យ៉ាងហោចណាស់មានខ្មែរក្រោម ៣នាក់ក្នុងចំណោម ៧នាក់ ដែលត្រូវបានអាជ្ញាធរសៀមចាប់បញ្ជូនឲ្យវិល ត្រឡប់មកកាន់កម្ពុជាវិញ កាលពីសប្ដាហ៍កន្លងទៅពួក គេ បានវិលត្រឡប់ចូលទៅក្នុងប្រទេសសៀមវិញ ហើយ កាលពីថ្ងៃចន្ទបន្ទាប់ពីពួកគេបានព្យាយាមសុំ អន្តរាគមន៍ ពីរដ្ឋាភិបាលខ្មែរក្នុងការផ្ដល់អត្តសញ្ញាណ ដល់ពួកគេពុំបានសម្រេច។ លោក ជា សុគន្ធ អគ្គលេខាធិការសមាគមប្រជាធិបតេយ្យ និងឯករាជ្យសេដ្ឋកិច្ចក្រៅប្រព័ន្ធ ប្រចាំខេត្ដបន្ទាយមានជ័យជាទី ដែលស្នាក់ការរបស់សមាគមនេះ បានទទួលយកខ្មែរក្រោមទាំង ៧នាក់ឲ្យស្នាក់នៅបណ្ដោះអាសន្នកាល ពីសប្ដាហ៏មុនបានថ្លែងប្រាប់កាសែតក្នុងស្រុកមួយ កាលពីថ្ងៃពុធម្សិលមិញថា”ពួកគេបានចាកចេញកាលពីថ្ងៃចន្ទហើយពួកគេ ៣នាក់បានត្រឡប់ទៅធ្វើការ នៅប្រទេសថៃ ៣នាក់ទៀតបានមកធ្វើការ នៅភ្នំពេញនិងម្នាក់ធ្វើដំណើរទៅកាន់ប៉ៃលិន”។
ការចាកចេញគឺបន្ទាប់ពីពួកគេបានព្យាយាមស្នើសុំអន្តរាគមន៍ពីរដ្ឋាភិបាលឲ្យផ្ដល់ អត្តសញ្ញាណប័ណ្ណសញ្ជាតិខ្មែរដល់ពួកគេមិនបានសម្រេច។អត្តសញ្ញាណប័ណ្ណសញ្ជាតិខ្មែរគឺជាតម្រូវការចាំបាច់របស់ពួកគេក្នុងការដើរហើរនិងស្វែងរកការងារធ្វើចិញ្ចឹមជីវិតក្នុងប្រទេសកម្ពុជា។
ពលរដ្ឋខ្មែរក្រោមដែលត្រូវបានអាជ្ញាធរសៀមចាប់បញ្ជូនខ្លូនមកកាន់ប្រទេសកម្ពុជាតាមច្រកអន្តជាតិប៉ោយប៉ែតកាលពីសប្ដាហ៏មុននេះ គឺបន្ទាប់ពីពួកគេត្រូវបានបដិសេធមិនផ្ដល់ឋានៈជាជនភៀសខ្លួនដោយឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួនដែលប្រចាំការនៅបាងកក។
ទោះបីជារដ្ឋធម្មនុញ្ញរបស់ប្រទេសកម្ពុជាបានទទួលស្គាល់ពីសិទ្ធិខ្មែរក្រោមថា មានសិទ្ធិពេញលេញដូចគ្នាទៅនឹងប្រជាពលរដ្ឋផ្សេងទៀតដែលកំពុងរស់នៅលើទឹកដីកម្ពុជានេះក្ដី ក៏គេកត់សម្គាល់ឃើញថា ជារឿយៗអាជ្ញាធរខ្មែរនៃរបប ហ៊ុន សែន តែងតែបង្ហាញឥរិយាបថព្រងើយកន្តើយខណៈដែលក្រុមអ្នកមានវិបត្ដិខ្មែរក្រោមអំពាវនាវឲ្យជួយ។ ហើយមានខ្មែរក្រោមខ្លះដែលទទូលរកការធ្វើទុក្ខបុកម្និញពីសំណាក់រដ្ឋាភិបាលយួន ហើយពឹងខ្មែរឲ្យជួយបែរជាត្រូវបានអាជ្ញាធរខ្មែរចាប់ឲ្យយួនដាក់គុកទៀតផង៕ ប្រភពព័ត៌មាន៖ សារព័ត៌មានសេរី
