សួស្ដីលោកអ្នក ដែលកំពុងតែទស្សនា និងស្ដាប់ វិទ្យុ “សំឡេងកម្ពុជាក្រោម” នៅលើគេហទំព័រវិទ្យុ “សំឡេងកម្ពុជាក្រោម” ជាទីគោរពរាប់អាន ។
ថ្ងៃនេះ នាយកដ្ឋានព័ត៌មាន នៃសហព័ន្ធខ្មែរកម្ពុជាក្រោម មានបីតិសោមនស្ស សូមឧទ្ទេសនាម ដល់លោកអ្នកនូវមុខមាត់ថ្មីនៃទ្យុ “សំឡេងកម្ពុជាក្រោម” ដែលគណៈកម្មការយើងខ្ញុំ ទើបតែបានកែ លម្អសម្រេចជាស្ថាពរ និងចាប់ផ្ដើមចេញផ្សាយជាសាធារណៈ នៅពីថ្ងៃទី 0១ ខែវិច្ឆិកា ឆ្នាំ ២០១៣ នេះ ។
ប្រវត្តិវិទ្យុ៖ កថាស្វាគមន៍បើកគេហទំព័រ និងកម្មវិធីផ្សាយថ្មី នៃវិទ្យុសំឡេងកម្ពុជាក្រោម
ជាដំបូង យើងខ្ញុំសូមណែនាំឲ្យលោកអ្នកបានស្គាល់នូវប្រវត្តិនៃវិទ្យុ “សំឡេងកម្ពុជាក្រោម” ។ វិទ្យុ បានកកើតឡើងនៅសហរដ្ឋអាមេរិក ដោយសហព័ន្ធខ្មែរកម្ពុជាក្រោម កាលពីថ្ងៃទី ០១ ខែមិថុនា ឆ្នាំ ២០០១ បើគិត ដល់ ថ្ងៃទី ០១ ខែមិថុនា ឆ្នាំ ២០១៣ វាមានអាយុកាល ១២ ឆ្នាំ ហើយ ។ ចាប់ ពីបានបង្កើតឡើង រហូតដល់ឆ្នាំ ២០០៤ វិទ្យុសំឡេងកម្ពុជាក្រោម បានផ្សាយតាមរលកធាតុ អាកាស ក្នុងមួយសប្ដាហ៍ម្ដង រៀងរាល់ថ្ងៃអង្គារ ចាប់ពីម៉ោង ០៩ ដល់ ម៉ោង ១០ យប់ ម៉ោងនៅកម្ពុជាក្រោម តាមកម្ពស់រលកធាតុអាកាសខ្លី ១៥.៦៩០ គីឡូហឺត និងបានដាក់ផ្សាយនៅ លើប្រព័ន្ធអិនធើណិត តាមរយៈគេហទំព័របណ្ដាញខ្មែរក្រោមរបស់សហព័ន្ធខ្មែរកម្ពុជាក្រោម ដែល មានអាសដ្ឋាន http://www.khmerkrom.net ។
ក្រោយមក នៅឆ្នាំ ២០០៥ វិទ្យុក៏ផ្អាកការផ្សាយតាមរលកធាតុអាកាស ហើយបែរមកផ្សាយ តាមប្រព័ន្ធអិនធើណិតវិញ ដោយចេញផ្សាយមួយសប្ដាហ៍ម្ដងរៀងរាល់ថ្ងៃអង្គារដដែល តាមរយៈ គេហទំព័រថ្មី ដែលមានអាសយដ្ឋាន http://www.vokk.net និងមកដល់ឆ្នាំ ២០០៨ ក្រុមការងារក៏ បានបន្ថែមម៉ោងផ្សាយចាប់ពីមួយសប្ដាហ៍ម្ដង មកជារៀងរាល់ថ្ងៃវិញ ។
ក្រមសីលធម៌៖
ដើម្បីពង្រឹងការផ្សាយឲ្យក្លាយជាព័ត៌មានជាទីទុកចិត្តពីលោកអ្នកស្ដាប់ និងជាព័ត៌មានផ្លូវការរបស់ ពលរដ្ឋខ្មែរក្រោមនោះ យើងខ្ញុំ ខិតខំប្រឹងប្រែងអស់ពីកម្លាំងកាយចិត្ត ដើម្បីធ្វើការងារទាំងអស់នេះ ដោយផ្អែកលើក្រមសីលធម៌ជាមូលដ្ឋាន ដូចខាងក្រោម៖
“សំឡេងកម្ពុជាក្រោម” ឬ “Voice of Kampuchea-Krom” ជាវិទ្យុផ្សាយតាមរយៈប្រព័ន្ធអិនធើណិត ផលិតដោយនាយកដ្ឋានព័ត៌មាន នៃសហព័ន្ធខ្មែរកម្ពុជាក្រោម (Khmers Kampuchea-Krom) ដែល មានមូលដ្ឋាននៅសហរដ្ឋអាមេរិក ។
វិទ្យុ “សំឡេងកម្ពុជាក្រោម” មានតួនាទីនាំដំណឹងជូនដល់ប្រជាជាតិខ្មែរក្រោមម្ចាស់ស្រុក នៃដែនដីកម្ពុជាក្រោម ដែលពួកគេមិនដែលមានស្ថានប័នព័ត៌មានឯករាជ្យរបស់ខ្លួន និងមិនដែលបាន ទទួលព័ត៌មានពិត គ្រប់ជ្រុងជ្រោយឡើយ ព្រោះប្រជាជាតិខ្មែរក្រោម សព្វថ្ងៃ កំពុងរស់នៅក្រោមការ ត្រួតត្រាបែបអាណានិគមពីរដ្ឋាភិបាលបក្សកុម្មុយនិស្តវៀតណាម ។ សព្វថ្ងៃ វៀតណាមជាប្រទេសប្រកាន់ យករបបកុម្មុយនិស្ត រាល់ប្រព័ន្ធផ្សព្វផ្សាយជារបស់រដ្ឋ ហើយមិនមានស្ថាប័នព័ត៌មានឯកជនផ្សាយ ព័ត៌មានឯករាជ្យឡើយ ។
វិទ្យុ “សំឡេងកម្ពុជាក្រោម” បង្កើតឡើងដើម្បីជម្រុញឲ្យមានការគោរពសិទ្ធិនៃការបញ្ចេញមតិ និងទស្សនៈ របស់ប្រជាជាតិខ្មែរក្រោម ដែលកំពុងត្រូវបានរដ្ឋាភិបាលបក្សកុម្មុយនិស្តវៀតណាមបំបិទមាត់ ។ ម្យ៉ាងទៀត វិទ្យុ “សំឡេងកម្ពុជាក្រោម” ជាវេទិកាមួយ សម្រាប់ពលរដ្ឋខ្មែរក្រោមនៅកម្ពុជាក្រោម ដែលត្រូវបាន រដ្ឋាភិបាលវៀតណាមបំបិទសំឡេងនោះ ឲ្យមានឱកាសបញ្ចេញមតិផ្សេងៗទាក់ទិននឹងបញ្ហារបស់ខ្លួននៅទីនេះ ដើម្បីឲ្យពិភពខាងក្រៅបានជ្រាប ។ ក្រៅពីការបញ្ចេញមតិ ពលរដ្ឋខ្មែរក្រោម នៅកម្ពុជាក្រោម ក៏អាចទទួលបានព័ត៌មានពីប្រភពខាងក្រៅ ទាក់ទិននឹងសកម្មភាព និងជីវភាពរបស់នៅ របស់ប្រជាជាតិ ខ្មែរក្រោមដែលកំពុងរស់នៅក្រៅប្រទេស ដូចជា សហរដ្ឋអាមេរិក, បណ្ដាប្រទេសអ៊ឺរ៉ុប, កាណាដា និង អូស្ត្រាលី ជាដើម ដែលជាប្រទេសជឿនលឿន មានការគោរពសិទ្ធិមនុស្សជាមូលដ្ឋាន ។ ដូច្នេះ វិទ្យុ “សំឡេងកម្ពុជាក្រោម” ជាស្ពានសេរីភាពមួយសម្រាប់ឲ្យពលរដ្ឋខ្មែរក្រោមនៅក្នុងស្រុក និង ជុំវិញពិភពលោកបានធ្វើដំណើរទៅរកគ្នា និងបានស្វែងយល់គ្នាកាន់តែច្បាស់ ដើម្បីរួមគ្នាផ្លាស់ប្ដូរសង្គមខ្មែរក្រោម នៅកម្ពុជាក្រោមឲ្យកាន់តែប្រសើរឡើង និងឈានទៅរក “សិទ្ធិសម្រេចវាសនាខ្លួនដោយខ្លួនឯង” នាពេល អនាគត ។
ចំណុចស្នូលសំខាន់នៃបេសកកម្មរបស់វិទ្យុ “សំឡេងកម្ពុជាក្រោម” គឺការប្រកាន់ខ្ជាប់នូវបទដ្ឋាននៃវិជ្ជាជីវៈសារព័ត៌មាន ។
កម្មវិធីផ្សាយនៃ វិទ្យុ “សំឡេងកម្ពុជាក្រោម” រក្សានូវរបៀបនិយាយដែលមានលក្ខណៈស្ងប់ស្ងៀម មិនលាយឡំនឹងមនោសញ្ចេតនា ព្រមទាំងជៀសវាងនូវការបង្កជម្លោះ ការឃោសនា ឬ ការប្រមាថលើជនណា ក្រុមណា ឬ រដ្ឋាភិបាលណាមួយ ។
កម្មវិធីផ្សាយនៃ វិទ្យុ “សំឡេងកម្ពុជាក្រោម” មិនញុះញង់អ្នកស្ដាប់ឲ្យប្រព្រឹត្តអំពើហិង្សា ឬ លើកទឹកចិត្តឲ្យមានការបះបោរ ឬ ធ្វើចំណាកស្រុកឡើយ ។ កម្មវិធីផ្សាយរបស់យើង ប្រកាន់ខ្ជាប់នូវគោលការណ៍ប្រជាធិបតេយ្យ មានការផ្សព្វផ្សាយព័ត៌មានដោយសេរី និងផ្តល់នូវវេទិកាសម្រាប់បញ្ចេញមតិ និងទស្សនៈពីគ្រប់មជ្ឈដ្ឋាន ជាពិសេស ពីសំណាក់ប្រជាជាតិខ្មែរក្រោម ។ ប្រសិនបើ កម្មវិធីផ្សាយនៃវិទ្យុ “សំឡេងកម្ពុជាក្រោម” មានកំហុសក្នុងការផ្សាយសំឡេង ឬ អត្ថបទនៅលើគេហទំព័រ គណៈកម្មការយើង នឹងទទួលកំហុស ហើយកែតម្រូវជាបន្ទាន់តាមមធ្យោបាយ ដែលអាចធ្វើទៅបាន ។
ចាប់តាំងពីបារាំងបានប្រកាសឲ្យដែនដីកម្ពុជាក្រោម (កូស័ងស៊ីន/Cochin China) ឋិតនៅក្រោមរដ្ឋ ចំណុះវៀតណាម កាលពីថ្ងៃទី ០៤ ខែមិថុនា ឆ្នាំ ១៩៤៩ មក ទំនាក់ទំនង ប្រជាជាតិខ្មែរក្រោម នៅកម្ពុជាក្រោម ត្រូវបានកាត់ផ្ដាច់ចេញពីប្រជាជាតិខ្មែរនៅប្រទេសកម្ពុជារហូតមកដល់សព្វថ្ងៃ បានធ្វើឲ្យភាសា និយាយរបស់ប្រជាជាតិខ្មែរក្រោម មានលក្ខណៈរដឺនប្លែកពីប្រជាពលរដ្ឋខ្មែរ នៅក្នុងប្រទេសកម្ពុជា ដែលកត្តានេះ សេចក្ដីរាយការណ៍ព័ត៌មាននៃវិទ្យុ “សំឡេងកម្ពុជាក្រោម” ខ្លះ អាចពិបាកស្ដាប់សម្រាប់ពលរដ្ឋខ្មែរដែលមានកំណើតនៅប្រទេសកម្ពុជា ។
កម្មវិធីផ្សាយនៃវិទ្យុ “សំឡេងកម្ពុជាក្រោម” បានទទួលជោគជ័យ ល្គឹកណាតែព័ត៌មានរបស់យើងខ្ញុំ បាន ជ្រួតជ្រាបទៅដល់អ្នកស្ដាប់គ្រប់មជ្ឈដ្ឋាន និងដល់ពលរដ្ឋខ្មែរក្រោមនៅកម្ពុជាក្រោម ។
ទោះបីយើងខ្ញុំ ខិតខំប្រឹងប្រែងឲ្យការផ្សាយវិទ្យុមួយនេះ មានរីកចម្រើនប្រសើរជាងមុនយ៉ាងណា ក៏ដោយ ក៏វាគង់គេចមិនផុតពីកំហុសឆ្គងអចេតនាដោយប្រការផ្សេងៗឡើយ ។ ដូចនេះ យើងខ្ញុំ សហការីស្មគ្រចិត្ត នៃក្រុមផ្សាយវិទ្យុសំឡេងកម្ពុជាក្រោមទាំងអស់ សូមស្វាគមន៍ចំពោះការណែនាំ កែលម្អពីអស់លោកអ្នកស្ដាប់នៅគ្រប់មជ្ឈដ្ឋាន ។
អំពីគេហទំព័រ៖
គេហទំព័រវិទ្យុសំឡេងកម្ពុជាក្រោមដែលលោកអ្នកនាងកំពុងតែទស្សនានេះ យើងខ្ញុំបានរៀបចំឲ្យ មានភាពងាយស្រួលដល់ការស្វែងរកព័ត៌មានរបស់អស់លោកអ្នកនាង ។ នៅលើគេហំព័រថ្មីនេះ យើងខ្ញុំបានបង្កើតឲ្យមានមាតិកា ឬ ចំណាត់ក្រុមព័ត៌មាននីមួយៗ ដូចជា កម្ពុជាក្រោម កម្ពុជា វៀតណាម អន្តរជាតិ ទស្សនៈ និង ពហុព័ត៌មាន ជាដើម ដែលលោកអ្នក អាចចុចលើមាតិកា ព័ត៌មាននីមួយដើម្បីស្ដាប់ និង អានអត្ថបទតាមការនិយមចូលចិត្តរបស់ខ្លួនបាន ។
ចំពោះកម្មវិធីផ្សាយរៀងរាល់ថ្ងៃ យើងខ្ញុំ មានបង្កើតប៉ូតុងចំនួន ៣ នៅខាងស្ដាំដៃ ។ ប្រសិនបើ លោកអ្នកនាងចង់ស្ដាប់កម្មវិធីផ្សាយថ្មីបំផុតរៀងរាល់ថ្ងៃ សូមចុចលើប៉ូតុង “ចុចស្ដាប់” វានឹងលេង នៅលើទំព័រថ្មីមួយទៀតដាច់ដោយឡែក ដោយលោកអ្នកនៅតែចុចអានអត្ថបទផ្សេងៗនៅលើ គេហទំព័របានដដែល ។ ប្រសិនបើលោកអ្នកចង់រក្សាទុកនូវសំឡេងផ្សាយថ្ងៃថ្មីបំផុត សូមចុច លើប៉ូតុង “ទាញសំឡេង” និង បើលោកអ្នកចង់ស្ដាប់កម្មវិធីផ្សាយមុនៗ សូមលើប៉ូតុង “សំឡេង មុនៗ” ដែលទំព័រមួយនេះ យើងខ្ញុំបានរក្សានូវសំឡេង ដែលបានចេញផ្សាយចាប់ពីឆ្នាំ ២០០១ មក ។
យើងខ្ញុំ សូមថ្លែងអំណរគុណយ៉ាងជ្រាលជ្រៅចំពោះលោកអ្នកនាងដែលបានចូលទស្សនា និងស្ដាប់ វិទ្យុសំឡេងកម្ពុជាក្រោម យ៉ាងចិត្តទុកដាក់ ។ សូមអរព្រះគុណ និងអរគុណ