គ្រួសារខែ្មរក្រោមដែលមានសេរីភាពវិញបន្ទាប់ពីអាជ្ញាធរវៀតណាម បានចាប់ឃុំខ្លួនមួយថ្ងៃ បានអំពាវនាវឲ្យអាជ្ញាធរវៀតណាមដោះលែងស្រ្តីម្នាក់ទៀតដែលកំពុងតែ ជាប់ឃុំនៅក្នុងគុកប្រទេសវៀតណាម។
គ្រួសារខែ្មរកម្ពុជាក្រោមនៅក្នុងឃុំអាងគឺ ស្រុកទិនបៀង ខេត្តអានយ៉ាង ឬខេត្តមាត់ជ្រូក ទឹកដីខែ្មរកម្ពុជាក្រោមដែលកំពុងកាន់កាប់ដោយវៀតណាម នៅថៃ្ង២២ កុម្ភៈនេះ បានទទូចសុំឲ្យអាជ្ញាធរវៀតណាម ដោះលែងស្រ្តីខែ្មរកម្ពុជាក្រោមម្នាក់ឲ្យមានសេរីភាពវិញនៅគ្រាដែល អាជ្ញាធរវៀតណាមកំពុងតែឃុំខ្លួននៅក្នុងគុកក្រោមបទបង្ករបួស ស្នាម។
ស្រ្តីខ្មែរកម្ពុជាក្រោមកំពុងតែជាប់ឃុំនោះមានឈ្មោះ នាង ចាន់ថន អាយុ៣០ឆ្នាំ មានផ្ទៃពោះ៣ខែនិងមានកូនតូចៗចំនួន៣នាក់ក្នុងបន្ទុក កំពុងតែជាប់ឃុំខ្លួននៅក្នុងគុកនៅក្នុងស្រុកញ៉ាបាង ខេត្តអានយ៉ាង ឬខេត្តមាត់ជ្រូក តាំងពីថៃ្ងទី១៧ ខែកុម្ភៈ កន្លងទៅថ្មីៗនេះ។
ប្រជាពលរដ្ឋខែ្មរកម្ពុជាក្រោមដែលត្រូវជាឪពុកមារបស់ នាង ចាន់ថន គឺលោក ចៅ រិន ដែលមានសេរីភាពវិញ បានថែ្លងប្រាប់វិទ្យុអាស៊ីសេរីតាមទូរស័ព្ទមកថា ៖ «សូមឲ្យដោះលែង នាង ចាន់ថន មក ឥឡូវគ្នាមានផ្ទៃពោះ៣ខែផង ហើយកូនតូចៗទៀត។ កូន៣នាក់ ប្រុសពីរស្រីមួយ…»។
ស្រ្តីខែ្មរកម្ពុជាក្រោមម្នាក់ទៀតបានថែ្លងថា នាង ចាន់ថន ត្រូវជាក្មួយស្រី មិនបានប្រព្រឹត្តដូចការចោទប្រកាន់នោះទេ ៖ «ខ្ញុំ កើតទុក្ខមិនសុខចិត្តទេ គេចោទក្មួយខ្ញុំហ្នឹងថាកាប់គេ។ ក្មួយខ្ញុំអត់បានកាប់គេទេ វាឃើញខ្ញុំដួល គេវ៉ៃខ្ញុំមាំពេកក៏ទៅជួយ ដល់ទៅមើល ពេលផ្ងារទៅក៏ទាក់ដៃវាជាន់ធាក់ក្មួយខ្ញុំ។ ឥឡូវក្មួយខ្ញុំគ្រាំគ្រា ហើយខ្ញុំក៏មានជំងឺត្រដាបត្រដួសដែរ»។
ស្វាមីរបស់ នាង ចាន់ថន ឈ្មោះ រ៉ា វឿន បានថែ្លងថា ៖ «គ្មានអីហូប ទេ យាយក៏ចាស់ទៀត ប្រពន្ធជាប់គុក វេទនាមាំណាស់។ កូនតូចៗ ហើយយាយគាត់ខ្វិនទៀត។ សូមដោះលែងប្រពន្ធខ្ញុំមកវិញ»។
ប្រធានសហគមន៍ខែ្មរកម្ពុជាក្រោមនៅក្នុងប្រទេសកម្ពុជា លោក ថាច់ សេដ្ឋា បានមានប្រសាសន៍ថា ៖ «យើង មានការបារម្ភយ៉ាងខ្លាំងចំពោះទង្វើដ៏អមនុស្សធម៌របស់អាជ្ញាធរ អាណានិគមវៀតណាមនេះ ពីព្រោះគាត់មានផ្ទៃពោះផង ហើយធ្វើទារុណកម្មយ៉ាងធ្ងន់ធ្ងរដល់គ្រួសារលោកស្រី នាង ចាន់ថន ហ្នឹង»។
វិទ្យុអាស៊ីសេរីបានព្យាយាមទាក់ទងតាមទូរស័ព្ទទៅស្ថានទូតវៀតណាម នៅក្នុងប្រទេសកម្ពុជា ដើម្បីសុំការបញ្ជាក់អំពីការដោះស្រាយរឿងឃុំខ្លួនស្រ្តីខែ្មរ ខែ្មរកម្ពុជាក្រោមនោះ ប៉ុន្តែពុំមានអ្នកឆ្លើយតប។
កាលពីថៃ្ងទី១៧ ខែកុម្ភៈ កន្លងទៅថ្មីៗនេះ អាជ្ញាធរវៀតណាមបានចាប់ឃាត់ខ្លួនគ្រួសារខែ្មរកម្ពុជាក្រោមចំនួន៥ នាក់ ក្នុងនោះមានឈ្មោះ ចៅ រិន ឈ្មោះ យាយ ស្រី ឈ្មោះ នាង រ៉ា ឈ្មោះ រ៉ា វឿន និងឈ្មោះ នាង ចាន់ថន ក្រោយពីមានការប៉ះទង្គិចមួយជាមួយនឹងអាជ្ញាធរវៀតណាម ដែលបានចូលមកច្រូតស្រូវទុំរបស់ក្រុមគ្រួសារនេះចោល។
ប្រជាពលរដ្ឋខែ្មរកម្ពុជាក្រោមចំនួន៤នាក់នៅក្នុងចំណោម៥នាក់ នោះ ត្រូវបានអាជ្ញាធរវៀតណាមបានដោះលែងឲ្យមានសេរីភាពវិញ ក្រោយពីបានចាប់ឃុំខ្លួនមួយថៃ្ង និងបានរងការឆក់ខ្សែភ្លើង ចងស្លាបសេកនិងវាយដំឲ្យរងរបួស៕
ប្រភពពី RFA.
