មានដំណឹងថា គ្រួសារខ្មែរកម្ពុជាក្រោមដែលជំពាក់ បំណុលថ្លៃជីរពីជនជាតិវៀតណាម ត្រូវប្រឈមមុខ នឹង ការរឹបអូសដីស្រែ ឬផ្ទះសំបែង ដើម្បីទូទាត់ជាមួយ និង ម្ចាស់បំណុល។
គ្រួសារខ្មែរកម្ពុជាក្រោមមួយគ្រួសារ នៅក្នុងឃុំអាង គឺ (An Cu) ស្រុកទិនបៀន (Tinh Bien) ខេត្តអានយ៉ាង (An Giang) ទឹកដីខ្មែរកម្ពុជាក្រោម គ្រប់គ្រងដោយវៀតណាម បានឲ្យដឹងថា គាត់កំពុងតែមានការព្រួយបារម្ភយ៉ាងខ្លាំង ក្រោយពីមេឃុំជនជាតិវៀត ណាម បានមកប្រាប់លោកថា គេចង់រឹបយកដីស្រែ ឬផ្ទះសំបែង នៅពេលខាងមុខ បើសិនណាគ្រួសារនេះមិនមានប្រាក់ចំនួន ១០លានដុង (ស្មើនិងជាង ២លានរៀល) ដើម្បីសងថ្លៃជីរឲ្យទៅគ្រួសារវៀតណាម ជាម្ចាស់បំណុលទេនោះ។
គ្រួសារខ្មែរកម្ពុជាក្រោមនោះបានឲ្យដឹងថា គាត់បានជំពាក់បំណុលថ្លៃជីររយៈពេល ១ឆ្នាំមកហើយ ដោយសារតែផលស្រូវទុំជាង ១ហិកតារដែលខ្លួនបង្កបង្កើនផលកន្លងមក ត្រូវបានអាជ្ញាធរវៀតណាម បានចុះមកច្រូតយកអស់គ្មានសល់ ពីព្រោះដីស្រែនោះត្រូវបានគ្រួសារវៀតណាមដណ្ដើមយកកន្លងមក ប៉ុន្តែមិនហ៊ានចុះមកច្រូតដោយខ្លួនឯង។
ប្រជាពលខ្មែរកម្ពុជាក្រោមឈ្មោះ រ៉ា វឿន អាយុ៣២ឆ្នាំ នៅក្នុងឃុំអាងគឺ ស្រុកទិនបៀង ខេត្តអានយ៉ាង ឬខេត្តមាត់ជ្រូក ទឹកដីខ្មែរកម្ពុជាក្រោម បានថ្លែងថា គ្រួសាររបស់លោកមានជីវភាពក្រីក្រ គ្មានលទ្ធភាពសងបំណុលទេ ៖ “តាម ដែលពាក្យគេថាមែន គឺមានអ្វីគេរឹបអូសយកនោះ ខ្ញុំក៏ខឹងក៏ថាទៅវិញថា បើស្រែរដ្ឋអំណាចច្រូតស្រូវខ្ញុំយកទៅអស់ហើយ បានអ្វីឲ្យខ្ញុំសងថ្លៃជីរគេ។ ហើយគេថា ចុះនរណាឲ្យទៅធ្វើស្រែហ្នឹង ចុះដីរបស់ខ្ញុំមិនឲ្យធ្វើ ខ្ញុំក៏ឆ្លើយអ៊ីចឹងទៅ”។
លោកបានឲ្យដឹងថា មេឃុំអាងគឺ ជនជាតិវៀតណាម បានមកប្រាប់លោកផ្ទាល់មាត់កាលពីថ្ងៃអង្គារ ទី២៥ ខែមករា ថ្មីៗនេះ។
ស្ត្រីខ្មែរកម្ពុជាក្រោមឈ្មោះ ចាន់ ថន ជាភរិយារបស់លោក រ៉ា វឿន ដែលទើបរួចចេញពីពន្ធនាគារ នៅក្នុងប្រទេសវៀតណាម ដោយសារតែបានងើបតវ៉ាទាមទារដីស្រែកសិកម្មកន្លងមក បានថ្លែងថា ៖ “ឥឡូវ បើគ្មានសងគេ គេរឹបអូសផ្ទះរបស់ខ្ញុំ។ ឥឡូវគ្មានអ្វីចិញ្ចឹមកូន ចិញ្ចឹមចៅអ្វីទេ។ បងអ្នកធំ អ្នកធំនៅហ្នឹងជួយខ្ញុំផង”។
វិទ្យុអាស៊ីសេរីមិនអាចសុំការពន្យល់ពីអាជ្ញាធរវៀតណាមបានទេ ចំពោះការចោទប្រកាន់នេះ។
ប្រធានសហគមន៍ខ្មែរកម្ពុជាក្រោមនៅក្នុងប្រទេសកម្ពុជាលោក ថាច់ សេដ្ឋា បានមានប្រសាសន៍ថា ៖ “នេះហើយបង្ហាញអំពីភាពរើសអើងពូជសាសន៍ និងការគាបសង្កត់កាន់តែច្បាស់មែនទែន”។
កាលពីថ្ងៃទី១៣ ខែមករា និងថ្ងៃទី១៤ ខែមករា កន្លងទៅនេះ ប្រធានមជ្ឈមណ្ឌលវប្បធម៌ខ្មែរកម្ពុជាក្រោម លោក យន្ត ថារ៉ូ បានផ្ញើលិខិតដាច់ដោយឡែកជូនលោក សឹន សុងសឺន (Son Song Son) សមាជិកមជ្ឈិមបក្សកុម្មុយនិស្តវៀតណាម និងមន្ត្រីតំណាងខ្មែរកម្ពុជាក្រោម និងរដ្ឋមន្ត្រីការបរទេសកម្ពុជា លោក ហោ ណាំហុង ឲ្យជួយធ្វើកិច្ចអន្តរាគមន៍ឲ្យអាជ្ញាធរវៀតណាមចាប់ខ្លួនជនល្មើស ដែលបានសម្លាប់ខ្មែរកម្ពុជាក្រោមចំនួន ២នាក់ មានឈ្មោះ ថាច់ ធន អាយុ២៨ឆ្នាំ និងឈ្មោះ ថាច់ វ៉ាង អាយុ២១ឆ្នាំ ផ្ដន្ទាទោស។
ខ្មែរកម្ពុជាក្រោមចំនួន ២នាក់នោះ ត្រូវបានប្រភពខ្មែរកម្ពុជាក្រោមអះអាងថា បានរងការសម្លាប់ដោយជនជាតិវៀតណាម នៅទីក្រុងព្រៃនគរ កាលពីដើមខែមករាកន្លងទៅនេះ ដោយសារការរើសអើងពូជសាសន៍។ គ្មានសេចក្ដីរាយការណ៍ថា មានការស៊ើបអង្កេតតាមសំណើនោះទេ៕ ប្រភពព័ត៌មាន៖ RFA.
