ទោះជាយើងមិន ដែលបានឃើញផ្ទាល់ភ្នែកមែន ប៉ុន្តែតាមកញ្ចក់ទូរទសន៍ ក៏ធ្លាប់បានឃើញ ពួកសត្វឈ្មោលខាំ ប្រយុទ្ធគ្នាបង្ហូរឈាម រហូតដល់ត្រូវរបួសស្លាប់ខ្លួនមួយៗ ដោយសារតែការ ហួងហែងទៅលើសត្វញី ដែលខ្លួន បានចាត់ទុកថា ជាគូសម្រាប់តែខ្លួនម្នាក់។
យើងក៏បានសង្កេតឃើញដែរថា គឺមិនមែនត្រឹមតែសត្វទេ សូម្បីមនុស្សលោក ទោះជាបាន ឬមិនបានបង្ហាញ នូវការហួងហែង ដោយអាការៈកាចសាហាវដូចសត្វ ប៉ុន្តែម្នាក់ៗអាចមានការហួងហែងតិច ឬច្រើន ចំពោះគូ កំណាន់ដែលខ្លួនបានស្រឡាញ់ ដោយចង់បានផ្តាច់មុខម្នាក់ឯង។
ចុចត្រង់នេះ ដើម្បីទាញយកកំណាព្យ “ភក្តីស្នេហ៍”
ហើយចំពោះ មនុស្សលោក មានការចម្លែក ខុសពីសត្វត្រង់មិនមែនសុទ្ធតែបុរសទេដែលហួងហែងប្រចណ្ឌនារី តែនារីក៏ប្រចណ្ឌបុរសខ្លាំងខ្លាណាស់ដែរ មានការ ចាក់ទឹកអាស៊ីដលើគ្នាជាដើម។
នេះចាត់ទុកជារឿងធម្មតាក៏បាន មិនធម្មតាក៏បាន ចំពោះរឿង’’ ស្នេហា’’ រវាងភេទ។ ប៉ុន្តែបើ និយាយពីរឿង’’ ស្នេហាទឹកដីប្រទេសជាតិ’’ វិញ គឺមនុស្សម្នាក់ៗទោះនារីឬបុរសមិនអាចហួងហែងទុកស្រឡាញ់តែម្នាក់ឯង បាន ទេ ព្រោះទឹកដីប្រទេសជាតិជារបស់រួមគ្នា អ្នកណាក៏អាចស្រឡាញ់បាន ហើយមានសិទ្ធិលូកដៃធ្វើអន្តរាគមន៍ ផ្សេងៗក្នុងន័យស្ថាបនា។ ផ្ទុយទៅវិញ ប្រសិនបើមានអ្នកស្នេហាជាតិដោយខុសរបៀប ធ្វើអ្វីមួយដែលបង្កើត អន្តរាយន៍ដល់ជាតិ អ្នកនោះប្រាកដជានឹងទទួលនូវប្រតិកម្ម ពីមហាជន ដែលមិនទទួលយក។
ក្នុងពេលថ្មីៗនេះ នៅក្នុង’’ ទិវាទំពាំងស្នងប្ញស្សី’’ ដែលរៀបចំឡើងដោយក្រុមការងារនៃសហព័ន្ធខ្មែរកម្ពុជា ក្រោម កាលពីថ្ងៃទី៦ នៅទីក្រុង ម៉ុងរ៉េអាល នៃប្រទេសកាណាដា យើងបានសង្កេតឃើញមានអ្នកចូលរួមគឺ មិនត្រឹមតែព្រះសង្ឃ និងប្រជាពលរដ្ឋខ្មែរកម្ពុជាក្រោមទេ គឺមានប្រជាពលខ្មែរជាទួទៅជាងបីពាន់នាក់ ដែលក្នុង នោះ ក៏មានវដ្តមានរបស់អ្នកនយោបាយពីបក្ខផ្សេងៗ ពីប្រទេសកម្ពុជាផងដែរ។
