ប្រជាពលរដ្ឋខ្មែរកម្ពុជាក្រោមចំនួន២៤នាក់ ត្រូវបានប៉ូលិសថៃចាប់ខ្លួននៅក្រុងបាងកក ហើយគ្រោងនឹងបញ្ជូនទៅកម្ពុជាវិញនាពេលឆាប់ៗខាងមុខនេះ។
លោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោម មានប្រសាសន៍ប្រាប់វិទ្យុអាស៊ីសេរីតាមទូរស័ព្ទឲ្យដឹងកាលពីថ្ងៃ សុក្រ ៤ ធ្នូ ថា ក្នុងចំណោមពលរដ្ឋខ្មែរកម្ពុជាក្រោមទាំង២៤នាក់នោះ គឺមានអ្នកពេញវ័យ១៦នាក់និងក្មេង៨នាក់ ត្រូវបានប៉ូលិសថៃចាប់នៅទីក្រុងបាងកក កាលពីព្រឹកថ្ងៃពុធ ទី២ ខែធ្នូ ឆ្នាំ២០០៩ កន្លងមកថ្មីៗនេះ។
លោកប្រធានសហព័ន្ធខ្មែរកម្ពុជាក្រោមអះអាងថា ពលរដ្ឋខ្មែរក្រោមទាំងនោះជាជនភៀសខ្លួន ដែលមានខ្លះរត់គេចពីការតាមយាយីចាប់ខ្លួនរបស់អាជ្ញាធរវៀតណាមទើប រត់គេចមកកម្ពុជា និងរត់បន្តទៅដល់ប្រទេសថៃ ដើម្បីស្វែងរកសិទ្ធិជ្រកកោនក្នុងនាមជាជនភៀសខ្លួននយោបាយ។ ប៉ុន្តែក្នុងពេលរង់ចាំសម្ភាសន៍ដែលនៅមិនទាន់បានលិខិតជាផ្លូវការ ពីឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន (UNHCR) ប្រចាំទីក្រុងបាងកកផង ក៏ត្រូវប៉ូលិសថៃចាប់ពីបទចូលស្រុកគេខុសច្បាប់។
លោក ថាច់ ង៉ុកថាច់ មានប្រសាសន៍ថា ពលរដ្ឋខ្មែរក្រោមទាំងនោះ នឹងត្រូវអាជ្ញាធរថៃចាប់បញ្ជូនទៅកម្ពុជាវិញនៅថ្ងៃសៅរ៍នេះហើយ។
វិទ្យុអាស៊ីសេរីនៅមិនទាន់អាចទាក់ទងអាជ្ញាធរថៃ ដើម្បីសាកសួរពីបញ្ហានេះបាននៅឡើយទេមកដល់ព្រឹកថ្ងៃសៅរ៍នេះ។
ប៉ុន្តែទោះជាយ៉ាងណាក្តី លោកប្រធានសហព័ន្ធខ្មែរកម្ពុជាក្រោម មានក្តីបារម្ភខ្លាំងចំពោះពលរដ្ឋខ្មែរក្រោមទាំងនោះ ទីមួយគឺសុវត្ថិភាពសន្តិសុខ ដោយថា បើរដ្ឋាភិបាលក្រុងភ្នំពេញ ព្រមប្រគល់ខ្មែរក្រោមទាំងនោះឲ្យទៅរដ្ឋាភិបាលក្រុងហាណូយ នោះខ្មែរក្រោមទាំង២៤នាក់ អាចនឹងត្រូវរងទារុណកម្ម ឬក៏អាចជាប់ពន្ធនាគារ អាស្រ័យហេតុនេះ លោក ថាច់ ង៉ុកថាច់ សូមអំពាវនាវដល់រដ្ឋាភិបាលកម្ពុជា សូមមេត្តាជួយដល់ខ្មែរទាំងនោះផង និងសូមអំពាវនាវឲ្យអង្គការសង្គមស៊ីវិលជាតិនិងអន្តរជាតិ មេត្តាជួយពលរដ្ឋខ្មែរក្រោមឲ្យអាចគេផុតពីការរំលោភសិទ្ធិមនុស្ស នោះផង៕
ប្រភពវិទ្យុអាស៊ីសេរី.
