កាលពីថ្ងៃទី ១ មេសា ឆ្នាំ២០១០ ព្រះសង្ឃខ្មែរ ក្រោម ១អង្គ ព្រះនាម ថាច់ វាសនា ព្រះជន្ម ២៩ព្រះ វស្សា ដែលធ្វើដំណើរតាមជើងយន្តហោះ ពីក្រុង បាងកកទៅកាន់ក្រុងហូជីមិញ ដើម្បីទៅលេងស្រុក កំណើតរបស់ព្រះអង្គ នៅភូមិជ្រៃតាសោ ឃុំដើមជ្រៃ ស្រុកមាត់សមុទ្រ ខេត្តព្រះត្រពាំង ទឹកដីកម្ពុជា ក្រោម។ ប៉ុន្តែ ខណៈពេល ព្រះអង្គនិនមន្តចុះដល់ ព្រលានយន្តហោះ នាទីក្រុងព្រៃនគរ ហើយបន្ទាប់មក ទៀត បានធ្វើដំណើរទៅច្រកត្រួតពិនិត្យឯកាសារ ស្រាប់តែ ត្រូវបានក្រុមនគរបាលប្រទេសវៀតណាម ប្រមាណ ៣០នាក់ បានចាប់ក្រៀកព្រះអង្គទៅកន្លែងបន្ទប់សម្ងាត់ ដើម្បីសួរនាំ។ ក្រោយពីបានឆែកឆេរ និងពិនិត្យលិខិតឆ្លងដែនកម្ពុជា និងអត្តសញ្ញាណផ្សេងៗ តាមម៉ាស៊ីនកុំព្យូទ័ររួចមក។ ពួកគេក៏មិនអនុញ្ញាតិឲ្យព្រះអង្គនិមន្ត ទៅលេងស្រុកកំណើតឡើយ បើទោះជាព្រះអង្គបានអង្វករ ទទូចសុំយ៉ាងណាក៏ដោយ។ ក្រោយមកពួកគេ បានចាប់សែងព្រះអង្គ ពីព្រលានយន្តហោះ ក្រុងព្រៃនគរ ចូលក្នុងយន្តហោះពាណិជ្ជកម្មថៃ ដើម្បីបញ្ជូនត្រឡបទៅប្រទេសថៃវិញ។
ដោយឡែកករណីស្រដៀងគ្នានេះ ក៏បានកើតឡើងសារជាថ្មីម្តងទៀត គឺនៅថ្ងៃទី ៨ កក្កដា ២០១១។ នគរបាល អន្តោប្រវេសន៍យួន ប្រចាំព្រលានយន្តហោះក្រុងព្រៃនគរ បានឃាត់ខ្លួន ព្រះតេជគុណ លី រស់សេរី គង់នៅ វត្តទួលសង្កែ ក្រុងភ្នំពេញ ដែលព្រះអង្គបានធ្វើដំណើរនិមន្ត ចាកចេញពីព្រលានយន្តហោះអន្តរជាតិពោចិនតុង ឆ្ពោះទៅកាន់ប្រទេសអូសស្រ្តាលី។ ក្នុងការធ្វើដំណើរតាមជើងយន្តហោះនោះ គេត្រូវឈប់ចត នៅព្រលាន យន្តហោះក្រុងព្រៃនគរ ដើម្បីផ្ទេរយន្តហោះមួយផ្សេងទៀត។ ប៉ុន្តែ ជាអកុសល់ ព្រះអង្គត្រូវបាន នគរបាល អន្តោប្រវេសន៍យួនឃាត់ខ្លួន ទុកអស់រយៈពេល ៣ថ្ងៃ មិនត្រឹមតែប៉ុណ្ណោះទេ ពួកគេថែមទាំងបង្ខំ ឲ្យព្រះអង្គបង់ប្រាក់ពិន័យ ចំនួន ៤០០$ទៅទៀត។ ដើម្បីជ្រាបច្បាស់ អំពីមូលហេតុយ៉ាងណានោះ សូមអស់លោក អ្នក នាង មិត្តអ្នកស្តាប់វិទ្យុសំឡេងកម្ពុជាក្រោម តាមដានបទសម្ភាសន៍រវាងលោក ថោង ប៊ុនថា សហការីនៃវិទ្យុសំឡេងកម្ពុជាក្រោម ជាមួយ នឹងព្រះតេជគុណ លី រស់សេរី ដែលមានខ្លឹមសារទាំងស្រុង ដូចតទៅនេះ៖
