ពលរដ្ឋខ្មែរក្រោមចំនួន៦០នាក់និងព្រះសង្ឃខ្មែរក្រោម១អង្គផងត្រូវបានប៉ូលិសថៃចាប់ខ្លួននៅថ្ងៃសុក្រនេះ។
សកម្មជនមួយរូបនៃសហព័ន្ធខ្មែរកម្ពុជាក្រោមប្រចាំប្រទេសថៃសុំ មិនបញ្ចេញឈ្មោះបានឲ្យវិទ្យុអាស៊ីសេរីដឹងថា ជនភៀសខ្លួនខ្មែរក្រោមទាំងនោះត្រូវបានប៉ូលិសថៃចាប់ខ្លួននិងឃុំ នៅឯមន្ទីរឃុំឃាំងខេត្តនន់ថាក់បូរី។
សកម្មជនដដែលបានឲ្យដឹងថា ៖ «ក្រុមប៉ូលិសថៃនៅទីក្រុងបាងកក ចុះមកចាប់។ ទើបតែចាប់ពីព្រឹកមិញប្រហែលម៉ោង៥កន្លះអីហ្នឹង គេដើរចាប់តាមផ្ទះ គេគោះទ្វារចាប់។ នៅជាប់ពន្ធនាគារខេត្តនន់ថាក់បូរី»។
ប្រភពដដែលបានឲ្យដឹងថា ក្នុងចំណោមជនភៀសខ្លួនទាំងនោះគឹមាន៥នាក់ទទួលបានសិទ្ធិជ្រកកោន ជាផ្លូវការពីឧត្តមស្នងការអង្គការសហប្រជាជាតិទទួលបន្ទុកជនភៀស ខ្លួន (UNHCR) ប្រចាំប្រទេសថៃនោះហើយ។
អ្នកទាំង៥អាចនឹងមិនត្រូវបានចាប់បញ្ជូនខ្លួនទៅកម្ពុជាវិញទេ ប៉ុន្តែ ៥៥នាក់ទៀតនិងព្រះសង្ឃមួយអង្គផងនោះនឹងត្រូវអាជ្ញាថៃបញ្ជូនទៅ កម្ពុជាវិញនៅវេលាយប់ថ្ងៃសុក្រនេះម៉ោងនៅប្រទេសថៃ។
សកម្មជននៃសហព័ន្ធខ្មែរកម្ពុជាក្រោមដដែលមានប្រសាសន៍ថា លោកបារម្ភខ្លាំងនូវសុវត្ថិភាពរបស់ជនភៀសខ្លួនខ្មែរក្រោមទាំង៥៦ រូបនោះ ៖ «ឥឡូវហ្នឹងមេធាវីអន្តរជាតិហើយខាងមួយក្រុមខ្ញុំហ្នឹង កំពុងទំនាក់ទំនងជាមួយអង្គការផ្សេងៗដែលរង់ចាំលទ្ធផលពីប៉ូលិសដែរ ពីព្រោះប៉ូលិសថៃគេថា គេនឹងអនុវត្តតាមច្បាប់ប្រទេសគេ។ ខ្ញុំថា អ្នកទាំងអស់ហ្នឹងបើចាប់ទៅប្រទេសខ្មែរវិញ អាហ្នឹងវាអត់មានសុវត្ថិភាពទេ នឹងប្រឈមមុខនឹងបញ្ហាធំ។ ស្រុកខ្មែរគឺនឹងចាប់បញ្ជូនទៅវៀតណាមវិញ ហើយតែចាប់ទៅវៀតណាមវិញហ្នឹង គឺទី១មានតែចូលគុក ទី២គឺអត់មានសេរីភាពទេ»។
ពលរដ្ឋខ្មែរក្រោមទាំងនោះបានភៀសខ្លួនទៅប្រទេសេថៃដើម្បីសុំ សិទ្ធិជ្រកកោនជាជនភៀសខ្លួននយោបាយដែលអ្នកខ្លះបានទៅតាំងពីឆ្នាំ ២០០៦មក៕
អត្ថបទវិទ្យុអាស៊ីសេរី.
