គ្រួសារខ្មែរក្រោមក្មេងចាស់ប្រុសស្រីចំនួន ២៤នាក់នៅព្រឹកថ្ងៃ២៨ ធ្នូនេះ បានមកប្រមូលផ្តុំគ្នានៅមុខទីស្នាក់ការនៃការិយាល័យ UNHCR ប្រចាំក្រុងភ្នំពេញ ដើម្បីស្នើសុំឲ្យអង្គការនេះជួយអន្តរាគមន៍ទៅរដ្ឋាភិបាលឲ្យទទួល ស្គាល់និងផ្តល់សិទ្ធិរស់នៅស្របច្បាប់ក្នុងប្រទេសកម្ពុជា។
នៅពីមុខទីស្នាក់ការការិយាល័យឧត្តមស្នងការសហប្រជាជាតិទទួល បន្ទុកជនភៀសខ្លួន (UNHCR) កុមារខ្មែរកម្ពុជាក្រោមតូចៗដែលមកតាមឪពុកម្តាយ បានឲ្យដឹងថា ពួកគេមិនចង់វិលទៅកាន់ទឹកដីខ្មែរក្រោមវិញទេ ព្រោះមានការភ័យខ្លាច។
កុមារតូចៗបន្តថា ពួកគេចង់រស់នៅក្នុងប្រទេសកម្ពុជាព្រោះបានរៀនភាសាខ្មែរ ៖ «ខ្ញុំ ចង់ចេះអក្សរខ្មែរ រៀនខ្មែរ។ សូមឲ្យសម្ដេច ហ៊ុន សែន ផ្ដល់សិទ្ធិជ្រកកោនស្របច្បាប់នៅប្រទេសកម្ពុជា ហើយជួយផ្ដល់ផ្ទះនៅ សាលារៀន ហើយដីស្រែឲ្យពួកខ្ញុំធ្វើ។ អត់បានរៀន មិនហ៊ានទៅ(វៀតណាម)ទេ ខ្លាចប៉ូលិសយួនចាប់។ ខ្ញុំចង់នៅស្រុកខ្មែរ បានរៀនខ្មែរ!»។
កាលពីថ្ងៃទី៥ ខែធ្នូកន្លងទៅ គ្រួសារពលរដ្ឋខ្មែរកម្ពុជាក្រោមទាំង ២៤នាក់ត្រូវបានអាជ្ញាធរថៃចាប់បញ្ជូនមកកម្ពុជាវិញ នៅគ្រាដែលពួកគេកំពុងស្វែងរកសិទ្ធិជ្រកកោននៅប្រទេសទី៣ ពីអង្គការ UNHCR ប្រចាំទីក្រុងបាងកក ប្រទេសថៃ គេចពីការតាមចាប់ខ្លួនរបស់អាជ្ញាធរវៀតណាមនៅខេត្តមាត់ជ្រូក ឬហៅជាភាសាវៀតណាមថា ខេត្តអានយ៉ាង ទឹកដីខ្មែរកម្ពុជាក្រោម។
ពលរដ្ឋខ្មែរក្រោមបានប្រាប់វិទ្យុអាស៊ីសេរីពីមូលហេតុដែលពួកគេ មកជួបប្រជុំគ្នានៅពីមុខទីស្នាក់ការ UNHCR ប្រហាក់ប្រហែលគ្នាថា ៖ «ចង់ឲ្យយូអិនជួយជំរុញទៅរដ្ឋាភិបាលខ្មែរដើម្បីឲ្យគាត់ផ្ដល់ សិទ្ធិជ្រកកោនស្របច្បាប់ឲ្យពួកខ្ញុំខ្មែរក្រោម។ ទៅក្រោម ខ្ញុំអត់ហ៊ានទៅទេ! ទៅ ដឹងតែងាប់ហើយ! ដាច់ស្បៀងនិងដាច់លុយកាក់ ថវិកា សុំស្នើឲ្យរាជរដ្ឋាភិបាលអាណិតអាសូរដល់ពួកយើងខ្ញុំ»។
ប្រធានក្រុមស៊ើបអង្កេតអង្គការការពារសិទ្ធិមនុស្ស លីកាដូ លោក អំ សំអាត មានប្រសាសន៍ថា ៖ «រដ្ឋាភិបាល លោកគួរតែប្រគល់សិទ្ធិសេរីភាពជូនពួកគាត់ហ្នឹង ឲ្យដូចជាប្រជាពលរដ្ឋខ្មែរយើងទាំងអស់ កុំឲ្យមានការភ័យខ្លាច!»។
វិទ្យុអាស៊ីសេរីមិនអាចទាក់ទងលោក ខៀវ សុភ័គ មន្ត្រីនាំពាក្យក្រសួងមហាផ្ទៃបានទេតាមទូរស័ព្ទ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាននិងជាមន្ត្រីនាំពាក្យរដ្ឋាភិបាលកម្ពុជា មានប្រសាសន៍ថា ពលរដ្ឋខ្មែរទាំង ២៤រូប ប្រសិនបើមិនមានប្រព្រឹត្តអ្វីខុសទេ ពួកគេមិនចាំបាច់ទៅសុំសិទ្ធិជ្រកកោនដល់ការិយាល័យអង្គការសហ ប្រជាជាតិនោះទេ ព្រោះពួកគេមានសិទ្ធិរស់នៅក្នុងប្រទេសកម្ពុជាដោយស្របច្បាប់។
លោក ខៀវ កាញារីទ្ធ បានបញ្ជាក់ថា ៖ «បើសិនជាគាត់គ្មានកំហុសអី ទេ គាត់អាចនៅបានតើ! ចាំបាច់គាត់ទៅដល់អង្គការសហប្រជាជាតិអី! នៅស្រុកខ្មែរខ្លួនឯងទេតើ!»។
បច្ចុប្បន្ននេះ មានជនជាតិខ្មែរក្រោមជាច្រើននាក់បានរស់នៅប្រទេសកម្ពុជា ដោយប្រកបរបរផ្សេងៗដូចជាប្រជាពលរដ្ឋខ្មែរទូទៅ ដោយមិនមានការបែងចែកឬប្រកាន់ថាជាខ្មែរក្រោមទេ តែពួកគេមិនមានលិខិតស្នាមផ្សេងៗផ្លូវការ ដូចជាអត្តសញ្ញាណប័ណ្ណឡើយ៕
ប្រភពពីវិទ្យុអាស៊ីសេរី.
