តាមព័ត៌មានទទួលបានពីប្រទេសថៃបានឲ្យដឹងថា ជនភៀសខ្លួនខ្មែរក្រោមចំនួន៧នាក់មានម្នាក់ជាកុមារីអាយុ៤ឆ្នាំមួយរូបផងដែលត្រូវអាជ្ញាធរថៃចាប់ដាក់គុកនៅទីក្រុងបាងកកតាំងពីថ្ងៃសៅរ៍សប្តាហ៍មុននោះត្រូវបានអាជ្ញាធរថៃបញ្ជូនមកប្រទេសកម្ពុជាវិញហើយកាលពីព្រឹកថ្ងៃទី១៩ ខែមីនា ឆ្នាំ២០០៩នេះ។
លោក អាង ច័ន្ទរិទ្ធ ប្រធានសមាគមការពារសិទិ្ធមនុស្សខ្មែរកម្ពុជាក្រោម បានថ្លែងបញ្ជាក់បន្ថែមថា លោកក៏បានទទួលព័ត៌មាននេះដូចគ្នានេះដែរ ក៏ប៉ុន្តែរហូតមកដល់ម៉ោង៤ល្ងាចថ្ងៃទី១៩ ខែមីនា លោកនៅមិនទាន់ទទួលដំណឹងអំពីការមកដល់របស់ជនភៀសខ្លួនខ្មែរក្រោមទាំង៧នាក់នោះនៅឡើយទេ។
លោក អាង ច័ន្ទរិទ្ធ បានមានប្រសាសន៍ថា ៖ «ខ្ញុំបានទទួលព័ត៌មានពីខាងបាងកកហ្នឹងថា យប់មិញនេះប្រហែលជាម៉ោង៣ជាងគេបានបញ្ជូនខ្មែរកម្ពុជាក្រោម៧នាក់ហ្នឹងមកព្រំដែននៅប៉ោយប៉ែតហ្នឹងហើយ អារញ្ញហ្នឹង ហើយខ្ញុំបានទាក់ទងជាមួយនឹងខាងអង្គការមួយដែរដើម្បីឲ្យគេជួយឃ្លាំមើលពេលដែលពួកគាត់ត្រូវគេបញ្ជូនមកដល់ហ្នឹង»។
មន្រ្តីប៉ូលិសកម្ពុជាម្នាក់នៅច្រកទ្វារព្រំដែនប៉ោយប៉ែតដែលសុំមិនឲ្យបញ្ចេញឈ្មោះបានបង្ហើបឲ្យដឹងថា រហូតមកដល់ម៉ោង៣រសៀលថ្ងៃទី១៨ មីនានេះ កម្មករចំណាកស្រុកកម្ពុជាដែលត្រូវបញ្ជូនមកមានតែមួយជើងប៉ុណ្ណោះ។
លោកបញ្ជាក់ថា កម្មករទាំងនោះមានចំនួនជាង១០នាក់ហើយជាអ្នករស់នៅក្នុងស្រុកអូរជ្រៅ ច្រកព្រំដែនប៉ោយប៉ែតនេះ គឺមិនមានខ្មែរកម្ពុជាក្រោមទេ។
លោក ឡេនី ថាច់ សមាជិកគណៈកម្មាធិការសិទ្ធិមនុស្សនៃសហព័ន្ធខ្មែរក្រោមពិភពលោកបានថ្លែងថា លោកកំពុងរង់ចាំទទួលដំណឹងពីការមកដល់នៃជនភៀសខ្លួនខ្មែរក្រោមទាំងនោះ ហើយលោកក៏មានការព្រួយបារម្ភអំពីជោគវាសនារបស់ជនទាំងនោះដែរ។
លោក ឡេនី ថាច់ បានឲ្យដឹងថា ៖ «ខ្ញុំបារម្ភថា បើគេមកដល់ខ្មែរ យើងបារម្ភទី១ ខ្លាចតែខ្មែរហ្នឹងបញ្ជូនទៅកម្ពុជាក្រោមវិញទេ ពីព្រោះអ្នកហ្នឹងគេមកពីប្រទេសវៀតណាម»។
កាលពីថ្ងៃទី១៨ មីនា អ្នកយកព័ត៌មានវិទ្យុអាស៊ីសេរីបានទាក់ទង លោក Guiseppe Devincengis អនុប្រធានការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនប្រចាំតំបន់សម្រាប់ថៃ, កម្ពុជា, លាវ និងវៀតណាម ដែលមានទីតាំងនៅទីក្រុងបាងកក ប្រទេសថៃ ដើម្បីសុំការបំភ្លឺអំពីស្ថានភាពនៃជនភៀសខ្លួនខ្មែរកម្ពុជាក្រោមទាំង៧នាក់នោះ។
ក៏ប៉ុន្តែលោកបដិសេធមិនធ្វើអត្ថាធិប្បាយដោយលើកសំអាងថា ការបដិសេធនេះជាគោលការណ៍នៃស្ថាប័នរបស់លោកដែលមិនឲ្យបញ្ចេញករណីរបស់ជនភៀសខ្លួនណាម្នាក់។
រីឯលោក Toshitsuki Kawauchi មន្រ្តីនាំពាក្យការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនប្រចាំនៅទីក្រុងភ្នំពេញបានថ្លែងថា លោកមិនដឹងអំពីការបញ្ជូនជនភៀសខ្លួនខ្មែរកម្ពុជាក្រោមទាំងនោះទេ ពីព្រោះការិយាល័យរបស់លោកមិនត្រូវបានទាក់ទងឲ្យទទួលកិច្ចការនេះឡើយ៕
អត្ថបទពី៖វិទ្យុអាស៊ីសេរី.
