អង្គការសហប្រជាជាតិ នៅថ្ងៃអង្គារនេះ នឹងបើកកិច្ចប្រជុំមួយនៅប្រទេសបែលហ្ស៊ិក ដើម្បីរាយការណ៍អំពី ស្ថានភាពបច្ចុប្បន្ន នៃភាពក្រីក្ររបស់ជនជាតិដើមភាគ តិច នៅក្នុងប្រទេសវៀតណាម។
ប្រធានសហព័ន្ធខ្មែរកម្ពុជាក្រោម លោក ថាច់ ង៉ុកថាច់ មានប្រសាសន៍ឲ្យវិទ្យុអាស៊ីសេរីដឹងថា កិច្ចប្រជុំនោះ នឹងប្រព្រឹត្តិទៅនៅថ្ងៃទី១៥ ខែមិនា ឆ្នាំ២០១១ នៅក្នុង ទីក្រុងប្រ៊ុចសែល នៃប្រទេសបែលហ្ស៊ិក។
មន្ត្រីអង្គការសហប្រជាជាតិទាំងនេះ បានអញ្ជើញ ទៅធ្វើទស្សនកិច្ចជាផ្លូវការ នៅភូមិភាគខាងត្បូងនៃ ប្រទេសវៀតណាម ក្នុងដែនដីកម្ពុជាក្រោមផងដែរ ដើម្បីស្វែង យល់ស្ថានការណ៍ជាក់ស្ដែងនៅទីនោះ កាលពីចន្លោះ ថ្ងៃទី៥ ដល់ថ្ងៃទី១៥ ខែកក្កដា ឆ្នាំ២០១០។
លោកស្រី ម៉ាហ្គី ម៉ារភី (Maggie Murphy) រដ្ឋលេខាធិការនៃអង្គការប្រជាជាតិ និងប្រជាពលរដ្ឋដែលគ្មានតំណាងនៅក្នុងរដ្ឋាភិបាល ឬហៅកាត់អង្គការ UNPO មានប្រសាសន៍ពីប្រទេសបែលហ្ស៊ិកតាមទូរស័ព្ទ បានឲ្យវិទ្យុអាស៊ីសេរីដឹងថា កន្លងមកមានសេចក្ដីរាយការណ៍ថា មានករណីមួយចំនួនពាក់ព័ន្ធការរើសអើង និងការរំលោភសិទ្ធិមនុស្សលើប្រជាពលរដ្ឋខ្មែរក្រោម នៅកម្ពុជាក្រោម៖ «អ្នកជំនាញឯករាជ្យរបស់អង្គការសហប្រជាជាតិ ផ្នែកជនជាតិភាគតិច បានទៅធ្វើទស្សនកិច្ចនៅប្រទេសវៀតណាម គឺយើងបានផ្ដល់ព័ត៌មានត្រួសៗដល់ក្រុមអ្នកជំនាញទាំងនោះ មុនពេលគេទៅកាន់ប្រទេសវៀតណាម ដោយយើងបញ្ជាក់ឲ្យបានច្បាស់ថា គាត់ពិតជាអញ្ជើញទៅពិនិត្យមើលសហគមន៍ខ្មែរកម្ពុជាក្រោម ហើយគាត់នឹងរាយការណ៍អំពីស្ថានភាពរបស់ខ្មែរក្រោមទាំងនោះ នៅក្នុងរបាយការណ៍របស់អង្គការសហប្រជាជាតិ ដែលនឹងចេញសម្រាប់ឆ្នាំនេះ»។
លោក ថាច់ ង៉ុកថាច់ មានប្រសាសន៍ឲ្យដឹងបន្ថែមថា ប្រតិភូពីររូបនៃសហព័ន្ធខ្មែរកម្ពុជាក្រោម ដែលនឹងទៅចូលរួមក្នុងកិច្ចប្រជុំនៅប្រទេសបែលហ្ស៊ិក នៅថ្ងៃអង្គារស្អែកនេះ រួមមានតំណាងយុវជន លោក ប៊ី បូរា និង គួន តុំអា ដើម្បីទៅស្ដាប់រាយការណ៍របស់អង្គការសហប្រជាជាតិ ស្ដីអំពីស្ថានភាពបច្ចុប្បន្ន នៃភាពក្រីក្ររបស់ជនជាតិដើមភាគតិច និងខ្មែរក្រោមនៅភូមិភាគវៀតណាមខាងត្បូង៕ ប្រភព៖ វិទ្យុអាស៊ីសេរី
