សហព័ន្ធខ្មែរកម្ពុជាក្រោមគ្រោងនឹងរៀបចំពិធីបុណ្យបង្សុកូលនៅ រដ្ឋកាលីហ្វូនីញ៉ាសហរដ្ឋអាមេរិកដើម្បីរំឭកនិងចងចាំនូវ ប្រវត្តិសាស្រ្តដ៏ជូរចត់របស់ជនរួមជាតិខ្មែរដែលស្លាប់អស់ជិត ២លាននាក់ កាលពីសម័យខ្មែរក្រហមក្តោបក្តាប់កម្ពុជានាពាក់កណ្តាលទសវត្សរ៍ ១៩៧០។
សហព័ន្ធខ្មែរកម្ពុជាក្រោម បានឲ្យវិទ្យុអាស៊ីសេរីដឹងថា ពិធីបុណ្យនោះនឹងរៀបចំឡើងនៅថ្ងៃអាទិត្យ ទី១៧ ខែឧសភានេះ នៅឯវត្តខេមររង្សី នៅទីក្រុងសេនហ៊ូស្សេ នៃរដ្ឋកាលីហ្វូនីញ៉ា ដោយមានទាំងកិច្ចពិភាក្សាពិសេសផង។
កម្មពិធីបុណ្យរួមមាន និមន្តព្រះសង្ឃដារបង្សុកូលជូនដល់វិញ្ញាណក្ខន្ធជនរងគ្រោះក្នុងរបប ខ្មែរក្រហមនិងមានសេចក្តីថ្លែងការណ៍អំពីបញ្ហាខ្មែរក្រហមដោយ បណ្ឌិតសាស្រ្តាចារ្យល្បីឈ្មោះមួយរូបមកពីសកលវិទ្យាល័យ ស្តែនហ្វត មានកិច្ចពិភាក្សាអំពីសោកនាដកម្មខ្មែរក្រហម មានសំណួរចម្លើយពីបញ្ហាខ្មែរក្រហមនិងមានសេចក្តីថ្លែងការណ៍អំពី កិច្ចប្រជុំនៅទីក្រុងហ្សឺណែវ ប្រទេសស្វ៊ីស របស់សហព័ន្ធខ្មែរកម្ពុជាក្រោមនៅឯក្រុមប្រឹក្សាសិទ្ធិមនុស្សនៃ អង្គការសហប្រជាជាតិ កាលពីថ្ងៃទី៨ ខែឧសភាសប្តាហ៍មុននេះ។
លោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោមមានប្រសាសន៍ឲ្យវិទ្យុអាស៊ីសេរីដឹង បន្ថែមកាលពីពេលថ្មីៗនេះអំពីកិច្ចពិភាក្សាពិសេសក្នុងឱកាសរៀបចំ ពិធីបុណ្យបង្សុកូលនាថ្ងៃអាទិត្យចុងសប្តាហ៍នេះ ៖ «ខ្ញុំនឹង ជម្រាបជូននូវផែនការនិងសកម្មភាពរបស់សហព័ន្ធកន្លងមក និងផែនការទៅខាងមុខ តើយើងត្រូវធ្វើយ៉ាងម៉េចខ្លះ? ហើយឲ្យគាត់បានយល់ថា កម្មវិធីការតស៊ូអហិង្សាហ្នឹងមានឥទ្ធិពល មានផលប្រយោជន៍យ៉ាងណាខ្លះចំពោះខ្មែរកម្ពុជាក្រោម។ ទី២ទៀត គោលបំណងធំៗ គឺទៅពិគ្រោះគ្នាអំពីបញ្ហាខ្មែរក្រោមដែលទទួលរងគ្រោះជំនាន់ខ្មែរ ក្រហមចូលសម្លាប់ទាំងគ្រួសារៗ ហើយយើងខ្ញុំនឹងជួបបណ្ឌិត ហើយនិងអយ្យកាជនបរទេសមួយចំនួនដែលចង់ដឹងរឿងនេះដែរ ដើម្បីឲ្យគាត់ជួយយ៉ាងណាឲ្យបញ្ហាខ្មែរក្រោមដែលត្រូវសម្លាប់នៅ ក្នុងជំនាន់ប៉ុលពតហ្នឹងឲ្យបានចូលទៅក្នុងតុលាការកាត់ទោសខ្មែរ ក្រហមនៅក្នុងព្រះរាជាណាចក្រកម្ពុជា»។
លោក ថាច់ ង៉ុកថាច់ បញ្ជាក់ថា មានពលរដ្ឋខ្មែរក្រោមរាប់ពាន់គ្រួសារ ដែលរងទារុណកម្មនិងត្រូវបានពួកខ្មែរក្រហមសម្លាប់នៅទូទាំង កម្ពុជា កាលពីសម័យខ្មែរក្រហមនោះ៕
អត្ថបទវិទ្យុអាស៊ីសេរី.
