ថ្ងៃសុក្រ, 06 ខែសីហា 2010 ដោយលោក វោហារជាតិ វិទ្យុ អាស៊ីសេរី ភ្នំពេញ
សមាគមខ្មែរកម្ពុជាក្រោមនានា បានចេញសេចក្ដីប្រកាសព័ត៌មានមួយនៅថ្ងៃទី៥ សីហា ប្រតិកម្មទៅ នឹងសេចក្ដីថ្លែងការណ៍របស់មេដឹកនាំសន្តិសុខវៀតណាម។ សមាគមខ្មែរក្រោមចំនួន៧ ដែលមានចុះហត្ថលេខាថ្នាក់ដឹកនាំសមាគមផងនោះ បានចេញសេចក្ដីថ្លែងការណ៍មួយនៅថ្ងៃទី៥ សីហានេះ ឆ្លើយតបទៅ លោក ត្រឹង ដាយខ្វាង អនុរដ្ឋមន្ត្រី ក្រសួងសន្តិសុខសាធារណប្រទេសវៀតណាម ដែលបានសុំឲ្យរដ្ឋាភិបាលកម្ពុជាបច្ចុប្បន្នបង្ក្រាបក្រុមខ្មែរ កម្ពុជាក្រោមនោះ បានអះអាងថា វៀតណាមធ្វើដូច្នេះគឺជារំលោភអធិបតីភាពកម្ពុជាទាំងស្រុង និងជាការគំរាមបំបាក់ស្មារតី ព្រមទាំងបំបិទសិទ្ធិសេរីភាពខ្មែរកម្ពុជាក្រោម។ព្រះសង្ឃ ចៅ សុផាត ប្រធានសម្ព័ន្ធសមណនិស្សិត និស្សិតខ្មែរកម្ពុជាក្រោមដែលបានចុះហត្ថលេខាលើសេចក្ដីថ្លែងការណ៍ នោះក្នុងចំណោមសមាគមដទៃទៀត ឆ្លើយតបទៅនឹងមេដឹកនាំវៀតណាម មានសង្ឃដីកា សកម្មភាពខ្មែរកម្ពុជាបានធ្វើកន្លងមកមិនបានប្រឆាំងបទេសវៀតណាមទេ គឺគ្រាន់តែជាសកម្មភាពទាមទារសិទ្ធិសេរីភាពពីអាជ្ញាធរវៀតណាមដែល កៀបសង្កត់សិទ្ធិសេរីភាពខ្មែរកម្ពុជាក្រោមតែប៉ុណ្ណោះ ខ្មែរកម្ពុជាក្រោមមិនមានអំណាចយោធាណាអាចផ្ដួលរំលំរដ្ឋាភិបាល វៀតណាមបានទេ ៖
សូមចុចស្តាប់សេចក្តីរាយការណ៍របស់លោក វោហារជាតិ វិទ្យុអាស៊ីសេរី ភ្នំពេញ
«ទីមួយការស្នើអ៊ីចឹងយើងគិតឃើញថាជាការរំលោភ មកលើអធិបតីភាពព្រះរាជាណាចក្រកម្ពុជា។ យើងចង់និយាយថា យើងធ្វើមិនមែនយើងចង់ប្រឆាំងទេ យើងធ្វើក្នុងតួនាទីជាខ្មែរ បាត់បង់នូវអ្វីដែលជារបស់ខ្មែរ យើងគ្រាន់តែនិយាយនូវអ្វីដែលជារឿងពិតតើ។ អីចឹង ដល់ពេលគេចោទប្រកាន់មកលើយើងអ៊ីចឹង យើងត្រូវតែប្រតិកម្មទៅវិញ ថាអ្វីដែលគេចោទប្រកាន់នោះដូចជាជ្រុលហួសមកលើខ្មែរក្រោមពេក»។
និស្សិតសង្ឃកម្ពុជាក្រោមមួយអង្គមានសង្ឃដីកាមិនបង្ហាញ អត្តសញ្ញាណ ព្រួយបារម្ភអំពីសុវត្ថិភាពខ្មែរកម្ពុជាក្រោមដែលកំពុងស្នាក់នៅ និងរស់នៅក្នុងប្រទេសកម្ពុជានឹងត្រូវបានគេរំលោភបំពានសិទ្ធិ សេរីភាព ឬមានអំពើហិង្សាផ្សេងៗកើតឡើងបើសិនជារដ្ឋាភិបាលកម្ពុជាអនុវត្តតាម សំណើរបស់មេដឹកនាំប្រទេសវៀតណាមមែននោះ ៖ «រឿងនឹងគឺជារឿងដែលគេ លើកឡើងដើម្បីឲ្យរដ្ឋាភិបាលកម្ពុជានិងក្រសួងមហាផ្ទៃយល់ច្រឡំ ជាមួយបងប្អូនកម្ពុជាក្រោម។ គឺជារឿងបំបែកបំបាក់ខ្មែរនៅកម្ពុជា និងខ្មែរក្រោម។ អ៊ីចឹងខ្មែរក្រោមមានកំហឹងជាមួយខ្មែរនៅកម្ពុជារឿងនេះធ្វើឲ្យ ខ្មែរទាំងពីរ មើលមុខគ្នាមិនចំ មិនចុះសម្រុងគ្នា ហើយភាគច្រើនគេតែងតែរកមធ្យោបាយឲ្យខ្មែរនៅកម្ពុជា និងខ្មែរក្រោមបែកបាក់គ្នារហូត»។
សមាគមទាំង៧នោះមាន មិត្តសមាគមខ្មែរកម្ពុជាក្រោម សមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ មជ្ឈមណ្ឌលវប្បធម៌ខ្មែរកម្ពុជាក្រោម សម្ព័ន្ធសមណនិស្សិត និស្សិតខ្មែរកម្ពុជាក្រោម សមាគមព្រះសង្ឃខ្មែរកម្ពុជាក្រោម មូលនិធិខ្មែរសម្រាប់ជនក្រីក្រ និងសមាគមនារីខ្មែរកម្ពុជាក្រោម។
សូមរំលឹកថា លោក ត្រឹង ដាយខ្វាង អនុរដ្ឋមន្ត្រី ក្រសួងសន្តិសុខសាធារណប្រទេសវៀតណាម បានសុំឲ្យរដ្ឋាភិបាលកម្ពុជា ជួយទប់ស្កាត់ និងរារាំងក្រុមខ្មែរកម្ពុជាក្រោមដែលលោកអះអាងនៅក្នុងកិច្ចប្រជុំ ស្ដីអំពីការកសាងសន្តិភាពនិងមិត្តភាពព្រំដែននៃប្រទេសទាំងពីរលើក ទី៦ នៅសណ្ឋាគារហិនធើខុនធីណនថល ក្រុងភ្នំពេញ កាលពីថ្ងៃទី៣ សីហាកន្លងទៅ ដែលលោក ត្រឹង ដាយខ្វាង បញ្ជាក់ថា ក្រុមខ្មែរកម្ពុជាក្រោមដែលលោកបញ្ជាក់ជាអក្សរកាត់ថាក្រុម KKK កំពុងបំបែកបំបាក់ទំនាក់ទំនងកម្ពុជាវៀតណាមបច្ចុប្បន្នដែលកំពុងតែ ល្អូកល្អិនជាមួយគ្នា។
ក្នុងឱកាសនោះផងដែរ លោកឧត្ដមសេនីយ៍ផ្កាយ៤ នេត សាវឿន អគ្គស្នងការនគរបាលជាតិប្រទេសកម្ពុជា បានថ្លែងថា កន្លងមកប្រទេសទាំងពីរ កម្ពុជា-វៀតណាមបានសហការគ្នាកសាងតំបន់ព្រំដែនកម្ពុជា-វៀតណាមបានជោគ ជ័យធំធេង ពីក្រុមដែលលោកថា អមិត្តដែលប៉ុនប៉ងបំផ្លាញចំណងសាមគ្គីភាពនៃប្រទេសទាំងពីរ។ ចំណែក លោក ខៀវ សុភ័គ្រ អ្នកនាំពាក្យក្រសួងមហាផ្ទៃ បានថ្លែងថា ការប៉ុនប៉ងយកទឹកដីកម្ពុជាក្រោមមកវិញ គឺខុសច្បាប់រដ្ឋធម្មនុញ្ញខ្មែរបច្ចុប្បន្ន។
លោក ត្រឹង ដាយខ្វាង ថ្លែងថា លោកចង់កាត់បន្ថយដល់កម្រិតអតិបរមានៃសកម្មភាពបំផ្លិចបំផ្លាញ ប្រឆាំងរបស់ពួកក្រុមអង្គការខ្មែរកម្ពុជាក្រោម ឬ KKK។ ទប់ស្កាត់រាល់សកម្មភាពកេងចំណេញ ការជួលវិទ្យុជាតិ និងវិទ្យុឯកជនកម្ពុជា ក្នុងគោលបំណងឃោសនាប្រឆាំងនឹងវៀតណាម និងទំនាក់ទំនងប្រពៃណី សម្ព័ន្ធភាពរវាងប្រទេសទាំងពីរ។
ឆ្លើយតបទៅនឹងសម្ដីមេដឹកនាំវៀតណាមរូបនោះលោក យិន ថារ៉ូ ប្រធានមជ្ឈមណ្ឌលវប្បធម៌ខ្មែរកម្ពុជាក្រោម ថ្លែងថា ការផ្សព្វផ្សាយអំពីខ្មែរកម្ពុជាក្រោមតាមវិទ្យុ នៅលើទឹកដីកម្ពុជាសព្វថ្ងៃនេះ មិនមែនជានយោបាយប្រឆាំងវៀតណាមទេ គ្រាន់តែចង់រក្សាវប្បធម៌ខ្មែរកម្ពុជាក្រោមដែលបានបាត់បង់តែ ប៉ុណ្ណោះ ៖ «វៀតណាមនៅស្រុកខ្មែរ គេមានវិទ្យុវៀតណាមពាសពេញកន្លែងទាំងអស់ មានសារព័ត៌មានវៀតណាម មានទាំងសាលារៀនទាំងវត្តវៀតណាមនៅពេញទឹកពេញដីស្រុកខ្មែរផង។ តែត្រង់ខ្មែរកម្ពុជាក្រោម ផ្សព្វផ្សាយវិទ្យុ ហើយជួលវិទ្យុឯកជន បានតែប៉ុន្មានម៉ោង រកលុយជួលមិនបានផង បែរជាវៀតណាមមានគំនិតជំរុញឲ្យរដ្ឋាភិបាលបិទសកម្មភាពសមាគមខ្មែរ កម្ពុជាក្រោម។ នេះជាបញ្ហាមួយដែលយើងទាំងអស់គ្នាសោកស្ដាយ និងក្ដុកក្ដួលអារម្មណ៍មែនទែន ដោយសាររឿងខ្មែរសោះ បែរជាវៀតណាមមកលូកដៃចូលកិច្ចការផ្ទៃក្នុងកម្ពុជាធ្ងន់ធ្ងរជាទី បំផុត»។
សេចក្ដីថ្លែងការណ៍របស់ក្រុមសមាគមខ្មែរកម្ពុជាក្រោមបានប្រកាសថា ខ្មែរក្រោមមិនមានកម្លាំងយោធាណាអាចផ្ដួលរំលំរដ្ឋាភិបាលវៀតណាមបាន ទេ ហើយខ្មែរកម្ពុជាក្រោមមិនមានបំណងផ្ដួលរំលំរដ្ឋាភិបាលវៀតណាមម្ដង ណាឡើយ ហើយសូម្បីតែយល់សប្តដូច្នេះក៏មិនដែលផង ព្រោះថាសូម្បីតែប្រទេសអាមេរិកដែលជាប្រទេសមហាអំណាចយោធាក្នុងលោក នោះ ក៏មិនអាចច្បាំងឈ្នះវៀតណាមផង ចុះទម្រាំខ្មែរកម្ពុជាក្រោម ដែលសព្វថ្ងៃ មានគ្នាតិច ហើយក្រីក្រផងនោះ តើមានលទ្ធភាពឯណាអាចផ្ដួលរំលំរដ្ឋាភិបាលវៀតណាមបាន។
ទន្ទឹមពេលនេះដែរ មន្ត្រីបក្សសមរង្ស៊ី និងបក្សសិទ្ធិមនុស្ស បានចេញញត្តិមួយដែរ តបទៅលោក ត្រឹង ដាយខ្វាង អំពាវនាវឲ្យរដ្ឋាភិបាលវៀតណាម គោរពសិទ្ធិសេរីភាព ជំនឿសាសនាខ្មែរកម្ពុជាក្រោម និងកុំរើសអើងខ្មែរក្រោម ដែលជាម្ចាស់ទឹកដី។
មិនមានរបាយការណ៍ផ្លូវការណាមួយបញ្ជាក់អំពីចំនួនខ្មែរកម្ពុជា ក្រោមកំពុងជ្រកកោណនៅប្រទេសកម្ពុជានោះទេ។ មន្ត្រីសមាគមខ្មែរកម្ពុជាក្រោមថ្លែងថា ខ្មែរក្រោមភាគច្រើនរស់នៅប្រទេសកម្ពុជា បានលាក់ត្រកូល និងលាក់អត្តសញ្ញាណព្រោះហេតុផលនយោបាយវៀតណាមតាមធ្វើទុក្ខបុកម្នេញ ឬដោយសារមានការរើសអើងនយោបាយនៅក្នុងស្រុកផង និងការរើសអើងពីសំណាក់សង្គមខ្មែរបច្ចុប្បន្នខ្លះផង។
ឯកសារប្រវត្តិសាស្ត្របង្ហាញថា ទឹកដីកម្ពុជាក្រោមដែលមានចំនួន២១ខេត្ត ត្រូវបានបារាំងកាត់ទៅឲ្យវៀតណាមនៅឆ្នាំ១៩៤៩៕
