗនេះ និងទាមទារឲ្យមានការបោះឆ្នោតឡើងវិញ មុនពេលកំណត់នៅក្នុងខែកុម្ភៈ ឆ្នាំ ២០១៤ ខាងមុខនេះ ។
អ្នកចូលរួមបាតុកម្មបានថ្កោលទោសនាយករដ្ឋមន្ត្រី យិងលក្សណ៍ ថា បានប្រព្រឹត្តអំពើពុករលួយ និង ជាអាយ៉ងឋិតនៅ ក្រោមការបញ្ជារបស់បងប្រុសរបស់ខ្លួន គឺ លោក ទក្សិណ ជិនវ័ត្រ ដែលត្រូវបានរដ្ឋប្រហារ កាលពីឆ្នាំ ២០០៦ ។
បាតុកម្មបានចាប់ផ្ដើមកាលពីខែតុលា ដើម្បីប្រឆាំងនឹងពង្រាងច្បាប់ដែលគេមើលឃើញថា ប្រសិនបើបានសម្រេច អនុម័ត លោក ទក្សិណ ជិនវ័ត្រ អាចត្រឡប់ចូលស្រុកបាន បញ្ចប់ជីវិតនីរទេសរបស់ខ្លួន និងបានរួចពីការចាប់ដាក់ ពន្ធនាគារ ពីបទប្រព្រឹត្តអំពើពុករលួយ ៕
