ជនភៀសខ្លួនខ្មែរក្រោម ២៤នាក់ចង់ទៅរស់នៅប្រទេសទី៣បើរដ្ឋាភិបាលភ្នំពេញបដិសេធមិនទទួល ស្គាល់ពួកគាត់ថាជាខ្មែរ ហើយសុំឲ្យរដ្ឋាភិបាលចេញប្រកាសបដិសេធពួកគេជាផ្លូវការ។
គ្រួសារខែ្មរកម្ពុជាក្រោមចំនួន ២៤នាក់បានចាកចេញពីអង្គការក្រៅរដ្ឋាភិបាលនៅក្រុងប៉ោយប៉ែត ខេត្តបន្ទាយមានជ័យ មកកាន់ទីក្រុងភ្នំពេញនៅថៃ្ងព្រហស្បតិ៍នេះ ដើម្បីសុំសិទ្ធិជ្រកកោនពីការិយាល័យនៃឧត្តមស្នងការសហប្រជាជាតិ ទទួលបន្ទុកជនភៀសខ្លួន (UNHCR) និងរដ្ឋាភិបាលប្រទេសកម្ពុជា ដើម្បីរស់នៅក្នុងភាពស្របច្បាប់នៅក្នុងប្រទេសកម្ពុជាជំនួសនៃការ ចាប់បញ្ជូនពួកគាត់ឲ្យទៅរស់នៅក្នុងប្រទេសវៀតណាមទឹកដីខែ្មរ កម្ពុជាក្រោមនោះវិញ។
លោក ម៉ុង ពុទ្ធី ជាប្រធាននៃសមាគមប្រជាធិបតេយ្យ ឯករាជ្យ សេដ្ឋកិច្ចក្រៅប្រព័ន្ធនៅក្នុងខេត្តបន្ទាយមានជ័យ ដែលបានផ្តល់ទីជម្រកបណ្តោះអាសន្នដល់គ្រួសារខែ្មរកម្ពុជាក្រោម ២៤នាក់នោះបានមានប្រសាសន៍ថា គ្រួសារខ្មែរក្រោមទាំងនោះបានចាកចេញពីប៉ោយប៉ែតមកភ្នំពេញនៅថ្ងៃនេះ។
លោក ម៉ុង ពុទ្ធី បញ្ជាក់ថា ៖ «ខ្មែរកម្ពុជាក្រោមទាំង ២៤នាក់ហ្នឹងគាត់បានចេញពីការរិយាល័យខ្ញុំឆ្ពោះទៅភ្នំពេញទៅជួប យូអិន នៅភ្នំពេញដើម្បីសំណូមពរដោះស្រាយបញ្ហាមួយចំនួនជូនពួកគាត់ ដូចជាដាក់សំណើរទៅរដ្ឋាភិបាលទាំង ៥ចំណុចសុំឲ្យរដ្ឋាភិបាលផ្តល់ទីជម្រកសមរម្យ និងធ្វើលិខិតស្នាមផ្សេងៗសម្រាប់ពួកគាត់រស់នៅងាយស្រួល ក្នុងការរស់នៅក្នុងសង្គមខ្មែរហ្នឹងឲ្យបានងាយស្រួលផង។ ម៉្យាងទៀតបើរដ្ឋាភិបាលមិនទទួលស្គាល់ពួកគាត់ទេ សុំឲ្យធ្វើលិខិតបដិសេដ្ឋពួកគាត់ដើម្បីឲ្យពួកគាត់ភៀសខ្លួនទៅ ប្រទេសទី៣»។
លោក កុយ គួង ជាមន្រ្តីអ្នកនាំពាក្យនៃក្រសួងការបរទេសនៃប្រទេសកម្ពុជាបាន អធិប្បាយថា គ្រួសារទាំង ២៤នាក់នោះត្រូវបានចាត់ទុកជាប្រជាពលរដ្ឋខែ្មរផងដែរ។
លោកបានមានប្រសាសន៍ថា ៖ «ពេលកន្លងមកដូចខ្ញុំបានបញ្ជាក់ហើយ ថា ខ្មែរកម្ពុជាក្រោមដែលមករស់នៅកម្ពុជាយើងនេះ រដ្ឋាភិបាលតែងចាត់ទុកដូចប្រជាជនយើងដែរ។ ចំណែកពួកគាត់ដែលថាមកភ្នំពេញនោះខ្ញុំមិនទាន់ដឹងនៅឡើយទេ»។
ចំណែកឯលោក ជុង រ៉ាវុធ ជាមន្រ្តីនៃការិយាល័យឧត្តមស្នងការសហប្រជាជាតិទទួលបន្ទុកជនភៀស ខ្លួន ឬហៅថា UNHCR នៅក្នុងប្រទេសកម្ពុជាបានមានប្រសាសន៍ថា លោកមិនទាន់បានឃើញគ្រួសារខ្មែរកម្ពុជាក្រោម ២៤នោះនៅទ្បើយទេ។
សុខ សេរី ៖ ជាគោលការណ៍ខ្មែរកម្ពុជាក្រោមគាត់មានសិទ្ធជ្រកកោនទេ? ជុង រ៉ាវុធ ៖ យើងខ្មែរដូចគ្នា មានសិទ្ធដូចគ្នា ខ្មែរដូចគ្នា។
លោក ថាច់ សេដ្ឋា ជាប្រធាននៃសហគមខែ្មរកម្ពុជាក្រោមនៅក្នុងប្រទេសកម្ពុជា បានមានប្រសាសន៍ថា ៖ «យើង នឹងព្យាយាមជួយជំរុញបន្ថែមនូវរឿងរ៉ាវណាដែលយើងអាចជួយបានដូច្នេះ ខ្ញុំបានគិតគូរហើយបានតាមដានយ៉ាងដិតដល់ក្នុងករណីហ្នឹង»។
គ្រួសារខែ្មរកម្ពុជាក្រោម ២៤នាក់នោះត្រូវបានអាជ្ញាធរថៃបានចាប់បញ្ជូនខ្លួនមកប្រទេស កម្ពុជាតាមច្រកព្រំដែនអន្តរជាតិប៉ោយប៉ែតកាលពីថៃ្ងទី៥ ខែធ្នូ កន្លងទៅនេះនៅគ្រាដែលពួកគាត់បានទៅសុំសិទ្ធិជ្រោកកោនពី UNHCR នៅក្នុងប្រទេសថៃទៅកាន់ប្រទេសទី៣។
ពួកគាត់បានរត់គេចខ្លួនពីខេត្តអានយ៉ាង ប្រទេសវៀតណាមទឹកដីខែ្មរកម្ពុជាក្រោមទៅកាន់ប្រទេសថៃនោះកាលពី ឆ្នាំ២០០៨ ក្រោយពីនគរបាលវៀតណាមបានតាមសែ្វងរកចាប់ខ្លួនដោយសារតែគាត់បាន ងើបតវ៉ាទាមទារកម្មសិទ្ធិដីធ្លីពីដូនតាកាលពីឆ្នាំ២០០៧ កន្លងទៅ៕
ប្រភពពីវិទ្យុអាស៊ីសេរី.
